Ua faasalalau i taimi uma i luga o TV, o telefoni, o komepiuta, ma isi masini faaonapōnei tala e faapopoleina ai, ma e masani ona aofia ai ma ni vitiō e iai ni vaaiga lē lelei.

 Ma o loo matamata ai le fanau.

 E faapefea ona e fesoasoani i lau fanau, ia ʻalofia le soona popole i na tala lē lelei?

•  E faapefea ona aafia le fanau i tala i mea o loo tutupu?

•  E faapefea ona e fesoasoani i lau fanau e ʻalofia le popole ona o tala i mea o loo tutupu?

•  Ae faapefea pe afai na vaai moni lau tama i se mea mataʻutia na tupu?

•   Ua popole le toʻatele o tamaiti ona o mea lē lelei e latou te vāai ai i tala fou. O nisi tamaiti atonu e lē o faailoa atu i isi o latou faalogona, ae o loo matuā popole ona o na tala lē lelei.  a E ono faateteleina foʻi lo latou popole, pe a vaai atu o loo soona popole o latou mātua.

•   E ono faauiga sesē e le fanau mea o loo latou vāai ai i tala fou. O se faataʻitaʻiga, e manatu nisi tamaiti, o le a tutupu foʻi na mea i o latou aiga. Pe a faaali soo foʻi se vitiō o se mea mataʻutia na tupu, e ono manatu ai le fanau o loo tupu pea lenā mea i aso uma.

•   E ono lē malamalama le fanau, pe e matuiā moni lava le mea na tupu. Atonu e lē iloa e le fanau, o fale faasalalau o ni pisinisi, e latou te mauaina le tele o tupe, pe a toʻatele tagata e matamata i a latou lipoti. O lea, e latou te ono soona faatelē ai se mea na tupu, ina ia tosina mai ai le toʻatele o tagata e matamata i a latou lipoti.

•   Ia faatapulaa le tele e matamata pe faalogo ai le fanau i na tala lē lelei. E lē faapea ai e lē tatau ona iloa e lau fanau mea o loo tutupu i le lalolagi. Ae e iai aafiaga lē lelei pe a latou matamata pe faalogo soo i tala e faapopoleina ai.

   “O nisi taimi e ma te talanoa auʻiliʻili ai ma laʻu tane i se mea na tupu, ae e ma te lē o iloa o loo lagona mai e le fanau, ma latou lagona ai le popole.”—Maria.

   Mataupu silisili o le Tusi Paia: “O le popole o se avega mamafa.”—Faataoto 12:25, Contemporary English Version.

•   Faalogologo ma le onosaʻi, ma tali atu ma le alofa. Pe a faigatā ona faamatala mai e lau tama le mea na tupu, e mafai ona e fai i ai e tusi se ata. Ia talanoa ma lau tama i ona popolega, i se auala e faigofie ona malamalama ai, ma ʻalofia le taʻua o faamatalaga e lē tāua e faatatau i se mea na tupu.

   “Ua lelei faalogona o le ma tama teine ina ua ma faalogologo lelei atu a o talanoa mai. E lē fesoasoani le tau ina fai i ai, ʻO le tulaga lea ua iai le lalolagi i le taimi lenei, ma e tatau ona tatou faamasani ai.’”—Sarahi.

   Mataupu silisili o le Tusi Paia: “Ia faalogologo lelei tagata uma, ae aua le vave ona tautala.”—Iakopo 1:19.

•   Fesoasoani i lau tama e malamalama i le mea moni e faatatau i mea o loo tutupu. O se faataʻitaʻiga, pe a lipotia mai le ave faamalosia o tamaiti, o le a ia mafaufau ai e mafai foʻi ona tupu lenā mea iā te ia. Ia faamatala i lau fanau mea o loo e faia ina ia faamautinoa ai o loo saogalemu i latou. E lē gata i lea, ia faailoa i ai, e masani lava ona faasalalau e tala fou ni mea matuiā e seāseā tutupu, ae lē o ni mea e tutupu soo.

   “Fesoasoani i lau fanau i le auala e feagai ai ma o latou faalogona. E masani lava ona aafia faalogona i mea e mafaufau i ai. Pe a tatou fesoasoani la i le fanau e mafaufau i se mea lelei, o le a lelei ai foʻi o latou faalogona.”—Lourdes.

   Mataupu silisili o le Tusi Paia: “O le loto o le tagata atamai e māfua ai ona faaalia e lona gutu le tofā mamao, ma e faatauanau foʻi ona laugutu.”—Faataoto 16:23.