Qullaawu Maxaafi Yesuusi seenne adhinoronna teꞌee bade kulannokkiha ikkirono, isi daafira kulloonnirinni isi seenne adhinokkita huwata dandiineemmo. a Hanni aantete shiqqino hedo laꞌno.

1.   Qullaawu Maxaafi Yesuusi ayiddire duucha hige kulanno; qoleno soqqanshosi yannara ledosi haꞌranno meentinna shinisi yannara xeertote uurre laino meenti noota xawisanno; ikkirono galte noosita mitto bayichono dikulanno. (Maatewoosi 12:46, 47; Maarqoosi 3:31, 32; 15:40; Luqaasi 8:2, 3, 19, 20; Yohaannisi 19:25) Qullaawu Maxaafi tenne hajo daafira mittoreno yiinokkihu Yesuusi horonta seenne adhinokki daafiraati yaa dandiineemmo.

2.   Yesuusi, Maganoho roore soqqamate yite adhantukki heedhannori daafira coyiꞌranni rosaanosira togo yiino: “Konne coye [adhammikki heeꞌra] adha dandaannohu heeꞌriro adho.” (Maatewoosi 19:10-12) Maganoho heeshshonsa gudisse uyite soqqamate yite adhantukki heeꞌra doodhitannorira Yesuusi lawishsha ikkino.—Yohaannisi 13:15; 1 Qorontoosi 7:32-38.

3.   Yesuusi reyara albaanni, amasi towaantanni gede dhaaꞌmino. (Yohaannisi 19:25-27) Isi seenne adhinoha woy ooso noosiha ikkoommero, minaamasino woy oososino towaantanni gede kuꞌlannoti dihuluullissannote.

4.   Qullaawu Maxaafi Yesuusi minaannuwaho dancha lawishsha ikkinota kulannoha ikkirono, isi minaamasi towaatino gara kulannori dino. Hatteentenni togo yaanno: “Minaannuwa! Kiristoosi beetekiristaane baxinonna isera umosi sayise uyinonte gede, kiꞌneno mini amuuwaꞌne hakko garinni baxxe.” (Efesooni Sokka 5:25) Yesuusi uullate aana noo waro seenne adhinoha ikkoommero, guuta minaanna ikkasinni dancha lawishsha ikkinota konni qummeeshshi aana dikullanni?

 Ee, ajayi ajeenna lewu roduuwi noosi. Kuri giddo roduuwisi Yaiqoobi, Yooseefi, Simiooninna Yihuda, hattono ajayi ajeenna lame meya roduuwi no. (Maatewoosi 13:54-56; Maarqoosi 6:3) Kuri Yesuusi roduuwi amasi Maariyaaminna minaannise Yooseefi ilinoreeti. (Maatewoosi 1:25) Qullaawu Maxaafi Yesuusi Maariyaamira “bayira beettose” ikkinota kulanno; hakko daafira ise wole oosono iltino yaate.—Luqaasi 2:7.

 Mitu manni, Maariyaami heeshshose diro woꞌma seeminatunni heedhino yee ammananno daafira, “roduuwa” yaanno qaali wole tiro afiꞌrinoha lawannonsa. Lawishshaho mitootu, Yesuusi roduuwi Yooseefi albi galtesiwiinni ilinoreeti yitanno. Ikkollana, Qullaawu Maxaafi Yesuusi Daawitira hexxo uyinoonnita mootimmate zuufaane ragiꞌrinota kulanno. (2 Saamueeli 7:12, 13; Luqaasi 1:32) Yooseefi Yesuusi ilamara albaanni ooso ilinoha ikkoommero, hakkuri giddo bayiriidihu seeru garinni mootimma ragiꞌrannoha ikkanno.

 “Roduuwa” yinoonniri Yesuusira ammanate roduuwa ikkitinore, rosaanosiiti ikka? Hatto yee heda Qullaawa Borro yitannori ledo sumuu diyaanno; korkaatuno Qullaawu Maxaafi “roduuwisi nafa iso [ammaꞌnitinokki]” yanna noota kulanno. (Yohaannisi 7:5, Haaro Gondooro) Maganu Qaali Yesuusi roduuwanna rosaanosi addi addinni kulanno.—Yohaannisi 2:12.

 Mitu manni, Yesuusi roduuwa yiniri isira adate woy wosiilu oosooti yaanno. Ikkollana, Giriikete Afiita Qullaawa Borro borreessitinori “rodoo,” “fiixa,” hattono “wosiilu woy adate beetto” yitanno qaallara addi addi qaale horoonsidhino. (Luqaasi 21:16; Qolasiyaasi Sokka 4:10) Batinye Qullaawu Maxaafi fullahaano Yesuusi roduuwa yiniri addinta maalu roduuwasi ikkitinota ammantanno. Lawishshaho, Ze Ekispoozitersi Bayibili Komentaarii togo yaanno: “‘Roduuwa’ yaanno qaali . . . Maariyaaminna Yooseefi ooso kulannotanna Yesuusira amasi widoonni roduuwasi ikkitinore kulannoho yee ammana garankolla.” b