Biꞌre mannu daabbo gaꞌnanno bullee daaqqate daamma horoonsiꞌranno. Konni garinni gide daammaho daaha roore mine meentu woy soqqamaasine barru baala assitannoreeti. Biꞌree waro daammu huuro macciishsha barru baala assinanniri gedeeti.—Wolapho 11:5; Ermiyaasi 25:10.

Biꞌree Gibitsenni anfoonni misilla hakkawaro gide hiittoonni daankanniro leellishshanno. Gidu daammi suduudaaꞌme aaniido xeichaawinoho; aanaho qole daammi-beetto afiꞌrino. Daakkanno mancho guluphite lamente anganni daammi-beetto seekkite amadde daammu aana noo gide daakkanno. Mitte borro xawissanno garinni, hakkawari daammi-beetti 2⁠tenni 4 kiilogiraame geeshsha ikkanno. Konne olaho horoonsiꞌnanniha ikkiro, manna shaara dandaanno.—Mesaafinti 9:50-54.

Gide daammunni daaqqa hakkawaro maatete lowo geeshsha hasiisannore ikkino daafira, asaleho yine daamma adhinannita hooltannoti Qullaawu Maxaafi higge no. Marro 24:6 togo yitanno: “Aye manchino asaleho yee daamma woy daammi-beetto adha dihasiissannosi; korkaatuno hatto assa manchoho heeshshosi adhinohu gedeeti.”

Qullaawu Maxaafi Yesuusi “Annisira afalete mule” noota coyiꞌranno. (Yohaannisi 1:18, lekkaalliidi qaagiishsha) Kuni qaali Yesuusi Maganunniwa lowo geeshsha gamba yiinoha ikkinota leellishanno. Qoleno, Yihudootu sagalete yannara harunsitanno bude qummi assannoho.

Yesuusi uullate aana noo waro, Yihudootu sagalete xarapheessira doyissine worroonni gulantira dolli yitanno. Sagalete ofollinohu mittu mittunku manchi umiido sagalete xarapheessiwa, alba kayinni wolewa hige guracho cigilesinni barkote gedeere irki⁠ꞌranno. Konni garinni dolli yaasi qiniiticho angasinni mitore amadate injeessitannosi. Mitte borro kultanno garinni, sagalete xarapheessa doyisse ofollino manni baalunku gura midaadinni dolli yee ku⁠ꞌu ku⁠ꞌuyira gamba yaanno daafira, “mittu manchi umi isira badheenni dolli yiino manchi gagasiwa shiqqi yaanno”; “konnira, kuni manchi ku⁠ꞌuyira ‘afalete mule dolli yiino’ yaa dandiinanni.”

Qaete annira woy jilu annira afalete mule dolli yaa hakkawaro lowo ayirrinyeeti woy qoossooti. Konni daafira, Yesuusi jeefote Faasika ayirrisi wote Yesuusira afalete mule noohu “Yesuusi baxanno rosaancho” yaamaminoho hawaariya Yohaannisiiti. Hakko daafira, Yohaannisi ‘Yesuusira gagasunniwa shiqqi yee’ xa⁠ꞌmo xa⁠ꞌma dandiino.​​—⁠Yohaannisi 13:​23-​25; 21:20.