Anjeꞌyanni kayise kalaqama baxeemmo. Mereerima Finilaandera, katamanke Yuvaaskula doyisse nooha laꞌꞌate baxisanno dubbonna garbuwa maatenke ledo duucha woyite haꞌne laꞌneemmo. Qoleno saada lowo geeshsha baxeemmo. Shiinqu noommo waro, afummo basunna woshicho baala amade hanqafeemmo! Lophummo gedensaanni, mannu saada beebba assiꞌranno gara lae giirama hanafummo. Gedensoonni, saadate qoosso agarsiissanno dirijjite eummo; hakko anete gedee hedo noonsa manni ledo egennamummo.

Saada gawajjotenni agarate lowore assinoommo. Dagoomaho addi addi mashalaqqe sayinseemmo, hattono mannu saadate ordanni uddanna ganne hirrannitanna haaro xagga saadate aana woꞌnaallannita giwe salfe fulanno gede kakkayinseemmo. Wole agurina saadate daafira gaarantannota haaro dirijjite xintinoommo. Saada gawajjantannota gatisate quwa sainore assineemmo daafira, duucha woyite gashshaasinete ledo kiphi yineemmo. Isinni duucha hinge amande yoote minira massinoonnie.

Saadate coyi dhiwannoetano agurranna, alamete aana batiꞌrinohu wolu qarrino yaachishannoe. Gedensoonni batinye dirijjitta giddora eummo; lawishshaho, Aminestii Internaashinaalinna Giriinpiisi yinanni dirijjitta ledo loosoommo. Loosonsa woꞌma wolqaꞌyanni looseemmo. Buxanete, hawaaxamino manniranna kaaꞌlo hasiissannohu wolu manni qoosso daafira gaaramoommo.

Gale hosanni kayinni, alame woyyeessa dandeemmokkita huwatummo. Tini dirijjitta shiimmaadda qarra tira dandiitinoha ikkirono, jajjabbu qarri kayinni lexxannilla haꞌranni no. Alame gashshitinoti mitte jawa busha wolqa nooha lawinoe; qoleno tini bushshu yaannohu dino. Mittoreno asse afeemmori nookkita huwatummo.

Woyyeessa dandeemmori nookkita afummoti dadilloommo daafira, Maganunna Qullaawu Maxaafi daafira heda hanafummo. Alba Yihowa Farciꞌraasine ledo Qullaawa Maxaafa xiinxalloommo. Yihowa Farciꞌraasine shaqqillenna baxille leellishshinoe daafira dancha manna ikkitinota afoommoha ikkirono, hakkawaro heeshshoꞌya biddi assiꞌrate diqixxaawoommo. Xa kayinni bashshoha diꞌꞌikkoommo.

Qullaawa Maxaafaꞌya haaꞌre nabbawa hanafummo. Hatto assaꞌya lowo geeshsha sheshifachishshinoe. Qullaawu Maxaafi giddo saada danchu garinni towaata hasiissannota kultannoti batinye qummeeshshuwa noota wodanchummo. Coyi gedera Lawishsha 12:10, “Keeraanchu manchi saadasi nafa mararanno” yitanno. Qoleno alamete qarra abbinohu Magano ikkinokkita huwatummo. Qarru lexxanni haꞌrinohu rooru manni isi biddishsha harunsannokki daafiraati. Yihowa baxillenna cincasi afummoti lowo geeshsha dhagge assiꞌroommo.—Faarso 103:8-14.

Hatte taaera, Qullaawu Maxaafi Addinta Mayyee Rosiisanno? yaanno maxaafa sonkannie gede forme wonshe soyummo. Mulenni Yihowa Farciꞌraasine ikkino minaanninna minaama daye, Qullaawa Maxaafa xiinxalleemmo gede koyisie; anino maahoyye yuummo. Qoleno Gambooshshu Addaraashera insa ledo gamba yaa hanafummo. Konni garinni, Qullaawu Maxaafinni roseemmore roore baxanni haꞌrummo.

Qullaawu Maxaafi kaaꞌlonni heeshshoꞌya giddo lowore biddi assiꞌroommo. Sijaara aganna ago quwa sayise aga agurummo. Sonaꞌyanna coyiꞌreemmo gara biddi assiꞌrummo. Gashshaasine ayirrisa hasiissannoetano rosummo. (Roomu Sokka 13:1) Qoleno albi gede amanyoote bainore assa agurummo.

Roore qarra ikkitinoeti kayinni mannunna saadate qoossora gaarantanno dirijjitta giddonni fulate. Umi qara, tenne dirijjitta giddonni fulummoro insa kaadoommonsahu gedeeti yee hedoommo. Ikkollana, alamete qarrira malu Maganu Mangiste calla ikkitinota huwatoommo. Hakko daafira, nooe wolqa baalatenni tenne Mangistera halamatenna wolootuno tenne Mangistere rossanno gede kaaꞌlate murciꞌrummo.—Maatewoosi 6:33.

Dagoomu qoossora gaarameemmoha ikkoommo daafira, xaphoomunni mannu lame garaati yee hedeemmo; yaano dancha mannaatinna busha mannaati. Qoleno busha mannaati yee hedoommore miicummokki diagureemmo. Ikkollana Qullaawu Maxaafi kaaꞌlonni, manna giwa aguroommo. Hatteentenni, mannu baalunkura Kiristaanu baxille leellishate woꞌnaaleemmo. (Maatewoosi 5:44) Baxille leellisheemmo doogga giddo mitte, Maganu Mangisteha dancha duduwo mannaho kulate. Kuni kaajju loosi mannu keere, hagiirrenna addu hexxo afiꞌranno gede kaaꞌlanno gara laeemmo woyite tashshi yaannoe.

Mitiinsannoere baala Yihowara tuqqaꞌya giddoyidi harshammo afiꞌreemmo gede assitinoe. Isi Kalaqaancho ikkino daafira, saadanna manna beebba assiꞌnanna hegerera sammi yaannokkitanna biifado uullanke hunnara wore agurannokkita addaxxeemmo. Isi muli yannara Mangistesi widoonni, daafamino coye baalanka dhaawanno. (Isayaasi 11:1-9) Konne halaale afaꞌyanna wolu mannino konne halaale ammananno gede kaaꞌlaꞌya lowo geeshsha hagiirsiissannoe. Xaate alame woyyeessa hasiissannoe yee heda aguroommo.