HAGIIRRU noo heeshsho heeˈra giwanno manchi dino. Ikkollana heeˈnoommo yanna ‘qarrissannota’ ikkitinohura baalunkura qarru iillannonke. (2 Xim. 3:1) Iillitinonke miico, fayyimmate qarri, looso hooga, xissonna wolu yaachishanno coyi sunu sununni hagiirrinke baˈˈanno gede assara dandaanno. Maganu soqqamaano nafa hexxo mudhitaranna hagiirrinsa baˈˈara dandaanno. Atera togoori iillinoheha ikkiro, albi gede hagiirraamo ikkate kaaˈlannoheri maati?

Tenne xaˈmora dawaro afiˈnammora albaanni, hanni addu hagiirri maatironna wolootu fonqolo ikkannori iillinsarono hagiirrinsa baikki heeˈra dandiitino gara laˈno. Hakkuunni gedensaanni hagiirrinke baˈˈannokki gedenna lexxanno gede assiˈra dandiineemmohu hiittoonniitiro ronseemmo.

Mittu manchi duucha wote osoˈlanno woy faasiiqanno daafira calla hakku manchi hagiirraamoho yaa diˈˈikkino. Hanni mitto lawishsha hedi: Age dimbino manchi osoˈlara dandaanno. Dimbisi higanno wote kayinni osolisi baeenna dadillunna qarru woˈmino heeshshosiwa higanno. Kuni manchi shiima yanna geeshsha osoˈlino daafira calla addu hagiirre afiˈrino yaa didandiinanni.—Law. 14:13.

Hagiirru wodanu giddonni burqanno akataati. Hagiirru “danchare afiˈneenna woy afiˈneemmo yine hexxineenna macciishshantanno hedooti.” Hagiirraamo ikkate yaa, heeshshonke giddo faffoteno ikko qarru yannara hagiidhate yaate. (1 Tes. 1:6) Mittu manchira qarru iillisirono hagiirraamo ikka dandaanno. Lawishshaho, Yesuusi soqqamaasine isi daafira, farcidhino daafira gannoonninsa. Insa kayinni “Yesuusi suˈmira yite shollinye adha hasiissannonsata egentino daafira, tashshi yaannansa [Sanihediriini songo] albinni fulte” hadhino. (Soq. 5:41) Soqqamaasine hagiidhitinohu gannoonninsa daafira diˈˈikkino. Kayinni insa Maganu soqqamaasine ikkitino daafira, isira ammanamansa hagiirraamma ikkitanno gede assitinonsa.

Hagiirru adhine ilammannire woy mulla afiˈnannire diˈˈikkino. Togo yineemmohu mayiraati? Korkaatuno addu hagiirri, Maganunnihu qullaawu ayyaani laalanno gumaati. Qullaawu ayyaani kaaˈlonni, hagiirreno ikko wole “haaro mannimma” uddiˈra dandiineemmo. (Efe. 4:24; Gal. 5:22) Hagiirraamma ikkanke, heeshshonke giddo iillannonke qarra dandee heeˈrate kaaˈlitannonke.

Yihowa hedo, uullate danchu coyi callu heeˈraraati ikkinninna, xa heeˈnoommo yanna gede bunshe batidhara diˈˈikkino. Ikkollana wolootu assitannohu bushu coyi Yihowa hagiirraamo ikkannokki gede diassinosi. Maganu Qaali “Jawaantenna hagiirru Qullaawa Minesi no” yaanno. (1 Dud. 16:27) Qoleno soqqaamaanosi assitannohu danchu coyi Yihowa ‘wodana hagiirsiisanno.’—Law. 27:11.

Coyi ninke hendoommo gede ikka hoogiro yaada dihasiissannonke; hatto ikkiro Yihowa  lawishsha harunsineemmo. Tenne yannara hagiirrinke baˈˈara wodhantenni, noonkeha dancha coye illachishanna albillitte daggannota dancha yanna cincatenni agadha dandiineemmo. *

Qullaawu Maxaafi fonqolu iillinsarono hagiirrinsa baikkinni heeˈrino manni lawishsha kulannonke. Buutote qarri iille heeˈreennansa kaajje saino manni giddo mittu Abirihaamiiti. (Kal. 12:10-20; 14:8-16; 16:4, 5; 20:1-18; 21:8, 9) Abirihaami fonqolu iillinosiha ikkirono hagiirrisi dibaino. Tennera kaaˈlinosiri maati? Haaro alamera Mesihichu gashshooti hunda heeˈranno heeshsho xabbe leeltinosi. (Kal. 22:15-18; Ibi. 11:10) Yesuusi togo yiino: “Anniˈne Abirihaami ane barra lae hagiidhate halchino; afe kae hagiidhino.” (Yoh. 8:56) Ninkeno albillitte afiˈneemmoha hagiirsiisanno coye hiincine hagiidha dandiineemmo.—Rom. 8:21.

Abirihaami gede, soqqamaasinchu Phaawuloosino ikko soqqanshote jaalisi Silaasi Maganu eino qaale illachishshino. Insa kaajjado ammana noonsareeti; qoleno fonqolu iillinonsaha ikkirono hagiirrinsa baikki heedhino. Lawishshaho ganne kaˈne usuru minira eessininsahu gedensaanni, “Hashshu taalootira Phaawuloosinna Silaasi huuccattotenninna faarsotenni Magano [galaxxitino].” (Soq. 16:23-25) Insa hexxonsa illachishansanna qarru iillinonsahu Kiristoosi suˈmira yiteenna ikkinota afansa hagiirraamma assitinonsa. Ninkeno Phaawuloosinna Silaasi gede Maganoho ammanamme soqqamme afiˈneemmo atoote woˈmanka wote heda dandiineemmo.—Fil. 1:12-14.

Yannankerano alamete doyichora noo roduuwinke giddo, qarru iillinsarono hagiirraamma ikkitinori no. Lawishshaho, Bocaasa 2013nni Filippiinsi gobbara Hayaani yinanniti wolqaataame hombobalatte kaˈu yannara 1,000 saˈannori Yihowa Farciˈraasine minensa hooggino. Takiloobaani yinanni katamira heeˈrannohu minesi hooginohu Joorji yinanni rodii togo yiino: “Hatte yannara roduuwu qarrantinoha ikkirono hagiirraammaho. Macciishshaminonke hagiirre xawisa didandeemmo.” Baxi geeshshi qarri iillinkerono Yihowa assinonkere hendeemmoha ikkiro woˈmanka wote hagiirraamma ikka dandiineemmo. Yihowa hagiirsiisannonkere maa uyinonke?

Yihowa jaalla ikkanke hagiidhineemmo gede assitannonke. Hanni hedi: Kalqete Alame Mooticha egenninoommo. Isi Annankeeti, Maganonkeetinna, Jaalankeeti!—Far. 71:17, 18.

Heeshsho uyinonkehu Yihowaati; qoleno hagiidhinanni heeˈra dandiineemmo gede asse kalaqinonke. (Ros. 3:12, 13) Yihowa isiwa woshshinonke daafira isi mannu oosora hedinore wodanchinoommo. (Qol. 1:9, 10) Konnira heeshshonke hagiirru noota ikka dandiitanno. Qoleno uullate aana noohu rooru manni kalaqammoommohu mayiraatiro diafino. Phaawuloosi tenne daafira coyiˈranni togo yiino: “‘Ille laˈinokkiha, macca macciishshitinokkiha, mannu wodani hedinokkiha, Maganu baxxannosirira qixxeessino’ yine borreessinoonni. Maganu goˈlino coye Ayyaanisinni leellishinonke. Ayyaanu, Maganu giddo noori baalu gatikkinni qonqolche afanno.” (1 Qor. 2:9, 10) Yihowa mannu oosora hedinore afanke hagiirsiissannonketa diˈˈikkitino?

Hanni Yihowa assinonkeha wole coye hedi. Cubbinkera maaro afiˈneemmota afanke tashshi diassitannonke? (1 Yoh. 2:12) Maganu maarosinni, muli yanna giddo haaro alame abbeemmo yee qaale einonke. (Rom. 12:12) Xaa yannara nafa Yihowa ayyaanaamittete roduuwa uyinonke. (Far. 133:1) Qoleno Qullaawu Maxaafi Yihowa mannasi Sheexaanunna agaanintetewiinni agarannonsata kulanno. (Far. 91:11) Maganu uyinonkeha konne baalanka atoote hiincineemmoha ikkiro, albinni roore hagiirraamma ikkineemmo.—Fil. 4:4.

Hagiirraamo ikkino Kiristaanchi hagiirrisi lexxanno gede assiˈra dandaanno? Yesuusi togo yiino: “Konne coye kuloommoˈnehu hagiirriˈya giddoˈne heeˈranno gedeetinna kiˈne hagiirrino woˈma ikkanno gedeeti.” (Yoh. 15:11) Tini hagiirrinke lexxanno gede assiˈra dandiineemmota dileellishshanno? Hagiirrinke lexxanno gede assiˈra, giira roore bubbanno gede haqqe worate gedeeti. Giira iibbitanno gede haqqe wora hasiissanno. Hatteente gede, hagiirrikki lexxara hasiˈrittoro ayyaanaamittete sagale sagaˈla hasiissannohe. Qullaawu ayyaani hagiirre afiˈratto gede kaaˈlannoheta deˈooti. Konni daafira, Yihowa qullaawa ayyaana aannohe gede xaˈmirattohanna qullaawu ayyaanisinni borreessinoonni Qaalesi huuccatto assidhe hiincattoha ikkiro, hagiirraamo ikka dandaatto.—Far. 1:1, 2; Luq. 11:13.

Yihowa hagiirsiisannore ganyite assattoha ikkiro, hagiirrikki lexxanno. (Far. 35:27; 112:1) Togo yineemmohu mayiraati? Korkaatuno ninke kalaqammoommohu ‘Magano waajjateetinna hajajosi agadhateeti;’ qoleno “kuni mannu woˈmunkura hasiisannoho.” (Ros. 12:13) Wole yaattonni, kalaqammoommohu Maganu fajjo wonshateeti. Konni daafira, Yihowara soqqammeemmoha ikkiro, heeshshonkenni hagiirraamma ikka dandiineemmo. *

Heeshshonkenni hagiirraamma ikkinummoro, wole horono afiˈneemmo. Baxi qarri iillinkerono iimi Anninkera hagiirrunni soqqammeemmoha ikkiro, Isi hagiidhanno. (Mar. 16:15; 1 Tes. 5:16-18) Hagiirraamma ikkinummoro, uminke horo agurre Maganu Mangiste balaxisiinseemmo. (Mat. 13:44) Togo assanke qolte hagiirrinke lexxanno gede, uminkera ayirrinyu heeˈrannonke gede, hattono woloota hagiirsiinseemmo gede kaaˈlitannonke.—Soq. 20:35; Fil. 1:3-5.

Ameerikaho Nibiraska yinanni yuniversite xiinxallaanchi, “Xa heeshshokkinni hagiirraamo ikkittoro, albillitte roore fayyimma afiˈratto” yee borreessino. Qullaawu Maxaafino “Hagiirraamu wodani mannimmate fayyimma aanno” yaanno. (Law. 17:22) Ee, hagiirrikki lexxanni haˈranno wote, fayyimmakkino woyyaabbanno.

Konni daafira, heeˈnoommohu qarru woˈmino alame giddo ikkirono, huuccattotenni, hattono Maganu Qaale xiinxallatenninna hiincatenni qullaawa ayyaana afiˈnummoro hagiirraamma ikka dandiineemmo. Qoleno xa afiˈnoommo atoote hiincineemmoha, dancha lawishsha ikkitinonkeri faale haˈneemmohanna Maganu fajjo assineemmoha ikkiro hagiirrinke lexxanno. Togo assinummoro “Keeraanchoho Maganunni tashshi yoosi; isono golosi assiro” yitannoti Faarso 64:10 aana noo hedo adda ikkitinota uminke heeshshonni wodanchineemmo.