MINAANNI woy minaama ammanama hoogase lowo geeshsha xissiissanno. Mitu minaannuwi woy minaamuwi huninohu maaro eꞌꞌeenna gatona yite jaaloomansa haaroonsiꞌrate maahoyye yitino. a Ikkollana, galte ammanantinokki minaanni woy minaama galtensa diigirono diiga hoogirono, lowo geeshsha xissiisiꞌransa digattanno. Ikkina xissonsa cince heeꞌra dandaannohu hiittoonniiti?

Batinyu manni galtensa ammanama hooggino daafira wodaninsa lowo geeshsha dadillinoha ikkirono, Qullaawu Maxaafinni shesho afiꞌra dandiino. Insa Maganu hindiiddonsa laꞌꞌannotanna xissonsa huwatannota wodanchitino.—Milkiyaasi 2:13-16.

“Yaaddonna dadillu amadie yannara, sheshifachishshe, hagiirsiisoottoe.”—Faarso 94:19.

Biili togo yiino: “Konne qummeeshsha nabbawummoti, Yihowa shaqqadu anni gede sheshifachishanni nooeta huwatummo.”

“Kaaliiqa, ati ammanamino manchira, [ammanamoottoho].”—Faarso 18:25.

Kaarmeni minaannino lowo agana isera diammanamino; ise togo yitino: “Minaanniꞌya anera diammanamino. Yihowa kayinni woꞌmanka woyite ammanaminoha ikkinota dihuluullameemma. Isi horo diꞌꞌirraawisannoe.”

“Baalunku coyira galaxxitinanninna huuccidhinanni hasidhinoonni coye Maganoho kuꞌle ikkinnina, mittu coyirano yaaddinoonte. Mannu hedora aleenni ikkinohu Maganu keeri, Kiristoosi Yesuusinni wodanaꞌnenna hedoꞌne agaranno.”—Filiphisiyusi Sokka 4:6, 7.

Saasha togo yitino: “Konne qummeeshsha marro marro hige nabbawoomma. Marro marro hige huucciꞌreemma woyite, Maganu giddiidi keere aannoe.”

Aleenni qummi assiniri baalunku hexxo mudhitino woyiti no. Ikkirono insa Yihowa addaxxitino, hattono Qaalesi nabbabbe jawaante afidhino. Biili togo yiino: “Kade amadeemmori bainoe yannara, ammanaꞌya heeshshoꞌya waagu noota ikkitanno gede assitinoe. Mite yanna geeshsha ‘reyo lawanno tunsichi giddoonni hige’ saoommoha ikkirono, Maganu ledoꞌya no.”—Faarso 23:4.