Hundinni kayise, babbaxxino qooxeessira lophinohunna addi addi budi noonsahu batinyu manni Qullaawu Maxaafi kulanno halaali addaxxinanniha ikkinota ammananno. Yannankera, lowo miliyoone ikkanno manni Qullaawu Maxaafi rosi garinni heeꞌranno. Mitootu kayinni, ‘Qullaawu Maxaafi yannankera kaaꞌlannori dino, hattono qalote borrooti’ yitanno. Atera maa lawannohe? Qullaawu Maxaafi kulannori halaaleho?

Qullaawu Maxaafi kulannori halaale ikkinota mayinni anfeemmo? Hanni mitto lawishsha laꞌno. Mittu lowo diro egenninoommo jaalinke woꞌmante yannara halaale coyiꞌrannoha ikkiro, iso ammanneemmoti egennantinote. Ikkina Qullaawu Maxaafi hakko jaali gede ammannanni maxaafa ikkino? Hanni mite lawishshuwa laꞌno.

Ammanantino Borreessaano

Qullaawa Maxaafa borreessitinori ammanantinoreeti; insa laanfensanna soꞌronsa nafa maaxxukkinni borreessitino. Lawishshaho, masaalaanchu Yoonaasi Yihowara hajajaminokki woyiti noota borreessino. (Yoonaasi 1:1-3) Qoleno, isi maxaafisi jeefora Yihowa seejjinosita borreessino; ikkollana hedosi biddi assiꞌrino gara borreesse isonooto diseekkiꞌrino. (Yoonaasi 4:1, 4, 10, 11) Baalanti Qullaawu Maxaafi borreessaano ammanantinore ikkansa, halaale lowo geeshsha baxxannota leellishshanno.

Kaaꞌlitanno Amaale

Qullaawu Maxaafi aannonke amaale woꞌmante yannara kaaꞌlitanno? Ee kaaꞌlitanno. Lawishshaho, Qullaawu Maxaafi mannu ledo dancha aante kalaqiꞌra dandiinanni gara kulanno. Togo yaano: “Mannu kiꞌnera assaꞌnera hasidhinannire baala kiꞌneno insara assensa!” (Maatewoosi 7:12) “Shaqqadu arrawi hanqo qiissanno; kaajjadu qaali kayinni hanqo kakkayisanno.” (Lawishsha 15:1) Addanko, Qullaawu Maxaafi amaale hundano ikko yannankera kaaꞌlitannote.

 Halaalaancho Xagge

Batinye arkiyolojete xiinxallo, Qullaawu Maxaafi giddo kulloonnihu babbaxxino manni, bayichinna ikkito halaale ikkitinota buuxissino. Lawishshaho, hanni Qullaawu Maxaafi giddo kulloonnita mitte harancho hedo laꞌno. Qullaawu Maxaafi Nehimiya waro Yerusaalamete heeꞌrannohu Xiroosi gobba manni (Xiroosi gobbanni dayinohu Finqe manni) “qulxuꞌmenna addi addi uduunne” abbe hirannota kulanno.—Nehimiya 13:16.

Kuni qummeeshshi kulannori halaale ikkinota leellishshanno taje no? Ee no. Arkiyolojete xiinxallaano, Israeelete gobbara Finqe gobbanni abbinoonni uduunne affino; tini, lamenti daga mimmituwiinni uduunne hidhitannota leellishshanno. Qoleno, Yerusaalamete katami giddo Mediteraaniyu Baari qulxuꞌme miqqa umme fushshinoonni. Arkiyolojete xiinxallaano, kuri qulxuꞌme daddalaano xeerto gobbara noo baari qaccenni abbitinota ammantanno. Mittu fullahaanchi tenne taje xiinxalli gedensaanni togo yiino: “Xiroosi gobba manni Yerusaalamete qulxuꞌme hirannota kultannoti Nehimiya 13:16 noo hedo gara labbanno.”

Sayinsete Ledo Sumuu Yaanno Halaale

Qullaawu Maxaafi roore anga ammaꞌnote daafiranna xagge kulanno maxaafaati. Ikkirono, sayinsete ledo xaadooshshe afiꞌrinore kulanno woyite, addu sayinse ledo sumuu yaanno. Hanni mitto lawishsha laꞌno.

Mitu 3,500 diri albaanni, Qullaawu Maxaafi giddo ‘baatto mulla darga rarraꞌinota’ kulloonni. (Iyyoobi 26:7) Ikkollana, hatte yannara mannu baatto wayi duhe no woy baatto jawu quci aana no yee ammananno. Iyyoobi maxaafa borreessinihunni 1,100 meddi yaanno diri gedensaanni nafa mannu uulla mitturi tuuqinori nookkiha mulla darga rarraꞌara didandiitanno yee hedanno. Uulla mulla darga rarraꞌinota buunxoonnihu, 300 diri albaanni yaano Ayizaaki Niwuteni 1687nni uullate goshoonshe daafira xiinxallino borro attamminna uulla doyichosera heedhanno gede assitinoti illete leeltannokki wolqa noota xawisi yannaraati. Tini sayinsete xiinxallo, Qullaawu Maxaafi giddo 3,000 diri albaanni borreessinoonniri halaale ikkinota leellishshanno.