Mittu manchi akatta anfanni haꞌnummo kiiro, isi ledo noonke jaaloomi kaajjanno. Hatteente gede, Yihowa akatta daafira ronsanni haꞌnummo kiiro isi ledo noonke jaaloomi kaajjanno. Maganoho duucha dhagge ikkitanno akatta noosi; ikkollana kuri giddo luphi yite leeltannoti shoolete; insano: wolqasiiti, hayyosiiti, taashshosiitinna baxillesiiti.

“Kaaliiqa Mootichaꞌya! Ati jawa wolqakkinninna jawaata cigilekkinni gordonna baatto kalaqootto.”—ERMIYAASI 32:17.

Maganu kalaqinori wolqasi leellishanno. Lawishshaho, arro gobbara fulatto woyite mayi macciishshamannohe? Arrishshote iibbilli bisokki ganannoheti macciishshantannohe. Kuni iibbilli Yihowa wolqanni kalaqaminoho. Arrishsho mageeshshi wolqa afidhinoro afootto? Arrishshote mudukki iibbilli mite 15,000,000 Digiri Selsheese ikkanno yine hendanni. Wayi hufannohu 100 Digiri Selsheesenniiti; hatto yaa arrishshote mudukki, hufino wayinni mite 150,000 ero iibbanno yaate. Mittu sokondi giddo calla arrishshote giddonni fultanno wolqa, lowo xibbe miliyoone ikkannohu nukileerete bombi afiꞌrino wolqa ledo taalote.

Ikkollana arrishsho kalqete alamera noote lowo biliyoone ikkitanno beeddahe giddo mitete ledo heewisiinsiro geeshsha ajjanno. Sayinsete fullahaano, Wii Iskuuti yinanniti mitte jawa beeddakko arrishshote halaꞌlinyinni 1,700 ero ikkitanno yite heddanno. Tini beeddakko xa arrishsho noo basera  heedhoommero, halaꞌlinyise uullatewiinni sae Juppiiteri yinanni pilaaneete heedhanno doyicho geeshsha iillanno. Tenne afanke, Ermiyaasi Maganu Yihowa iimanna uulla yaano kalqete alame bayira wolqasinni kalaqinota coyiꞌrinohu mayiraatiro huwatate kaaꞌlitannonke.

Maganu wolqa kaaꞌlitannonkehu hiittoonniiti? Maganu kalaqinori heeshshotenni heeꞌrate kaaꞌlannonke; lawishshaho arrishshono ikko uullate aana nooti wole kalaqamu jiro hooggoommero mannu ooso heeshshotenni heeꞌra didandiitanno. Qoleno Maganu wolqasi mitto mittonka mancho kaaꞌlate horoonsiꞌranno. Hiittoonni? Umi xibbi diro Maganu Yesuusira wolqa oye maalale loosanno gede assino. Qullaawu Maxaafi togo yaanno: ‘Illiweelootu laꞌanni, naafootu uurrite hadhanni, dhiigaammu keeraabbanni, macciweelootu affanninna reyitinori kaꞌanni no.’ (Maatewoosi 11:5) Yannankerana? Maganu Qaali “Isi [Yihowa] daafurtinorira jawaante aanno,” hattono “iso hexxitannorira wolqansa haaroonsanno” yaanno. (Isayaasi 40:29, 31) Maganu heeshshonke giddo iillannonke fonqolonna qarra dandee heeꞌrate kaaꞌlitannonketa “jawa wolqa” aannonke. (2 Qorontoosi 4:7) Ikkina taalle nookki wolqasi horoonsiꞌre baxillunni kaaꞌlannonke Maganiwa shiqqi yaa dihasiꞌratto?

“Kaaliiqa, ati lowore kalaqootto; baalanka ogimmakkinni [hayyokkinni] seekkootto.”—FAARSO 104:24.

Maganu kalaqinore roore xiinxallineemmo woyite, hayyosi dhagge assiꞌneemmo. Isinni fullahaano, Yihowa kalaqinore xiinxallite konni albaanni loossinore woyyeessite loosate, Bayomimetiksi woy Bayomimikirii yinanni xiinxallo xiinxallitanno. Sayinsete fullahaano kalaqama laꞌe shiimmaadda biloonnanni kayisse horophilla loossino.

Ikkollana mannu bisi geeshsha Maganu hayyo leellishannohu wolu kalaqami dino yaa dandiinanni. Hanni mittu muru qaaqqi amasi godowi giddo lophanno gara hedi. Lopho hanaffannohu baalanta mashalaqqe amaddinote mitte batidhanni hadhanno seelenniiti. Tini seele bebbeehante batinye hattoo seele kalaqantanno gede assitanno. Ikkollana hasiissanno yannara tini seele babbaxxa hanaffanno; tenne yannara lowo xibbe ikkitannoti babbaxxitino seella lawishshaho mundeete seella, nervete seellanna miqqate seella kalaqantanno. Shima yanna gedensaanni tenne seellanni loosantinoti bisu kifilla mitteenni loosa hanaffanno. Honsu agani giddo calla, umiti mitte seele batidhe lowo biliyoone ikkitanno seella afiꞌrino qaaqqo ikkitanno. Batinyu manni tenne hayyo wodanchanno woyite mittu Qullaawu Maxaafi borreessaanchi gede, “Dhaggennihanna maalaꞌlinanniha assite kalaqoottoena, galaxxeemmohe” yee coyiꞌranno.—Faarso 139:14.

Maganu hayyo kaaꞌlitannonkehu hiittoonniiti? Kalaqaanchinke hagiirraamma ikkineemmo gede assannonkeri maatiro afino. Taalle nookki egennonna wodancha noosi daafira, Qaalisi Qullaawu Maxaafi widoonni hayyote amaale aankera dandaanno. Lawishshaho isi “Kiꞌne kiꞌneneewa koffi yitinoonni coye baala cincatenni agurre” yee amaalinonke. (Qolasiyaasi Sokka 3:13) Tini amaale hayyo  amaddinote yaa dandiinanni? Xiinxallaano wolootaho gatona yaa, coommino goxicho goxatenna mundee huffannokki gede assitannota coyidhanno. Qoleno hatto assa quwa saꞌne yaandannikkinna wolu fayyimmate qarri giddo umbannikki gede kaaꞌlitanno. Maganu woꞌmante yannara dancha amaale aanohu baxillaanchu jaali gedeeti. (2 Ximootewoosi 3:16, 17) Ikkina togoo jaali heeꞌrahera dihasiꞌratto?

“Kaaliiqi halaale [woy, taashsho] baxanno.”—FAARSO 37:28.

Maganu woꞌmante yannara gara ikkinore calla assanno. Isinni “Woꞌmanka Dandaanno Magani, horontanni busha coye diassanno.” (Iyyoobi 34:10) Ermiyaasi Yihowa daafira coyiꞌranni, “halaale coyiꞌrattohu ateeti” yiino; konni daafira Isi woꞌmante yannara halaalaancho yoo yaannoho. (Ermiyaasi 11:20) Yihowa ‘wodana laꞌꞌanno’ daafira, mannu dogasira didandaanno; isi aye woyiteno halaale afanna garu yoo yaa dandaanno. (1 Saamueeli 16:7) Qoleno Maganu uullate assinannita miiconna amanyootu maaeelle baala seekke afino; qoleno muli yanna giddo bushuulle “baattote aaninni haare hooleemmo” yee qaale eino.—Lawishsha 2:22.

Ikkollana Maganu soꞌro loonsummo kiiro qorichishannonkeha kaajjado daanya diꞌꞌikkino. Isi hasiisannoha ikkiro maarannonke. Qullaawu Maxaafi, Yihowa maaro eꞌu geeshsha bushuulleho nafa ‘mararannonsatanna gatona yaannonsata’ kulanno. Tini halaalaancho taashsho diꞌꞌikkitino?—Faarso 103:8; 2 Pheexiroosi 3:9.

Yihowa taashsho kaaꞌlitannonkehu hiittoonniiti? Soqqamaasinchu Pheexiroosi togo yiino: ‘Maganu aye gosano ikkiro waajjannosihanna dancha loosannoha baxanno.’ (Soqqamaasinete Looso 10:34, 35) Maganu mallaadannokkiha ikkasi duucha doogonni kaaꞌlitannonke. Sirchinke, gobbanke, rosu deerrinke, woy dagoomu giddo noonke ayirrinyi ikkihano ikkiro Yihowa jaalla ikka dandiineemmo.

Maganu taashshosi wodanchine hakko garinni heeꞌneemmo gede tiia uyinonke. Qullaawu Maxaafi tiiu assootinke garaho woy soꞌrote yee kulannonkeha ‘wodaninke giddo borreessinoonni’ seeri gede ikkinota kulanno. (Roomu Sokka 2:15) Tiiu kaaꞌlannonkehu  hiittoonniiti? Tiiꞌꞌinke qajeelinoha ikkiro, gawajjanno woy taashsho xeꞌino assootiwiinni xeertiꞌneemmo gede assannonke. Soꞌro loonseemmo woyite kayinni, maaro eꞌne doogonke biddi assiꞌneemmo gede xixxiiwannonke. Addaho, Maganoho taashshote noosi lao afanke kaaꞌlitannonke, hattono isiwa shinqeemmo gede assitannonke!

“Maganu baxilleho.”—1 YOHAANNISI 4:8.

Maganu wolqaataamo, hayichanna taashshannoha ikkirono, Qullaawu Maxaafi Maganu wolqate, hayyote woy taashshote diyaanno. Maganu baxilleho kayi yaanno. Mayira? Korkaatuno Maganu wolqa isi hasiꞌrinore assa dandaanno gede assitannosi; taashshosinna hayyosi mitto coye assanno doogo massaggannosi. Ikkollana, Yihowa mitto coye assanno gede kakkayisannosihu baxilleho. Maganu baalankare assannohu baxillunni kaeeti.

Yihowa xeinosiri nookkiha ikkirono, baxillunni kae iimano ikko uulla hedate dandoo noonsare kalaqino; kuri kalaqami isi baxillinninna towaanyonni horo afiꞌra dandiitanno. Qoleno Maganu shaqqillunni kae uulla mannu oosora injiitanno qae asse kalaqino. Hattono “Isi bushuullehonna danchuulleho arrishsho fushshanno; keeraanotenna cubbaataammaho xeena gananno.”—Maatewoosi 5:45.

Qoleno Yihowa ‘sao agurannohonna mararannoho.’ (Yaiqoobi 5:11) Suwashshu wodaninni kaꞌe iso afatenna isiwa shiqqi yaate sharrantannorira baxille leellishannonsa. Maganu togoo mannira hedanno. Isinni Qullaawu Maxaafi Yihowa “kiꞌnere malanno” yaanno.—1 Pheexiroosi 5:7.

Maganu baxilli kaaꞌlannonkehu hiittoonniiti? Arrishsho eꞌanna laꞌneemmo woyite giddonke hagiidhitanno. Shiimmaaddu qaaqquulli osolo macciishshano hagiirsiissannonke. Maatenke miilla leellishshannonke baxillino tashshi assannonke. Kuri coyibba heeshshotenni heeꞌrate hasiissannota ikka hooggurono, heeshshonke hagiirru noota ikkitanno gede assitanno.

Qoleno Maganu baxillunni uyinonketi huuccattote qoossono kaaꞌlitannonke. Qullaawu Maxaafi togo yee amaalannonke: “Baalunku coyiꞌra galaxxitinanninna huuccidhinanni hasidhinoonni coye Maganoho kuꞌle ikkinnina, mittu coyiꞌrano yaaddinoonte.” Baxillaanchu Anni gede, Yihowa kaaꞌlankera hasiꞌranno; yaachishinonkere wole agurina mannaho hasaapha hasiꞌneemmokkire nafa isira hasaaphineemmo gede koyisinonke. Hatto assinummoro, Yihowa baxillunni kae “mannu hedora aleenni ikkinoha Maganu keere” aankera qaale eino.—Filiphisiyusi Sokka 4:6, 7.

Maganunnite qara qara akatta yaano wolqasi, hayyosi, taashshosinna baxillisi daafira xawinsoonnihu haranchu xawishshi, isi akatta daafira roore afatto gede dikaaꞌlinohe? Maganu daafira noohe egenno lexxitanno gede, Maganu konni albaanni assinorenna albillitte assannore nabbawattora koyinsoommohe.