ROSO 6
Reyino Mannira Mayi Hexxo Noonsa?
1. Reyino mannira noo hexxo kulannohu danchu duduwi hiikkonneeti?
Yesuusi Yerusaalamete mule Biitaaniya yinanni qacha mari woyite, jaalisi Alaazaari reyinku shoole barra ikkino. Yesuusi Maartanna Maariyaami yinanniri Alaazaari roduuwi ledo waammate base mari. Hakkawontenni lowo manni gamba yii. Yesuusi Alaazaari reyotenni kayisita Maartanna Maariyaami mageeshsha hagiidhinoro hanni hedi!—Yohaannisi 11:21-24, 38-44 nabbawi.
Maarta reyino mannira noo hexxo wonanni affe no. Ise Yihowa reyino manna kayise uullate aana galagale heeꞌranno gede assannota affino.—Iyyoobi 14:14, 15 nabbawi.
2. Reyino manni hiikke no?
Maganu Addaami togo yiino: “Bushsha ikkootto daafira, bushsha higatto.”—KALAQO 3:19.
Mannu kalaqaminohu bushshunniiti. (Kalaqo 2:7; 3:19) Ninke mannu ooso, maala uddidhino ayyaanna diꞌꞌikkinoommo. Ninke woꞌmunni woꞌma maalu kalaqooti; konni daafira reyineemmo woyite reyikki gatannori giddonke dino. Reyineemmo woyite surrenkeno reyitanno; hattono hedonke baala baꞌanno. Reyino manni mittoreno afannokki daafira, Alaazaarino reye noommo yannara afoommoreeti yee kulinori dino. —Faarso 146:4; Mekibibi 9:5, 6, 10 nabbawi.
Maganu manna reyi gedensaanni giiratenni giirannoni? Qullaawu Maxaafi reyino manni mittoreno afannokkita kulanno daafira, sioolete giira no yaa Maganu suꞌma hunannoho kaphu rosooti. Maganu manna giira agurina hattoore heda nafa effire giwanno.—Ermiyaasi 7:31 nabbawi.
Mannu Reyanno Woyite Hiikkanno? yitanno viidiyo lai.
3. Reyino manni ninke coyishiishe afanno?
Reyino manni coyiꞌrano ikko macciishsha didandaanno. (Faarso 115:17) Ikkollana, mite sokkaano bushuulle ikkitino daafira, lubbote noore coyishiishano ikko reyino manna labbe daa dandiitanno. (2 Pheexiroosi 2:4) Yihowa reyino manna coyishiishate woꞌnaallannita effire giwanno.—Marro 18:10, 11 nabbawi.
4. Reyotenni kaꞌꞌannohu hiittoo mannaati?
Xa reye waammate giddo noohu lowo miliyoone ikkanno manni uullate aana reyotenni kaꞌꞌanno. Wole agurina Magano affinokkirinna albaanni bunshe assitanni heedhinori nafa kaꞌanno.—Luqaasi 23:43; Soqqamaanote Looso 24:15 nabbawi.
Reyotenni kaꞌꞌanno manni Maganunnire halaale rosanno, hattono Yesuusa ammanannota isira hajajame leellishanno. (Ajuuja 20:11-13) Reyotenni kaꞌe danchare assitannori uullate aana hegerera hagiidhitanni heedhanno.—Yohaannisi 5:28, 29 nabbawi.
5. Kao Yihowa hiittoo Magano ikkinota leellishshanno?
Maganu Beettosi ninkera reyanno gede soye, reyino mannira hexxo heedhanno gede assino. Konni daafira kao Yihowa baxillaanchonna shaqqado Magano ikkinota leellishshanno. Reyino manni kaꞌꞌanno woyite, ati roorenka ayenni xaada halchatto?—Yohaannisi 3:16; Roomu Sokka 6:23 nabbawi.
