ROSO 49
Maate Hagiirru Noota Assiꞌra Dandaatto Gara—Gafa 1
Haarote adhamino minaanninna minaama, sargensa barra hagiidhino hagiirri hegerera geedanno yee hexxanno. Addanko geedara dandaanno. Adhame lowo diro keeshshinohunna Qullaawu Maxaafi amaale garinni heeꞌrate sharramanno Kiristaani kuni dandaamannore ikkinota afino.
1. Qullaawu Maxaafi minaanna mayyee amaalanno?
Yihowa minaanna maatete umo asse shoomino. (Efesooni Sokka 5:23 nabbawi.) Yihowa minaanni albisa ikke maatete kaaꞌlannore assara hasiꞌranno. Qullaawu Maxaafi minaannuwa, “Mini amuuwaꞌne . . . baxxe” yee amaalanno. (Efesooni Sokka 5:25) Hatto yaa mayyaate? Minaamasi baxanno minaanni, lamunku calla noo woyiteno ikko mannu ledo noo woyite minaamasi shaqqillunni amadanno. Qoleno gawajjannose coyiwiinni agarannose hattono hasiisannosere wonshannose. (1 Ximootewoosi 5:8) Roorenkanni kayinni, ayyaanaamittete hasiisannosere assannose. (Maatewoosi 4:4) Lawishshaho, minaamasi ledo huuccatto assiꞌranna Qullaawa Maxaafa nabbawa dandaanno. Minaanni minaamasi baxillunni towaatannoha ikkiro, Yihowa ledo noosi jaaloomi kaajje heeꞌranno.—1 Pheexiroosi 3:7 nabbawi.
2. Qullaawu Maxaafi minaama mayyee amaalanno?
Maganu Qaali “[Galte] minaannase ayirrisso” yaanno. (Efesooni Sokka 5:33) Ise tenne assa dandiitannohu hiittoonniiti? Minaanniseha dancha akatanna isenna oosonsa towaatate assannore heda dandiitanno. Qoleno isi assannorira kaaꞌlamanna ammaninoha ikka hoogiro nafa shaqqillunni coyishiisha hattono isi daafira dancha danchare coyiꞌra dandiitanno.
3. Minaanninna minaama adhamansa kaajjishiꞌra dandaannohu hiittoonniiti?
Qullaawu Maxaafi minaanninna minaama daafira kulanni, “Lamunku mitto biso ikkanno” yaanno. (Maatewoosi 19:5) Hatto yaa, godowa xeertiꞌranno gede assannonsaha aye coyeno gargadha hasiissannonsa yaate. Tenne assate ganye mitteenni yanna sayisa, hattono baxillunninna faajjete giddonsata fushshe mimmitoho hasaapha hasiissannonsa. Yihowa agurranna, aye manchono woy aye coyeno galtensanni roorsiꞌra dihasiissannonsa. Roorenkanni, aye manchi ledono deerra saino jaalooma kalaqiꞌrannokki gede qoropha hasiissannonsa.
LEDDE XIINXALLI
Adhanna adhamaꞌne kaajjitanno gede kaaꞌlannoꞌneha Qullaawu Maxaafiha xintu seera wodanchi.
4. Minaannuwa, minaamuwaꞌne baxxensa hattono seekkitine towaattensa
Qullaawu Maxaafi minaannuwu “uminsa manninate baxxanno garinni, mininsa amuuwano baxa hasiissannonsa” yaanno. (Efesooni Sokka 5:28, 29) Hatto yaa mayyaate? VIIDIYO laꞌe; hakkiinni aante noo xaꞌmo hasaabbe.
-
Minaanni minaamasi baxannotanna ise daafira hedannota leellisha dandaannoti mite doogga hiikkuriiti?
Qolasiyaasi Sokka 3:12 nabbabbe; hakkiinni tenne xaꞌmo hasaabbe:
-
Minaanni minaamasira kuri akatta leellisha dandaannohu hiittoonniiti?
5. Minaamuwa, minaannaꞌne baxxe hattono ayirrisse
Qullaawu Maxaafi, minaama minaannise Yihowa magansiꞌrannoha ikkirono ikka hoogirono ayirrissannosi gede amaalanno. Umi Pheexiroosi 3:1, 2 nabbabbe; hakkiinni tenne xaꞌmuwa hasaabbe:
-
Minaannikki ammaninokkiha ikkiro, Yihowa magansiꞌrannoha ikkara hasiꞌrattati egennantinote. Iso kaaꞌla dandaattati woyyitino doogo hiitteeti? Hashshe soodi kiiro isira sabbakittaro woyyannonso, shaqqado, danchanna ayirrisatta minaama ikkittasiro roorannoha lawannohe? Mayira?
Minaanninna minaama mitto coye mitteenni sumuu yee assiro danchaho. Mito woyite kayinni minaama minaannise yiinorira sumuu yaa hooggara dandiitanno. Hatto ikkiro, hedose shaqqillunninna ayirrinyunni kula dandiitanno; ikkollana Yihowa maatete woyyannore muranno gede silxaane minaannisera uyinota huwata hasiissannose. Hakko daafira, minaannise murinori seyanno gede kaaꞌlama hasiissannose. Hatto assituro, maatensa woꞌma hagiirru noota ikkitanno gede kaaꞌlitanno. Umi Pheexiroosi 3:3-5 nabbabbe; hakkiinni tenne xaꞌmo hasaabbe:
-
Minaama minaannase ayirrissannota leellishshanno woyite Yihowara mayi macciishshamannosi?
6. Adhamaꞌne mereero kalaqamanno qarra qeela dandiitinanni
Guuta ikkitino adhama dino. Hakko daafira, minaanninna minaama kalaqamanno qarra qeelate kaaꞌlame loosa hasiissannonsa. VIIDIYO laꞌe; hakkiinni aante noo xaꞌmuwa hasaabbe.
-
Viidiyote giddo, minaanninna minaama godowa xeertiꞌranni haꞌranni noota leellishannori maati?
-
Insa adhamansa kaajjishiꞌrate maa assino?
Umi Qorontoosi 10:24 nna Qolasiyaasi Sokka 3:13 nabbabbe. Mitto mittonka qummeeshsha nabbabbinihu gedensaanni, tenne xaꞌmo hasaabbe:
-
Tenne amaale harunsa, adhama kaajjitanno gede kaaꞌlitannohu hiittoonniiti?
Qullaawu Maxaafi mimmito ayirrisa hasiissannonketa kulanno. Mitto mancho ayirrinseemmosiha ikkiro, shaqqilleno leellinsheemmosi. Roomu Sokka 12:10 nabbabbe; hakkiinni kuri xaꞌmuwa hasaabbe:
-
Minaanni woy minaama galtensa ayirrissansa geeshsha agadha hasiissannonsa? Mayira?
MITU MANNI TOGO YAANNO: “Aninna minaamaꞌya xa albi geeshsha dibaxammeemmo.”
-
Qullaawu Maxaafi kaaꞌlansara dandaannota ma garinni kulattonsara dandaatto?
XAPHISHSHA
Minaanninna minaama mimmito baxannoha, mimmito ayirrisannohanna Qullaawu Maxaafi biddishsha harunsannoha ikkiro hagiirraamma ikka dandaanno.
Kageeshsha Rosoottore
-
Minaanni maate hagiirru noota ikkitanno gede kaaꞌla dandaannohu hiittoonniiti?
-
Minaama maate hagiirru noota ikkitanno gede kaaꞌla dandiitannohu hiittoonniiti?
-
Mine kalaqiꞌroottoha ikkiro, adhamaꞌne kaajjishiꞌrate kaaꞌlaꞌnera dandaannohu Qullaawu Maxaafihu xintu seeri hiikkoyeti?
EGENNO LEXXI
Maateꞌne hagiirru noota ikkitanno gede kaaꞌlitannoꞌne amaale xiinxalli.
Maatete giddo Maganu amaale harunsiniro afiꞌnanni atoote leellishshannota tenne muuziiqu viidiyo lai.
Minaannita umimmate silxaane ayirrisate yaa mayyaatero xiinxalli.
Mittu minaanninna minaama adhamansa diigate geeshsha iillishinonsaha jawa qarra qeele sainohu hiittoonniiti?
Kurino Lai
DUUCHU MANNI XAꞌMANNO XAꞌMO
Yihowa Farciꞌraasine Qullaawa Maxaafa Xiinxallissannohu Hiittoonniiti?
Yihowa Farciꞌraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiꞌra dandaatto. Xiinxallokkira maatekki gudisse woy jaallakki koyisa dandaatto.
