ROSO 44
Baalanti Ayyaanna Magano Hagiirsiissanno?
Yihowa heeshshonkenni hagiidhinammora hasiꞌranno; hagiirsiisannonke coyi giddo mittu maatenkenna fiixinke ledo mitteenni hagiidhineemmo yannaati. Ikkina baalanti ayyaanna Magano hagiirsiissanno? Tenne hajo lainohunni Yihowa banxeemmota leellisha dandiineemmohu hiittoonniiti?
1. Batinye ayyaanna Yihowa dadillissannota ikkitinohu mayiraati?
Batinye ayyaanna Qullaawu Maxaafi ledo sumuu yaannokki rosi aana xintantinotanna Magano affinokki dagawiinni dagginota huwatatto woyite dhagge ikkahera dandaanno. Togoo ayyaanna kaphu ammaꞌno ledo xaadooshshe afidhinota ikkitara dandiitanno. Sheexaanu loosi ledo xaadooshshe afidhinota woy lubbo direyitanno yine rosiinsanni rosi aana xintantinota ikkitara dandiitanno. Mite ayyaanna haafa ammana aana xintantinota woy kaayyo layiꞌrate ledo xaadooshshe afidhinota ikkitara dandiitanno. (Isayaasi 65:11) Yihowa soqqamaasinesi togo yee qorowisiisino: “Giddonsanni fultine, baxxitinoonnire ikke. Batte ikkinoricho kissinoonte.”—2 Qorontoosi 6:17. a
2. Mannaho hasiisannokki ayirrinye aate ayirrinsanni ayyaanna daafira Yihowara mayi macciishshamannosi?
Yihowa ‘mannu wolqa hexxineemmokki’ gede qorowisiisinonke. (Ermiyaasi 17:5 nabbawi.) Mite ayyaanna ayirrinsannihu gashshaasine woy gaadaasine guwisateeti. Mitootu gobbansa malaatira lawishshaho baandiiraho ayirrinye aate ayyaana ayirrissanno; hattono wolaphitino barra ayirrissanno. (1 Yohaannisi 5:21) Mite ayyaanna ayirrinsannihu kayinni poletikunna dagoomu uurrinshuwara ayirrinye aateeti. Mannaho woy dirijjitete, hakko iso Yihowa hedo ledo sumuu yaannokkire halashshanno manchira woy dirijjitera hasiisannokki ayirrinye uyinummoro Yihowara mayi macciishshamannosi?
3. Mite ayyaanna Magano dadillissanno gede assannohu hiittoo amanyooteeti?
Qullaawu Maxaafi ‘dimbinannitanna sirbinannita [woy jila jille akkimale ikkinannita]’ hoolanno. (1 Pheexiroosi 4:3) Mannu mite ayyaanna ayirrisanno woyite akkimale ikkanno, hattono amanyoote bainore assanno. Yihowa jaalla ikkine heeꞌrate, togoohu bushu amanyootiwiinni xeertiꞌra hasiissannonke.
LEDDE XIINXALLI
Ayyaana ayirrisa lainohunni gara ikkinore doodhite Yihowa hagiirsiisa dandaatto gara xiinxalli.
4. Yihowa hagiirsiissannokki ayyaannawiinni xeertiꞌri
Efesooni Sokka 5:10 nabbabbe; hakkiinni aante noo xaꞌmuwa hasaabbe:
-
Mitto ayyaana ayirrinseemmoronna teꞌee doodhineemmo woyite maa buuxiꞌra hasiissannonke?
-
Kiꞌne qooxeessira batinyu manni ayirrisanno ayyaanna hiikkuriiti?
-
Kuri ayyaanna Yihowa hagiirsiissannoha lawannohe?
Lawishshaho, Maganu ilammoonni barra ayirrinsannita baxannoronna teꞌee hedde egennootto? Qullaawu Maxaafi, Yihowa soqqamaasine giddo ilamino barra ayirrisinohu noota mitto bayichono dikulanno; ikkirono Yihowa magansidhannokkiri lamu mannooti ilantino barra ayirrissinota kulanno. Kalaqama 40:20-22 nna Maatewoosi 14:6-10 nabbabbe. Hakkiinni, tenne xaꞌmuwa hasaabbe:
-
Lamunku mannooti ilantino barra ayirrissu woyite maa assitino?
-
Tenne lamente xaggenni huwanteemmonte gede, ilammoonni barra ayirrisate daafira Yihowara mayi macciishshamannosiha lawannohe?
Ikkollana, ‘Ilammoonni barra woy wole hattoo ayyaanna ayirrisaꞌya woy ayirrisa hoogaꞌya Yihowara hakkeyi geya dhiwanno coyeeti?’ yite hedattoha ikkara dandaanno. Fulo 32:1-8 nabbabbe. Hakkiinni, VIIDIYO laꞌe; hattono aante noo xaꞌmuwa hasaabbe.
-
Yihowa hagiirsiisannori maatiro buuxiꞌra hasiissannonkehu mayiraati?
-
Hatto assa dandiineemmohu hiittoonniiti?
Magano hagiirsiisannokki ayyaana bande afa dandiineemmo gara
-
Kuni ayyaani Qullaawu Maxaafi ledo sumuu yaannokki rosi aana xintaminoho? Tenne badde afate, hakkunni ayyaani kaima xiinxalli.
-
Mannaho, dirijjittate woy gobbate malaatira ayirrinye aate ayirrinsanni ayyaanaati? Wolu baalunkunni roore ayirrinye uyineemmohu Yihowaraati; qoleno alamete qarra tirannohu iso ikkinota addaxxineemmo.
-
Konne ayyaana ayirrinsanni woyite assinanniri Qullaawu Maxaafi seeri ledo sumuu yaannokkireeti? Amanyootunni xuru nookkire ikkine heeꞌra hasiissannonke.
5. Wolootu ammanakki ayirrissanno gede kaaꞌlinsa
Mannu Yihowa hagiirsiissannokki ayyaanna ayirrisatto gede xixxiiwannohe woyite deeꞌni yaa shota ikka hooggara dandiitanno. Ikkirono, ayirrisattokkihu mayiraatiro cincatenninna hayyotenni xawisse kuli. Tenne assa dandiinanni gara leellishanno lawishsha laꞌꞌate, VIIDIYO laꞌe.
Maatewoosi 7:12 nabbabbe; hakkiinni tenne xaꞌmuwa hasaabbe:
-
Kuni qummeeshshi kulanno garinni, Yihowa Farciꞌraasine ikkitinokki maatekki ayyaana ayirrissinoonte yiittoro gara ikkanno?
-
Maatekki ledo ayyaana ayirrisattokkiha ikkirono, baxattonsatanna ayirrisattonsata affanno gede assa dandaattohu hiittoonniiti?
6. Yihowa hagiirraamma ikkinammora hasiꞌranno
Yihowa maatenkenna jaallanke ledo mitteenni hagiidhinammora hasiꞌranno. Rosiisaancho 8:15 nabbabbe; hakkiinni tenne xaꞌmo hasaabbe:
-
Kuni qummeeshshi Yihowa hagiidhinammora hasiꞌrannota leellishannohu hiittoonniiti?
Yihowa mannisi boohaararanna mitteenni dancha yanna sayisara hasiꞌranno. Daga dagiyyote gambooshshinkewa assinanniri tenne leellishanno gara afate, VIIDIYO laꞌe.
Galatiyu Sokka 6:10 nabbabbe; hakkiinni tenne xaꞌmuwa hasaabbe:
-
Mannaho “dancha coye” assate ayyaanna ayirrisa hasiissannonke?
-
Roore hagiirsiissannoheti ayyaanu iillino daafira gidde ikkeennahe aatenso umikki hedde baxitto yannara aate?
-
Batinye Yihowa Farciꞌraasine saꞌe saꞌe oosonsara baxxino coye qixxeessite woy heddinokki yannara mitore uyite hagiirsiissannonsa. Ooso nooheha ikkiro, hiikkonne baxxino coye assattonsara dandaatto?
MITU MANNI TOGO YAANNO: “Ayyaannate kaimi ikkihano ikkiro, qaru coyi maatenkenna jaallanke ledo hagiidhate.”
-
Ati tennera mayyaatto?
XAPHISHSHA
Yihowa maatenkenna jaallanke ledo hagiidhinammora hasiꞌranno. Ikkollana iso hagiirsiissannokki ayyaannawiinni xeertiꞌnammorano hasiꞌranno.
Kageeshsha Rosoottore
-
Mittu ayyaani Yihowa hagiirsiisannokkiha ikkinota bade afate hiikkuri xaꞌmuwa heda hasiissannonke?
-
Maatenkenna jaallanke ayyaanna ayirrinseemmokkihu mayiraatiro huwattanno gede kaaꞌla dandiineemmohu hiittoonniiti?
-
Yihowa hagiidhinammoranna dancha yanna sayinsammora hasiꞌrannota mayinni anfeemmo?
EGENNO LEXXI
Kiristaanu ayirrisannokkiti mite ayyaanna hiikkuriiti?
“Yihowa Farciꞌraasine Mite Ayyaanna Ayirrissannokkihu Mayiraati?” (Webisayitenkera fultino borro)
Ilammoonni barra ayirrisa Magano dadillissanno yineemmo gede assannonkeha shoole korkaata wodanchi.
“Yihowa Farciꞌraasine Ilamate Barra Ayirrissannokkihu Mayiraati?” (Webisayitenkera fultino borro)
Yihowa baxxanno qaaqquulli ayyaanna ayirrinsanni woggara iso hagiirsiisa dandiitanno gara wodanchi.
Lowo miliyoone ikkanno Kiristaani Ganna ayirrisa agurino. Insa doodhitino coyi daafira mayitino?
“Insa Woyyinore Afidhino” (Agarooshshu Shae, Sadaasa 1, 2012)
a Mannu mite ayyaanna ayirrisanno woyite maa assa hasiissannoro afate, Guwuursha 5 lai.
Kurino Lai
DUUCHU MANNI XAꞌMANNO XAꞌMO
Yihowa Farciꞌraasine Qullaawa Maxaafa Xiinxallissannohu Hiittoonniiti?
Yihowa Farciꞌraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiꞌra dandaatto. Xiinxallokkira maatekki gudisse woy jaallakki koyisa dandaatto.
