ඕනම ජාතියකට අයිති කෙනෙක්ගේ යාච්ඤාවලට දෙවියන් සවන් දෙනවා. (ගීතාවලිය 145:18, 19) අපේ හිතේ තියෙන ඕනම දෙයක් ගැන යාච්ඤා කරන්න අපිට පුළුවන්. (ෆිලිප්පි 4:6, 7) හැබැයි පොතක් බලාගෙන හරි කටපාඩමෙන් හරි කරන යාච්ඤාවලට දෙවියන් කැමති නැහැ.—මතෙව් 6:7 කියවන්න.

හිතාමතාම දෙවිගේ නීතිරීති කඩ කරන අයගේ යාච්ඤාවලටත් දෙවියන් සවන් දෙන්නේ නැහැ. (හිතෝපදේශ 28:9) අතීතයේ හිටපු දෙවිගේ සෙනඟ මිනිසුන්ව ඝාතනය කරපු නිසා එයාලගේ යාච්ඤාවලට සවන් දීම දෙවියන් ප්‍රතික්ෂේප කළා. දෙවියන් සවන් දෙන්නේ ඔහුගේ නීති රකින අයගේ යාච්ඤාවලට විතරයි.—යෙසායා 1:15 කියවන්න.

දෙවියන් අපේ යාච්ඤාවලට සවන් දෙන්න නම් ඔහු ගැන විශ්වාසයක් ඇතුව අපි යාච්ඤා කරන්න අවශ්‍යයි. (යාකොබ් 1:5, 6) ඔහු ජීවමාන කෙනෙක් කියලත් අපි ගැන සැලකිලිමත් කියලත් අපිට ස්ථිර විශ්වාසයක් තියෙන්න ඕන. ඒ විශ්වාසය ගොඩනැඟෙන්න ඕන ස්ථිර සාක්ෂි මතයි. ඒකට අපි බයිබලේ තියෙන දේවල් ඉගෙනගන්න අවශ්‍යයි.—හෙබ්‍රෙව් 11:1, 6 කියවන්න.

යාච්ඤා කරද්දී හිතේ තියෙන දේ අවංකව දෙවිට කියන්න ඕන වගේම යටහත් පහත් වෙන්නත් ඕන. යේසුස් යාච්ඤා කළේ එහෙමයි. (ලූක් 22:41, 42) අපිට අවශ්‍ය දේ දෙවියන් ලවා කරගන්න හදනවා වෙනුවට බයිබලේ කියවලා දෙවි අපෙන් බලාපොරොත්තු වෙන්නේ මොනවද කියලා තේරුම් අරන් ඊට එකඟව යාච්ඤා කරන එක වැදගත්.—1 යොහන් 5:14 කියවන්න.