ජෙනී සහ රිචඩ් කියන්නේ වෙහෙස මහන්සි වී වැඩ කරන ප්‍රීතිමත් යුවළක්. ඔවුන්ට අවුරුදු තුනක දඟකාර සුරතල් පුතෙක් සිටිනවා. * ඔවුන් තම දරුවාව ආදරයෙන් රැකබලා ගන්නවා. ඒත් අද අපි ජීවත් වන මේ දුෂ්ට සමාජයේ ඒක එතරම් පහසු කාර්යයක් නෙවෙයි. ඒක ලොකු වගකීමක්. දරුවන්ට බොහෝ දේ ඉගැන්විය යුතුයි. මෙම වගකීම නොපිරිහෙළා ඉටු කිරීමට ජෙනී සහ රිචඩ් දැඩි සේ වෙහෙසෙනවා. ඒ වගේම ඔවුන් විශේෂයෙන්ම සැලකිලිමත් වන දෙයක් තිබෙනවා. ඒ තම දරු පැටියාව ලිංගික අතවරවලින් ආරක්ෂා කරගැනීමයි. ඒත් ඔවුන් ඒ ගැන ඒ තරම්ම සැලකිලිමත් වෙන්නේ ඇයි?

ජෙනී මෙසේ පවසනවා. “මගේ තාත්තා කිසිම හිතක් පපුවක් නැති බීමටත් ඇබ්බැහි වූ කෙනෙක්. ඔහු මට හරියට ගැහුවා. ඔහු මටයි මගේ නංගිලාටයි අතවර කළා.” * මෙවැනි කටුක අද්දැකීම් නිසා ඇති වන මානසික පීඩාව මුළු ජීවිත කාලයටම බලපාන බව කවුරුත් පිළිගන්නවා. එවැනි අද්දැකීමක් තිබෙන ජෙනී වැනි මවක් තම පුතාව ආරක්ෂා කරගැනීමට දැඩි අධිෂ්ඨානයකින් සිටීම පුදුමයක්ද! තම පුතාව ආරක්ෂා කරගත යුතුයි කියා රිචඩ්ටත් හැඟෙනවා.

බොහෝ දෙමාපියන් තම දරුවන්ද එවැනි උවදුරකට ලක් වේදෝ යන බියෙන් සිටිනවා. සමහරවිට ඔබත් එවැනි කෙනෙක් විය හැකියි. නමුත් ඔබ ජෙනී මෙන් ලිංගික අතවරවලට මුහුණ දී නොතිබුණත් අනිවාර්යයෙන්ම එවැනි සිදුවීම් ගැන අසා ඇති. ලොව පුරා සිටින ප්‍රේමණීය දෙමාපියන් තමන්ගේ රටේ දරුවන් මුහුණ දෙන මෙවැනි භයානක දේවල් ගැන දැඩි සේ කම්පාවට පත් වෙනවා.

ළමා ලිංගික අතවර ගැන සොයා බලන එක් පර්යේෂකයෙක් පැවසුවේ ලිංගික අතවර “මේ කාලයේ අපි අද්දකින හද කම්පා කරවන දේවල් අතරින් එකක්” කියායි. මෙය ඉතා කනගාටුදායක දෙයක් වුණත් පුදුමයට කාරණයක්ද? නැහැ. ඊට හේතුව අපි ජීවත් වන්නේ ප්‍රශ්න ගැටලුවලින් පිරුණු බයිබලයේ ‘අන්තිම දවස්’ කියා හඳුන්වන කාලයේයි. මේ කාලයේදී “දරුණු” ලෙස ක්‍රියා කරන අය සිටින බවත් ඔවුන් “තමුන්ටම ප්‍රේම කරන” අය වන අතර “ජන්ම ස්නේහය නැති” අය බවත් බයිබලය ඉගෙනගන්නා අය දන්නවා.—2 තිමෝති 3:1-5.

ලිංගික අතවර අද ලොකු ප්‍රශ්නයක්. දුෂ්ට මිනිසුන්ගේ මෙම ක්‍රියාකලාපය සමහර දෙමාපියන්ව බොහෝ සේ වියවුලට පත් කරනවා. ඒත් දෙමාපියන්ට මෙය විසඳාගත හැකිද? ඒ සඳහා ගත හැකි යම් පියවර තිබෙනවාද? මේ ප්‍රශ්නවලට ඊළඟ ලිපිවලින් පිළිතුරු ලැබෙනවා ඇති.