යේසුස්ගේ නියෝජිතයන්ගේ ක්‍රියා 28:1-31
28 කිසි අනතුරක් නැතුව හැමෝම ගොඩබිමට ආවාම අපි දැනගත්තා අපි ඇවිල්ලා තියෙන්නේ මෝල්ටාව කියන දූපතට+ කියලා.
2 ඒ දූපතේ වැසියන් කතා කළේ වෙනත් භාෂාවක්. අපි හිතුවාටත් වඩා එයාලා අපිට හුඟක් ආදරෙන්, කරුණාවෙන් සැලකුවා. අපි එහෙට යද්දී වහිනවා. ඒ නිසා ලොකු සීතලකුත් තිබුණා. ඉතින් එහේ හිටපු අය අපිව ආදරෙන් පිළි අරන් අපි වෙනුවෙන් ගිනිමැලයක් ගැහුවා.
3 මේ අතරේ පාවුල් දර මිටියක් අරගෙන ඒක ගින්නට දාද්දී ගින්නේ රස්නෙට දර මිටියේ හිටපු පොළඟෙක් එළියට ආවා. ඌ පාවුල්ගේ අතට දෂ්ට කරලා එයාගේ අතේ එල්ලුණා.
4 ඒ විසකුරු සර්පයා පාවුල්ගේ අතේ එල්ලිලා ඉන්නවා දැක්කාම ඒ දූපතේ මිනිස්සු මෙහෙම කතා වුණා. “මේ මනුස්සයා මිනීමරුවෙක් වෙන්න ඕනේ. නැත්නම් මුහුදෙන් බේරිලා ආපු කෙනෙක්ට මෙහෙම හානියක් වෙන්නේ කොහොමද? යුක්තිය* ඉටු වෙන්න ඕනෙ නිසයි එයාට මෙහෙම මැරෙන්න වෙන්නේ.”
5 ඒත් පාවුල් අත ගසලා සර්පයාව ගින්නට දැම්මා. එයාට කිසිම හානියක් වුණේ නැහැ.
6 එයාලා හිතුවේ එයාගේ ඇඟ ඉදිමෙයි කියලා. නැත්නම් එයා එකපාරටම මැරිලා වැටෙයි කියලා. එයාලා හුඟක් වෙලා බලාගෙන හිටියත් පාවුල්ට කිසිම දෙයක් වුණේ නැහැ. ඉතින් එයාලා කියන්න පටන්ගත්තා පාවුල් දෙවි කෙනෙක් කියලා.
7 ඒ දූපතේ ඉඩම් කීපයක්ම අයිති වෙලා තිබුණ පබ්ලියස් කියලා කෙනෙක් හිටියා. එයා තමයි දූපතේ ප්‍රධානියා. එයා අපිව එයාගේ ගෙදරට ආදරෙන් පිළි අරන් දවස් තුනක්ම අපිට ඕනෙ කරන දේවල් දීලා අපිව හොඳින් බලාගත්තා.
8 පබ්ලියස්ගේ තාත්තා හිටියේ අසනීපෙන්. එයාට උණ සහ පාචනය හැදිලා ඇඳට වෙලයි හිටියේ. පාවුල් එයා ළඟට ගිහින් යාච්ඤා කරලා එයාව අල්ලලා සුව කළා.+
9 ඒකෙන් පස්සේ ඒ දූපතේ අසනීපෙන් හිටපු අනිත් අයත් පාවුල් ළඟට ඇවිත් එයාලාගේ අසනීප හොඳ කරගත්තා.+
10 ඒ අය අපිට හුඟක් තෑගිත් දුන්නා. අපි නැවට නැඟලා ආයෙත් යන්න හදද්දී එයාලා අපිට ඕනෙ කරන හැම දෙයක්ම නැවට පැටෙව්වා.
11 ඒ වෙද්දී අපි මෝල්ටාව දූපතේ මාස තුනක් ගත කරලා තිබුණා. අපි නැග්ගේ ඇලෙක්සැන්ඩ්‍රියාවෙන් ආපු නැවකට. සීත කාලේදී නැව ඒ දූපතේ නතර කරලයි තිබුණේ. ඒ නැවේ සියුස්ගේ පුතුන්ගේ රූප කැටයම් කරලා තිබුණා.
12 එතනින් අපි සිරකූසය කියන වරායට ඇවිත් එහේ දවස් තුනක් ගත කළා.
13 එතනින් අපි ගියේ රෙජියම්වලට. පහුවෙනිදා දකුණු දිශාවෙන් හුළඟක් හමපු නිසා අපිට දෙවෙනි දවස වෙද්දී පුටෙයෝලිය කියන වරායට යන්න පුළුවන් වුණා.
14 එහෙදී අපිට සහෝදරයන්ව හම්බ වුණා. එයාලා අපිට කිව්වා එයාලා එක්ක දවස් හතක් නැවතිලා ඉන්න කියලා. ඊටපස්සේ අපි ගියේ රෝමය පැත්තට.
15 අපි එනවා කියලා ආරංචි වෙලා එහේ හිටපු සහෝදරයෝ අපිව හම්බ වෙන්න තුන් තානායම කියන තැනට ආවා. තවත් කීපදෙනෙක් අප්පියස්ගේ වෙළඳපොළ වෙන කල්ම ආවා. එයාලව දැක්කාම පාවුල්ගේ හිතට ලොකු ධෛර්යයක් ඇවිත් එයා දෙවියන්ට ස්තුති කළා.+
16 අන්තිමේදී අපි රෝමයට ගියාම පාවුල්ට අවසර ලැබුණා වෙනම තැනක නතර වෙන්න. එයාව මුර කරන්න හේවායෙක්ව පත් කරලා තිබුණා.
17 දවස් තුනකට පස්සේ පාවුල් යුදෙව්වරුන්ගේ ප්‍රධානීන්ට පණිවිඩයක් යවලා කිව්වා ඇවිත් එයාව හම්බ වෙන්න කියලා. එයාලා ආවාම පාවුල් එයාලට මෙහෙම කිව්වා. “මගේ සහෝදරයෙනි, මම මිනිස්සුන්ටවත් අපේ මුතුන්මිත්තන්ගේ චාරිත්‍රවලටවත් විරුද්ධව කිසි දෙයක් කළේ නැහැ.+ ඒ වුණත් යෙරුසලමේදී මාව හිරකාරයෙක් විදිහට අල්ලගෙන රෝමවරුන්ට භාර දුන්නා.+
18 නඩු විභාගයකින් පස්සේ+ එයාලට තේරුණා මරණ දඬුවම ලබන්න තරම් වටින කිසිම දෙයක් මං කරලා නැහැ කියලා. ඉතින් එයාලට ඕනෙ වුණේ මාව නිදහස් කරන්න.+
19 ඒත් යුදෙව්වරුන් ඒකට විරුද්ධ වුණ නිසා මට සිද්ධ වුණා සීසර්ගෙන් තීන්දුවක් ඉල්ලන්න.+ ඒත් මං එහෙම කළේ මගේ ජාතියට විරුද්ධව චෝදනාවක් එල්ල කරන්න නෙමෙයි.
20 ඒ නිසයි මාව ඇවිත් හම්බ වෙන්න කියලා මං ඔයාලාගෙන් ඉල්ලුවේ. මාව මේ දම්වැල්වලින් බැඳලා තියෙන්නේ ඊශ්‍රායෙල්වරුන් බලාපොරොත්තුවෙන් ඉන්න තැනැත්තාව මං විශ්වාස කරන නිසයි.”+
21 එතකොට එයාලා පාවුල්ට මෙහෙම කිව්වා. “ඔයා ගැන අපිට යුදයෙන් කිසිම ලියුමක් ලැබිලා නැහැ. ඒ වගේම එහෙන් ආපු කවුරුත් ඔයා ගැන කිසිම වැරදි දෙයක් අපිට දැන්නුවෙවත් කිව්වෙවත් නැහැ.
22 ඒත් හැම තැනකම මිනිස්සු මේ නිකායට+ විරුද්ධව කතා කරනවා කියලා+ අපි දන්නවා. ඉතින් අපි ආසයි ඔයාට කියන්න තියෙන්නේ මොනවාද කියලා දැනගන්න.”
23 ඉතින් එයාලා පාවුල් එක්ක කතා කරන්න දවසක් දාගත්තා. ඒ දවසේ විශාල පිරිසක් පාවුල් ඉන්න තැනට ඇවිත් පාවුල්ව හම්බ වුණා. එයා එදා උදේ ඉඳන් හවස් වෙන කල්ම එයාලට දෙවියන්ගේ රාජ්‍යය ගැන හරිම පැහැදිලි සාක්ෂියක් දුන්නා. එයා මෝසෙස්ගේ නීතියේ+ තිබුණ දේවලුයි, අනාගතවක්තෘවරුන්+ ලියපු දේවලුයි පාවිච්චි කරලා යේසුස් ගැන විශ්වාසයක් ඇති වෙන විදිහේ තර්ක+ ඉදිරිපත් කළා.
24 සමහරු එයා කියපු දේවල් විශ්වාස කළත් තවත් අය ඒ දේවල් විශ්වාස කරන්න කැමති වුණේ නැහැ.
25 ඉතින් එයාලා අතරේ වාදයක් ඇති වුණා. එයාලා එතනින් යන්න හදද්දී පාවුල් එයාලට මෙහෙම කිව්වා.
“දෙවියන්ගේ බලය අනාගතවක්තෘ යෙසායා මාර්ගයෙන් ඔයාලාගේ මුතුන්මිත්තන්ට දන්වපු දේ කොච්චර ඇත්තද!
26 යෙසායාට මෙහෙම දැන්නුවා. ‘ගිහින් මේ සෙනඟට මේ පණිවිඩේ කියන්න. “ඔබට ඇහුණත් ඔබ කිසි දෙයක් තේරුම්ගන්නේ නැහැ. ඔබ බැලුවත් කිසි දෙයක් ඔබට පේන්නේ නැහැ.+
27 මොකද මේ සෙනඟ ඔවුන්ගේ හිත් මුරණ්ඩු කරගෙන. ඔවුන්ගේ කන්වලට ඇහුණත් ඔවුන් අවධානය දෙන්නේ නැහැ. කිසිම දෙයක් අහන්න දකින්න කැමති නැති නිසා ඔවුන් ඇස් කන් වහගෙන ඉන්නවා. ඒ නිසා ඔවුන් අහන දකින දේවල්වල නියම අර්ථය තේරුම්ගන්නෙවත් හැරිලා ඇවිත් මගෙන් සුවය ලබන්නෙවත් නැහැ.”’+
28 ඉතින් ඔයාලා මේ දේ හිතට ගන්න. දෙවියන් ගැලවීම ලබා දෙන විදිහ ගැන පණිවිඩය දැන් වෙනත් ජාතීන්ටත් දන්වලයි තියෙන්නේ.+ එයාලා නම් ඒකට අනිවාර්යයෙන්ම ඇහුම්කන් දෙයි.”+
29 * ——
30 පාවුල් අවුරුදු දෙකක්ම හිටියේ එයාටම කියලා කුලියට ගත්ත ගෙදරක.+ එයාව හම්බ වෙන්න ආපු හැමෝවම එයා ආදරෙන් පිළිගත්තා.
31 එයා කිසිම බයක් නැතුව ලොකු උද්‍යෝගයකින් දෙවියන්ගේ රාජ්‍යය ගැන දේශනා කරලා ස්වාමීන් වන යේසුස් ක්‍රිස්තුස් ගැන අනිත් අයට ඉගැන්නුවා.+ ඒකට එයාට කිසිම බාධාවක් තිබුණේ නැහැ.
පාදසටහන්
^ ග්‍රීක භාෂාවෙන් ඩයික්. ඒකෙන් අදහස් කළේ වරදකරුවන්ට දඬුවම් කරලා යුක්තිය ඉටු කරන දේවතාවිය වෙන්න ඇති.
