Tongana e luti gï na ndö ti aye so ayeke sara si amba ti e ayeke nde na e, a gue ngbii e yeke bâ ande aye ni so tongana sioni ye na lê ti e. Ye so asara si tongana mbeni zo ayeke nde na mo, mo yeke bâ lo na nene ni ape. Na tongana e yeke na sioni bango ndo tongaso na ndö ti amba ti e, andâ e ke ala senge senge awe la, na a yeke duti ande ngangu ti zia terê ti e na place ti ala.

“Ala duti na ngia legeoko na ala so aduti na ngia, ala toto legeoko na azo so atoto.”​—AROMAIN 12:15.

Versê so aye ti tene nyen? Versê so afa na e so e doit ti zia terê ti e na place ti amba ti e, so ti tene e doit ti sentir ye so ala sentir.

Tongana e zia terê ti e na place ti mbeni zo, e yeke bâ so e na lo e yeke oko. E peut ti bâ so, zo ni ayeke sara ka mara ti ye so e yeke sara ka nga lo sentir ye so e yeke sentir ka. Ti zia terê na place ti mba ayeke sara si e bâ so azo kue ayeke oko. Tongana e gi ti bâ aye so asara si e na amba ti e e yeke oko, a yeke sara si e yeke duti na sioni pensé na ndö ti ala ape.

Tongana e yeke zia terê ti e na place ti amba ti e ayeke sara si e yeke ne ala. Bâ ye so Anne-Marie, so ayeke na Sénégal atene na ndö ti azo so kozo lo bâ ala tongana ambumbuse zo. Lo fa tongana nyen la so lo bâ mawa ti ala a-aidé lani lo. Lo tene: “Tongana mbi bâ tongana nyen la azo ni ayeke bâ pasi, mbi hunda terê ti mbi mbi tene tongana mbi la mbi yeke na place ti ala, a yeke sara mbi tongana nyen? Ye so asara si mbi bâ terê ti mbi kota ahon ala ape. Ye oko afa ape so mbi yeke kota ahon ala. Tongana e yeke gi ti hinga akpale so amba ti e ayeke na yâ ni, e yeke kasa ala ape.”

Tongana mo yeke na sioni pensé na ndö ti ambeni zo, gi ti bâ aye so asara si mo na ala ayeke oko. Na tapande, a yeke sara ala tongana nyen

• tongana ala na afami ti ala yeke te ye place oko

• tongana ala londo ti hunzi mbeni ngangu kua

• tongana ala yeke passé temps na akaramade ti ala

• tongana ala yeke mä mbeni bia so ala ye mingi

Na pekoni, imaginé mo na place ti ala. Hunda terê ti mo:

• ‘Mbi yeke sara ye tongana nyen, tongana mbeni zo abâ mbi tongana mbumbuse zo?’

• ‘A yeke sara mbi tongana nyen, tongana azo ayeke na sioni pensé na ndö ti mbi kozo même si ala hinga mbi?’

• ‘Tongana fade mbi yeke na popo ti azo so mbi yeke kasa ala so, mbi ye si azo asara ye na mbi tongana nyen?’