Jéhovah Nzapa la amû fini na aye kue (Psaume 36:10). Ni la, eskê a yeke kara ande lo ti kiri ti mû fini na azo so akui awe? Oko ape. Bible atene so lo yeke sara ande ni. (Diko Kusala 24:15.) Me, lo yeke sara ande ni ngbanga ti nyen?

Nzapa aleke azo lani ti tene ala duti na fini, lakue lakue, na ndo ti sese ge (Genèse 1:31; 2:15-17). Ye so lo ye ndali ti e azo achangé ape. Mawa ni ayeke so, laso, gigi ti e asi singo na akpale nga e yeke kui hio mingi. Tongana Nzapa ayeke bâ aye ni so tongaso, a sara lo nzoni oko ape.—Diko Job 14:1, 14, 15.

Nzapa acréé lani azo ti duti na yayu? Ên-ën. A-ange la lo créé ala ti duti na yayu, me ti azo, lo leke ala ti duti na ndo ti sese ge (Genèse 1:28; Job 38:4, 7). Na batango tënë so na li, zia e bâ tënë na ndo ti azo so Jésus azingo ala lani. Lo zingo azo ni lani, na ala kiri aduti na fini tâ gi na ndo ti sese ge. Legeoko nga, mingi ti azo so lo yeke zingo ande ala, ala yeke kiri ti duti ande na fini gi na ndo ti sese ge.—Diko Jean 5:28, 29; 11:44.

Me, a yeke zingo ande mbeni kete wungo ti azo, so Nzapa asoro ala, ti gue ti duti na yayu. Tere ti ala ayeke changé ti ga tongana ti a-ange (Luc 12:32; 1 aCorinthien 15:49, 50). A yeke zingo ande azo ni so ti gue na yayu, tongaso si ala na Christ akomande tongana agbia na ndo ti sese ge.—Diko Apocalypse 5:9, 10.