Royaume ti Nzapa ayeke nyen?

“Nzoni tënë ti royaume so . . . ”​—MATTHIEU 24:14.

NA YÂ ti fango ye ti Jésus so azo ahinga ni mingi, so lo fa na ndo ti hoto, lo fa tapande ti sambela. Na yâ ni lo tene: “Zia royaume ti mo aga.” Azo kutu mingi ahinga sambela so na li nga ala yeke tene ni fani mingi. Mbeni bakari atene so a yeke “sambela so aChrétien kue ti abungbi ti vorongo nzapa ayeke tene ni.” Me, mingi ti azo so ayeke tene sambela so ahinga Royaume ni pëpe nga ala hinga pëpe ye so Royaume ni ayeke sara ande na ngoi so a ga.​—Matthieu 6:9, 10.

Ye so ayeke ye ti dongo bê pëpe. Aye so akota zo ti abungbi ti vorongo nzapa afa na ndo ti Royaume amä tere pëpe, a sara si li ti zo aga kirikiri nga a yeke ngangu ti tene zo ahinga Royaume ni. Mbeni kota zo ni asû mbeti atene Royaume ti Nzapa ayeke “mbeni ye so zo alingbi ti gbu ndani pëpe, . . . A yeke mbeni ye so atingbi zo na Nzapa . . . , a yeke mbeni ye so zo awara na mbage ti Nzapa so na lege ni akoli na awali ayeke wara fini.” Mbeni nde atene so nzoni tënë ti Royaume ayeke “aye so a fa na ndo ti eglize.” Nga mbeni buku (Catechism of the Catholic Church) atene: “Royaume ti Nzapa [ayeke] mbilimbili, siriri nga na ngia na yâ ti Yingo Vulu.”

Na lembeti 2 ti Tour ti Ba Ndo so, mo yeke wara nzoni fango ye na ndo ti Royaume. A tene: “Na yâ ti ngoi kete Royaume ti Nzapa (so ayeke mbeni tâ ngorogbia na yayu) ayeke zi aye ti sioni kue na ayeke sara si sese aga paradis.” Zia e bâ tongana nyen Bible ayeda na tënë so.

Azo so ayeke komande ande sese kue

Royaume ayeke mbeni ngorogbia so mbeni gbia akomande dä. Jésus Christ so Nzapa azingo lo na kuâ la ayeke Gbia ti Royaume ti Nzapa. Na yâ ti mbeni suma so prophète Daniel abâ, a fa tongana nyen a zia lo na ndo ti mbata ti gbia na yayu. Daniel atene: “Mbi bâ ye tongana suma na bï, mbi bâ Zo oko tongana Molenge Ti Zo [Jésus] so aga na mbinda ti yayu, Lo si nduru na Lo Ti Giriri [Jéhovah Nzapa], na ala sara si Zo so aga na gbele Lo. A  mû na lo ngangu ti komande, na gloire, na royaume, si azo kue, amara kue, na azo ti yanga nde nde kue, asara na Lo; ngangu ti Lo ti komande ayeke ti lakue lakue, fade a hon pëpe, na a lingbi futi royaume ti Lo pëpe.”​—Daniel 7:13, 14.

Buku ti Daniel afa nga so a yeke Nzapa la azia gere ti Royaume na yayu. Royaume ni ayeke futi ande angorogbia ti azo kue nga mbeni zo ayeke futi ande ni lâ oko pëpe. Chapitre 2 ti buku ti Daniel afa mbeni suma so gbia ti Babylone  abâ, so na yâ ni lo bâ mbeni kota statue. Statue so ayeke fä ti akodoro so ayeke komande na peko ti tere na yâ ti dunia. Prophète Daniel afa nda ti suma ni. Lo tene: “Na lâ ti nda ni . . . fade Nzapa ti yayu ayä royaume so afuti lâ oko pëpe, na Lo zia royaume ni na tïtî ambeni zo nde pëpe; me fade royaume so afâ mbeni royaume so kue nduru nduru, na a sara si royaume nde nde so kue awe; na fade royaume so angbâ lakue lakue.”​—Daniel 2:28, 44.

Gbia ti Royaume ti Nzapa ayeke komande gi lo oko pëpe. Na ngoi ti kusala ti Jésus na sese ge, lo dë bê ti abazengele ti lo so ayeke be-ta-zo so ala na ambeni zo ayeke zingo ande na kuâ ti gue na yayu ti duti na ndo ti atrône (Luc 22:28-30). Jésus ayeke sara lani pëpe tënë ti atâ trône ndali ti so lo fa so Royaume ni ayeke duti na yayu. Bible afa so azo so ayeke komande legeoko na Jésus alondo na popo ti “azo ti kete mara kue, azo ti yanga ti kodoro kue, azo ti kodoro kue nga na azo ti amara kue”. Ala yeke ga “mbeni royaume na aprêtre ti Nzapa ti e, na ala yeke komande tongana agbia na ndo ti sese.”​—Apocalypse 5:9, 10.

Ndani so tënë ti Royaume ayeke mbeni nzoni tënë

Bâ so a mû Christ Jésus ti komande na ndo ti “azo kue, amara kue, na azo ti yanga nde nde kue” nga lo na azo so ayeke na tere ti lo ayeke “komande tongana agbia na ndo ti sese.” Me, azo wa la Royaume ni ayeke komande ande na ndo ti ala? Azo so ayeda na nzoni tënë so a yeke fa ni laso. Na yâ ti azo ni so, a yeke wara nga azo so ayeke zingo ande na kuâ ti wara fini na ndo ti sese, ala so ayeke na beku ti wara fini ti lakue lakue.

Bible afa na mbeni lege so ayeke pendere mingi aye ti nzoni so azo ayeke wara ande na gbe ti Royaume. Bâ gi ambeni ye ni.

“Lo sara si bira awe juska na nda ti sese; Lo fâ ngindi, na Lo fâ yâ ti likongo; Lo zö apuse ti mbarata na wâ.”​—Psaume 46:10.

“Fade azo asara da, na ala duti na yâ ni; fade ala lu vigne na yaka, na ala te lê ni. Fade azo asara da si mbeni zo aduti na yâ ni pëpe; fade ala lu ye si mbeni zo ate pëpe.”​—Ésaïe 65:21, 22.

“Fade [Nzapa ayeke] mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”​—Apocalypse 21:3, 4.

“Na lâ ni kâ, fade lê ti awaziba alungula, na mê ti awambongi alungula nga. Na lâ ni kâ, fade zo so azin ahuru tongana tagba, na menga ti awabuburu asara bia.”​—Ésaïe 35:5, 6.

“Ngbonga ni ayeke ga so ala kue so ayeke na yâ ti asende ti kuâ ayeke mä ande go ti lo [Jésus] na ala yeke sigigi. Ala so asara aye ti nzoni, zingongo ti ala na kuâ ayeke ti wara fini.”​—Jean 5:28, 29.

“Azo so ayeke na tâ be-ti-molenge, fade sese ni aga ye ti héritier ti ala, fade ala wara ngia na yâ siriri so awu mingi.”​—Psaume 37:11.

Atënë so ayeke biani anzoni tënë! Nga, aprophétie ti Bible so aga tâ tënë awe afa so na yâ ti kete ngoi, Royaume ti Nzapa ayeke sara si komandema ti lo ti mbilimbili amû ndo ti sese kue.