Ndoye mbilimbili na bê ti mo kue

“Mo ndoye mbilimbili.”​—PS. 45:8.

1. Nyen la ayeke mû maboko na e ti mû “lege ti mbilimbili”?

 NA LEGE ti Mbeti ti lo nga na yingo vulu ti lo, Jéhovah ayeke fa “lege ti mbilimbili” na azo ti lo (Ps. 23:3). Ye oko, teti so e lingbi kue pëpe, bê ti e ayeke pusu ka e ti hon nde na lege so. Ti kiri ti sara ye so ayeke mbilimbili ahunda ti sara ngangu. Nyen la ayeke mû maboko na e ti sara ni? Tongana ti Jésus, a lingbi e ndoye ye so ayeke mbilimbili.​—Diko Psaume 45:8.

2. “Lege ti mbilimbili” ni ayeke nyen?

² “Lege ti mbilimbili” ni ayeke nyen? A yeke tongana mbeni kete lege so a suru ti tene azo ahon dä. A yeke aye so Jéhovah abâ ni tongana aye ti mbilimbili la ayeke fa “lege” ni so. Tënë ti Hébreu na ti Grec so a kiri pekoni na “mbilimbili” aye ti sara tënë ti “ye so ayeke na lege ni” so andu sarango ye alingbi tâ gi na aye so Nzapa afa tongana nzoni lege ti sarango ye. Teti so Jéhovah ayeke “Ndo Ti Duti ti mbilimbili,” azo so ayeke voro lo ayeke na ngia ti bâ ndo na mbage ti lo ti tene lo fa na ala nzoni lege ti sarango ye so a lingbi ala sara ye alingbi na ni.​—Jér. 50:7.

3. E lingbi ti sara nyen ti manda ye mingi na ndo ti mbilimbili ti Nzapa?

³ E yeke zia ngia mingi na bê ti Nzapa gi tongana e sara kue ti sara ye alingbi na afango ye ti Nzapa so ayeke mbilimbili (Deut. 32:4). E yeke to nda ni na mandango ye kue so e lingbi ti hinga na ndo ti Jéhovah Nzapa na yâ ti Mbeti ti lo, Bible. Na ngoi so e yeke manda ye mingi na ndo ti Jéhovah, a yeke pusu e ti ga nduru mingi na lo lâ oko oko nga e yeke ndoye mbilimbili ti lo mingi (Jacq. 4:8). Nga, a lingbi e yeda na fango lege ti Mbeti ti Nzapa na ngoi so e yeke na akota desizion ti mungo ni.

Gi mbilimbili ti Nzapa

4. Gingo mbilimbili ti Nzapa andu nyen?

⁴ Diko Matthieu 6:33. Gingo mbilimbili ti Nzapa andu aye mingi ahon gi ti mû ngoi ti fa nzoni tënë ti Royaume. Ti tene kusala so e yeke sara na Jéhovah anzere na lo, a lingbi tambela ti e ti lâ na lâ ague oko na afango ye ti lo. Ye wa a lingbi azo kue so ayeke gi mbilimbili ti Jéhovah asara? A lingbi ala “yü fini zo so a sara lo alingbi na ye so bê ti Nzapa aye na so ague oko na tâ lege ti mbilimbili nga na tâ lege ti dutingo be-ta-zo.”​—aÉph. 4:24.

5. Nyen la ayeke mû maboko na e ti hon ndo ti bê so anze?

⁵ Na ngoi so e yeke sara kue ti sara ye alingbi na afango ye ti Nzapa so ayeke mbilimbili, na ambeni ngoi e lingbi ti nze ndali ti awokongo ti e. Nyen la alingbi ti mû maboko na e ti tene bê ti e anze pëpe, na ti ndoye mbilimbili nga ti sara lakue ye alingbi na ni? (aProv. 24:10). A lingbi e ga lakue nduru na Jéhovah na yâ ti sambela “na tâ bê ti e, na kite oko pëpe nga na mabe”. (aHéb. 10:19-22). Atâa e yeke na beku ti gue na yayu wala ti ngbâ na ndo ti sese, e mä na bê na sandaga ti Jésus Christ nga na kusala so lo yeke sara tongana Kota Prêtre ti e (aRom. 5:8; aHéb. 4:14-16). Bazengele Jean atene: “Mênë ti . . . Jésus asukula e na asiokpari kue awe.” (1 Jean 1:6, 7). Bible atene même tongana siokpari ti e “ayeke tongana bengba ye, fade a vuru tongana neige.” So tâ pendere ye si Jéhovah asara ndali ti e na lege ti sandaga ti Molenge ti lo so lo ye lo mingi!​—És. 1:18.

 Bâ aye ti bira ti mo ti yingo nzoni

6. Ngbanga ti nyen a yeke kota ye ti bâ aye ti bira ti e ti yingo nzoni?

⁶ A lingbi e yü “mbilimbili tongana bongo ti wen na kate” ti e na ngoi kue, teti so a yeke kota mbage ti aye ti bira ti yingo so alondo na Nzapa (aÉph. 6:11, 14). Atâa e mû tere ti e na Jéhovah ade ti ninga pëpe wala e sara ni a sara angu mingi awe, a yeke kota ye ti tene lâ oko oko e bâ aye ti bira ti e ti yingo nzoni. Ngbanga ti nyen? Ngbanga ti so a bi Satan na asioni yingo ti lo na ndo ti sese ge (Apoc. 12:7-12). Satan ayeke na kota ngonzo nga lo hinga so lo yeke na ngoi mingi pëpe. Ni la, bira so lo yeke sara na azo ti Nzapa akiri aga ngangu mingi. Tongaso, a yeke biani kota ye ti tene e yü “mbilimbili tongana bongo ti wen na kate” ti e.

7. E yeke sara ye tongana nyen tongana e bâ so a yeke kota ye ti yü ‘mbilimbili tongana bongo ti wen na kate ti e’?

⁷ Legeoko tongana bongo ti wen so mbeni zo ayü na kate ti lo ayeke bata bê ti lo, mbilimbili ayeke bata bê ti e na lege ti fä. Teti so e lingbi kue pëpe, bê ti e ayeke sara kue ti handa e (Jér. 17:9). Teti so bê ti e ayeke pusu ka e ti sara ye ti sioni, a yeke kota ye ti fa lege na ni nzoni (Gen. 8:21). Tongana e bâ so ayeke kota ye ti yü ‘mbilimbili tongana bongo ti wen na kate ti e’, e yeke zi ni pëpe teti mbeni kete ngoi ti sara ambeni ngia so Nzapa ake ni nga e yeke bi tere ti e pëpe na yâ ti ye ti sioni. E yeke zia si bango télé amû ngoi ti e kue pëpe. Nde na so, e yeke sara ngangu ti sara ye so anzere na Jéhovah. Même tongana na mbeni ngoi bibe ti mitele so ayeke mbilimbili pëpe asara si e tï, e yeke londo grâce na mungo maboko ti Jéhovah.​—Diko aProverbe 24:16.

8. Ngbanga ti nyen e yeke na bezoin ti “kota vala ti mabe”?

⁸ Na popo ti aye ti bira ti e ti yingo e yeke wara “kota vala ti mabe”. A yeke mû maboko na e ti “mingo wâ ti akokora kue ti Zo ti sioni.” (aÉph. 6:16). Na pekoni, mabe nga na yengo so e ye na Jéhovah na bê ti e kue ayeke mû maboko na e ti sara ye mbilimbili na ti ngbâ na ndo ti lege so ague na fini ti lakue lakue. Tongana e ndoye Jéhovah mingi, e yeke bâ na nene ni mingi mbilimbili ti lo. Ka ti yingo-ti-hinga ti e ayeke tongana nyen? Tongana nyen yingo-ti-hinga ayeke mû maboko na e na yâ ti ngangu so e yeke sara ti ndoye mbilimbili?

Ngbâ ti duti na nzoni yingo-ti-hinga

9. Ti ngbâ ti duti na nzoni yingo-ti-hinga ayeke ga na ye ti nzoni wa?

⁹ Na ngoi ti batême ti e, e hunda na Jéhovah ti mû na e “nzoni yingo-ti-hinga”. (1 Pi. 3:21). Ndali ti so e mä na bê na ngere so a futa ti zi zo, mênë ti Jésus azi siokpari ti e na ye so asara si e ga nzoni na lê ti Nzapa. Ye oko, ti ngbâ lakue ti duti nzoni na lê ti Nzapa, a lingbi e ngbâ ti duti na nzoni yingo-ti-hinga. Tongana na ambeni ngoi yingo-ti-hinga ti e afâ ngbanga na ndo ti e na asara tënë na e, a yeke nzoni ti kiri singila ndali ti so ye so afa so lo yeke sara kua nzoni. A fa so yingo-ti-hinga ti e ade ti kui pëpe. A ngbâ lakue ti gue oko na afango lege ti Jéhovah so ayeke mbilimbili (1 Tim. 4:2). Me ti ala so andoye mbilimbili, yingo-ti-hinga ti ala alingbi ti sara nga ambeni kusala nde na ndo ti so.

10, 11. (a) Fa mbeni ye so asi so afa so a yeke nzoni ti sara ye alingbi na yingo-ti-hinga ti e so Bible afa lege na ni. (b) Ngbanga ti nyen ndoyengo mbilimbili alingbi ti ga na e ngia mingi?

 ¹⁰ Tongana e sara mbeni ye ti sioni, yingo-ti-hinga ti e alingbi ti fâ ngbanga na ndo ti e wala asara si e duti na vundu. Mbeni maseka adö lani “lege ti mbilimbili” lo zia. Lo tï na yâ ti kua ti bango porno na lo to nda ti nyon mbangi. Lo yeke na vundu na ngoi so lo gue na bungbi nga lo bâ so tongana lo yeke fa tënë lo yeke handa lê ti azo handango la. Ye so asara si lo dö aye ti yingo so lo zia. Lo tene: “Mbi bâ lani pëpe so yingo-ti-hinga ti mbi ayeke fâ ngbanga na ndo ti mbi ndali ti aye so mbi sara.” Lo kiri lo tene: “Mbi sara ye ti buba so nduru na ngu osio.” Na pekoni lo gbu li ti lo ti kiri na yâ ti tâ tënë. Atâa so lo pensé so Jéhovah ayeke mä sambela ti lo pëpe, lo sambela kamême na lo hunda pardon. Nduru na penze-ngbonga bale-oko na pekoni, mama ti lo aga abâ lo nga lo wa lo ti kiri ti gue na abungbi. Lo gue na bungbi na lo hunda na mbeni ancien ti manda Bible na lo. Tongana ngoi ayeke hon, lo wara batême na lo kiri singila na Jéhovah so asö fini ti lo.

¹¹ E bâ so e wara ngia mingi na sarango ye so ayeke na lege ni. Tongana e ndoye mbilimbili nga e sara lakue ye alingbi na ni, e yeke wara ngia mingi na sarango ye so bê ti Babâ ti e ti yayu aye. Gbu li kete! Mbeni lango ayeke ga ande so yingo-ti-hinga ti azo kue ayeke sara si ala yeke duti gi na ngia; ala yeke sara ye tâ gi tongana ti Nzapa. Tongaso, zia e gi laso ti sara si nzara ti mbilimbili alï tâ ngangu na yâ ti bê ti e si Jéhovah aduti na ngia.​—aProv. 23:15, 16.

12, 13. Tongana nyen e lingbi ti fa lege na yingo-ti-hinga ti e?

¹² Ye wa e lingbi ti sara ti fa lege na yingo-ti-hinga ti e? Na ngoi so e yeke manda Bible nga na ambeti ti e, a yeke nzoni ti dabe ti e so “zo ti mbilimbili agi bê ti lo si lo kiri tënë”. (aProv. 15:28). Bâ tongana nyen ye so alingbi ti mû maboko na e na ndo ti tënë ti kua ti nginza. Tongana Bible afa polele so mbeni kua ayeke na lege ni pëpe, mingi ti e ayeke nduru ti sara ye alingbi na fango lege so e wara na mbage ti ngbâa be-ta-zo so ayeke sara ye na ndara. Me tongana a yeke polele pëpe so mbeni kua tongaso ayeke nzoni wala ayeke sioni, a lingbi e gi ti bâ aversê so andu tënë ni so nga e sambela ndali ni. * A yeke nzoni e bâ nga aversê so afa so a lingbi e kpe ti mû vundu na yingo-ti-hinga ti amba ti e (1 aCor. 10:31-33). Kozo ye so e yeke gi na yâ ti aversê ni ayeke ti bâ tongana nyen kua ni ayeke ndu songo ti e na Jéhovah. Tongana e hinga Jéhovah nzoni, e yeke hunda kozoni tere ti e e tene: ‘Tongana mbi sara kua ni so a yeke son bê ti Jéhovah, a yeke zia vundu na bê ti lo?’​—Ps. 78:40, 41.

¹³ Na ngoi so e yeke leke tere ti e ndali ti Mandango Tour ti Ba Ndo wala Mandango Bible ti Congrégation, a lingbi e zia na li ti e so a yeke kota ye ti gbu li na ndo ti ye so e yeke manda. E yeke gi ka lakue gi ti sû kamba hio na gbe ti kiringo tënë na hundango tënë ni na ti hon na paragraphe ti peko? Mara ti sarango ye tongaso alingbi pëpe ti kono ndoye ti e teti mbilimbili  wala ti leke yingo-ti-hinga ti e si asara kua nzoni mingi. Tongana e ye ti ndoye mbilimbili, a lingbi e manda ye nzoni nga e gbu li ti e na ndo ti ye so e yeke diko na yâ ti Bible. Ti ngbâ ti ndoye mbilimbili na bê ti e kue a hunda ti sara ngangu.

Azo so nzara ti mbilimbili asara ala tongana nzara ti kobe na ti ngu

14. Jéhovah Nzapa na Jésus Christ aye si e duti tongana nyen na ngoi so e yeke sara kusala ti Nzapa?

¹⁴ Jéhovah Nzapa na Jésus Christ aye si e duti na ngia na ngoi so e yeke sara kusala ti Nzapa. Nyen la ayeke mû maboko na e ti duti na ngia nyen? A yeke biani ndoyengo mbilimbili! Na yâ ti fango ye ti Jésus na ndo ti Hoto, lo tene: “Ngia ayeke na ala so nzara ti mbilimbili asara ala tongana nzara ti kobe na ti ngu, teti fade nzara ti ala ayeke hunzi.” (Mat. 5:6). Tënë so aye ti tene nyen teti azo so aye ti ndoye mbilimbili?

15, 16. Azo so nzara ti kobe na ti ngu asara ala na lege ti yingo, na lege wa a yeke kaï nzara ti ala?

¹⁵ Dunia so e yeke na yâ ni ayeke na gbe ti zo ti sioni (1 Jean 5:19). Tongana e diko mbeni mbeti-sango atâa na yâ ti kodoro wa, e yeke diko asango na ndo ti sarango aye ti sioni nga na sarango ngangu na zo so ague na li ni mingi ahon ti kozo. A sara nzoni pëpe na zo ti mbilimbili ti bâ aye ti sioni so azo asara na amba ti ala zo (Zo-ti. 8:9). Teti so e ye Jéhovah, e hinga so gi lo la lo lingbi ti kaï nzara ti azo so na lege ti yingo nzara ti mbilimbili asara ala tongana nzara ti kobe na ti ngu. A ga nduru awe ti futi azo so akpe mbeto ti Nzapa pëpe. Azo so andoye mbilimbili ayeke bâ ande pasi mbeni pëpe ndali ti azo ti kpengo ndia pëpe nga na aye ti sioni so ala sara (2 Pi. 2:7, 8). So tâ dengo bê si zo ayeke wara ande!

¹⁶ E so e yeke awakua ti Jéhovah nga adisciple ti Jésus Christ, e hinga so azo so nzara ti mbilimbili asara ala tongana nzara ti kobe na ti ngu, “fade nzara ti ala ayeke hunzi.” Aye so Nzapa aleke na lege ti fini yayu nga na fini sese so “mbilimbili ayeke duti ande na yâ ni” ayeke sara ande si nzara ti ala ahunzi kue kue kue (2 Pi. 3:13). Tongaso, zia bê ti e anze pëpe wala adö pëpe tongana sarango ye ti sioni nga na sarango ye ti ngangu na zo asara si sarango ye ti mbilimbili ayeke dä pëpe na yâ ti dunia ti Satan so (Zo-ti. 5:7). Jéhovah, Lo so ayeke na nduzu na ndo ti aye kue, ahinga aye so ayeke si so nga na yâ ti ngoi kete lo yeke sö azo so andoye mbilimbili.

Ndoyengo mbilimbili aga na ye ti nzoni

17. Tongana zo andoye mbilimbili, ambeni ye ti nzoni wa ayeke ga na pekoni?

¹⁷ Psaume 146:8 afa ye ti nzoni so zo ayeke wara na mungo peko ti lege ti mbilimbili. Versê ni atene: “L’Éternel andoye azo ti mbilimbili.” Mo bâ ni! Kota Gbia ti dunia kue andoye e ndali ti so e ndoye mbilimbili. Teti so Jéhovah andoye e, e hinga na bê ti e kue so lo yeke mû na e aye so e yeke na bezoin ni tongana e ngbâ ti zia aye ti Royaume na kozo ndo na yâ ti fini ti e. (Diko Psaume 37:25; aProverbe 10:3.) Na nda ni, sese kue ayeke ga ande ti azo so andoye mbilimbili (aProv. 13:22). Ti mingi ti awakua ti Nzapa, futa so ala yeke wara ndali ti so ala yeke sara lakue ye ti mbilimbili ayeke so, ala yeke wara kota ngia nga na fini ti lakue lakue na yâ ti paradis na ndo ti sese. Même laso, azo so andoye mbilimbili ti Nzapa ayeke na siriri ti bê, ye so asara si mango tere ayeke na yâ ti sewa ti ala nga na yâ ti congrégation ti ala.​—aPhil. 4:6, 7.

18. Aye wa a lingbi e ngbâ ti sara na ngoi so e yeke ku lâ ti Jéhovah?

 ¹⁸ Na ngoi so e yeke ku gango ti kota lâ ti Jéhovah, a lingbi e ngbâ ti gi mbilimbili (Soph. 2:2, 3). Ni la, zia e fa so e ndoye biani alege ti Jéhovah Nzapa so ayeke mbilimbili. Ye so aye nga ti tene ti ngbâ ti yü lakue ‘mbilimbili tongana bongo ti wen na kate ti e’ ti bata bê ti e na lege ti fä. E yeke nga na bezoin ti ngbâ ti duti na nzoni yingo-ti-hinga, ye so ayeke sara si e duti na ngia na ayeke zia nga ngia na bê ti Nzapa ti e.​—aProv. 27:11.

19. Ye wa a lingbi e ngbâ lakue ti sara? Nyen la e yeke bâ na yâ ti article ti peko?

¹⁹ “Lê ti L’Éternel akpe na ndo nde nde na lê ti sese kue ti fa ngangu ti Lo teti ala so bê ti ala ayeke mbilimbili na Lo.” (2 Chron. 16:9). Atënë so adë biani bê ti e na ngoi so e yeke sara ye ti mbilimbili na yâ ti dunia so aye ayeke changé lâ oko oko nga so sarango ye ti ngangu na ye ti sioni ayeke gue gi guengo na li ni. Biani, asarango ye ti e ti mbilimbili alingbi ti sara si li ti azo mingi mingi so ague yongoro na Nzapa akpe. Me e wani e bâ nzoni mingi na sarango ye alingbi na ye so Jéhovah afa so ayeke mbilimbili (És. 48:17; 1 Pi. 4:4). Tongaso, zia e ngbâ lakue ti ndoye mbilimbili na bê ti e oko na e sara ye lakue alingbi na ni na ye so ayeke ga na e ngia. Ye oko, ti ndoye ye so ayeke mbilimbili na bê ti e kue aye nga ti tene ti ke ye ti sioni. Article ti peko ayeke fa nda ti tënë so na e.

[Kete tënë na gbe ni]

Mo yeke kiri tënë tongana nyen?

• Ngbanga ti nyen ti hinga nene ti ngere so a futa ti zi azo ayeke mû lege na e ti ndoye ye so ayeke mbilimbili?

• Ngbanga ti nyen a yeke kota ye ti yü ‘mbilimbili tongana bongo ti wen na kate ti e’?

• Tongana nyen e lingbi ti fa lege na yingo-ti-hinga ti e?

[Ahundango tënë ti manda na ye]

[Foto na lembeti 26]

Yingo-ti-hinga so a fa lege na ni nzoni ayeke mû maboko na e na ndo ti tënë ti kua ti nginza