Koli so achangé dunia

Azo ngbundangbu mingi abâ gigi na ndo ti sese so na pekoni ala kui. Mingi ti ala azia akpengba ye na peko ti ala pëpe. Me ambeni so ayeke mingi pëpe asara kota ye na yâ ti mbaï ti azo, na peut-être na ndo ti ye so ayeke si na mo lâ na lâ.

MO ZINGO na ndapre na mo leke tere ti mo ti gue na kua. Mo za wâ na ngoi so mo yeke leke tere ti mo. Mo mû mbeni mbeti ti diko na yâ ti bus. Li ti mo atï na ndo ti mbeni yorö ti fango na amicrobe so a mû na mo ti nyon ni ti tiri bira na mbeni kobela. Lango ni ato nda ni ade ti ninga pëpe, na mo wara nzoni awe na lege ti aye so ambeni kpengba zo so wungo ti ala ayeke mingi pëpe asara.

Michael Faraday A dü lo na ngu 1791. Wandara ti kodoro ti Angleterre so, a yeke zo so asigigi na moteur so atambela na kuran nga na dynamo. Aye so lo sigigi na ni asara si azo mingi awara lege ti sara kusala na kuran.

Ts’ai Lun Lo yeke kota zo na yangbo ti Togbia ti Chine. A tene lo la lo sara si kode ti lekengo kugbe-mbeti amaï, nduru na ngu 105 na peko ti Christ. Ye so amû lege ti leke gbâ ti akugbe-mbeti.

Johannes Gutenberg Nduru na ngu 1450, wandara ti kodoro ti Allemagne so asigigi na kozo masini ti petengo na mbeti so a leke agere-mbeti ni oko oko kue na ndo ti mbeni ye nde so a lingbi ti zia ni wala ti zi ni na yâ ti masini ni. Masini so asara si petengo ambeti ahunda nginza mingi pëpe, na tongaso a mû lege na azo ti wara asango na ndo ti atënë nde nde.

Alexander Fleming Na ngu 1928, wandara ti kodoro ti Ecosse so asigigi na mbeni yorö so lo iri ni pénicilline. A leke ni ti fâ na amicrobe. Laso a yeke sara kusala mingi na yorö so ti kaï na kobela so amicrobe aga na ni.

Kite ayeke pëpe so aye so azo so wungo ti ala ayeke gi kete awara nga na afini ye so ala sigigi na ni amû lege na azo ngbundangbu mingi ti wara aye ti nzoni nga ti wara nzoni seni.

Ye oko, mbeni koli ayeke dä so lo yeke ti lo nde na atanga ni kue. A hinga lo pëpe ndali ti mbeni ye ti senda-ye so lo wara wala fini kode ti kaïngo kobela. Nde na so, koli so, so ayeke senge zo na so akui a sara nduru na ngu 2000 awe, azia na peko ti lo mbeni tënë, mbeni kpengba tënë so amû beku na zo nga adë bê ti zo. Tongana azo mingi abâ ngangu so tënë ti lo asara na ndo ti fini ti azo na ndo ti sese kue, ala yeda so biani lo yeke koli so achangé dunia.

Koli so ayeke Jésus Christ. Tënë wa la lo fa lani? Tënë so alingbi ti sara nyen na ndo ti fini ti mo?