David atene so lo “bâ Nzapa azia zo ti mbilimbili lâ oko pëpe, wala ahale ti lo ahunda kobe pëpe na lege ti [iringo] ye.” Lo yeke sara lani tënë ti ye so asi na lo na yâ ti gigi ti lo. Lo hinga nzoni mingi so Nzapa abi bê ti lo na zo lakue (Ps. 37:25). Me, tënë ti David so aye pëpe ti tene so mbeni wakua ti Jéhovah ayeke manke lâ oko ape ye so lo yeke na bezoin ni.

Na ambeni ngoi David atingbi na akpale so ayeke ngangu mingi. Lo wara mbeni kpale ni na ngoi so lo yeke kpe Saül. Aye ti tengo so David ayeke na ni angbâ mingi ape na lo hunda ti tene a mû na lo mapa ndali ti lo nga na azo so ayeke na lo (1 Sam. 21:1-6). Tongaso, na ngoi ni so David ‘ahunda kobe pëpe na lege ti iringo ye.’ Me na yâ ti ngoi ti ngangu so, lo hinga so Jéhovah azia lo ape. Biani, versê oko na yâ ti Bible atene ape so David ahara yanga na azo tongaso si lo wara kobe so lo yeke na bezoin ni ti ngbâ na fini.

Na Matthieu 6:33, Jésus adë bê ti e so Nzapa ayeke mû na awakua ti lo so ayeke be-ta-zo na lo, so azia aye ti Royaume na kozo ndo na yâ ti fini ti ala, ye kue so ala yeke na bezoin ni. Lo tene: “Ala ngbâ ti gi royaume ti Nzapa na mbilimbili ti lo kozoni, na fade a yeke zia na ala aye so kue [kobe, ye ti nyongo ni nga na bongo] na ndo ni.” Me, Jésus atene nga so ndali ti so a yeke sara ngangu na “aita” ti lo, nzara alingbi ti sara ala (Mat. 25:35, 37, 40). A yeke ye so asi na bazengele Paul. Na ambeni ngoi nzara ti kobe na ti ngu asara lo.—2 aCor. 11:27.

Jéhovah atene na e so a yeke sara ande aye ti ngangu nde nde na e. Ti mû lege na lo ti kiri tënë na tënë ti kite ti Zabolo, lo lingbi ti zia lege na aye ti ngangu ti si na e so asara si e wara pëpe ye so e yeke na bezoin ni (Job 2:3-5). Ambeni ita ti e, na tapande ala so a zia ala na yâ ti acamp ti aNazi ti sarango pasi na zo atingbi na angangu kpale ndali ti aye ti ngangu so a sara na ala. Kpale ti kobe ayeke lani mbeni mayele so Zabolo asara kua na ni ti buba dutingo be-ta-zo ti aTémoin ti Jéhovah. A-Témoin so angbâ be-ta-zo, Jéhovah azia ala ape. Lo zia si tara so asi na ala tongana ti so lo zia si aChrétien kue atingbi na atara nde nde. Me, kite ayeke dä ape so Jéhovah ayeke mû maboko na azo kue so ayeke bâ pasi ndali ti iri ti lo ti gbu ngangu (1 aCor. 10:13). A lingbi e girisa ape tënë so ayeke na aPhilippien 1:29 so atene: “A yeke ngbanga ti Christ si a mû pasa ni na ala ti tene ala mä gi na bê na lo pëpe, me nga ti tene ala bâ pasi ndali ti lo.”

Jéhovah atene so lo yeke bata awakua ti lo. Na tapande, Ésaïe 54:17 atene: “Ye ti bira so azo asara ti ke mo na ni alingbi sara ye na mo pëpe.” Tënë so nga na ambeni tënë ni nde amû lege na e ti hinga biani so Jéhovah ayeke bata awakua ti lo kue. Me na popo ti aChrétien so ambeni oko oko alingbi ti tingbi na atara so alingbi ti sara même si ala wara kuâ.