Mo diko a-article ti Tour ti Ba Ndo so asigi ade ti ninga ape so nzoni? Bâ wala mo peut ti kiri tënë na ahundango ndo so ge:

Tapande wa la Jéhovah azia na ndö ti fason so a doit ti sara ye na awali?

Lo sara ye na ala nde na akoli ape. Nzapa ayeke mä awali, lo pensé na atënë ti bê ti ala nga na akpale so ala wara. Nga lo sara confiance na ala ti sara kua ti lo.—w24.01, l. 15-16.

Tongana nyen la e peut ti sara ye alingbi na aÉphésien 5:​7, so atene: “Zia mbeni ye abungbi ala na azo so pëpe”?

Bazengele Paul amû wango na e ti bungbi pëpe na azo so ayeke sara si a yeke ngangu na e ti sara ye alingbi na andia ti Nzapa. Asioni kamarade so apeut ti duti azo so ayeke na terê ti e wala azo so e sara songo na ala na lege ti aréseaux sociaux.—w24.03, l. 22-23.

Atënë ti mvene wa la e doit ti bata terê ti e na ni?

E doit ti sara hange na atënë so aita atene sân ti gi ti hinga wala a yeke tâ tënë, amessage so alondo na azo so e hinga ala ape nga na atënë so alondo na a-apostat so asara ye mo bâ mo tene ala ye ti mä tâ tënë ti Bible.—w24.04, l. 12.

Nyen la e hinga na ndö ti fango ngbanga ti Jéhovah na ndö ti Gbia Salomon, azo ti Sodome na Gomorrhe so akui nga na azo so akui na ngoi ti Kota ngu so apika? Nyen la e hinga ape?

E hinga ape so Jéhovah afuti ala lani biani biani. Me e hinga so Jéhovah ahinga aye kue nga lo yeke sara nzoni bê mingi.—w24.05, l. 3-4.

Ti hinga so Nzapa ayeke “Kota tënë” ti e adë bê ti e tongana nyen? (Deut. 32:4).

E peut ti kpe na mbage ti Jéhovah ti bata terê ti e. Lo yeke Zo ti confiance so ayeke sara lakue ye alingbi na azendo ti lo. Lo yeke changé ape, sarango ye ti lo nga na aye so lo leke na bê ti lo ti sara ayeke changé lâ oko ape.—w24.06, l. 26-28.

Aye wa la apeut ti aidé mo ti duti nzoni na yâ ti fini congrégation so mo gue dä?

Ti zia bê ti mo na Jéhovah ayeke aidé mo tongana ti so a-aidé awakua ti lo ti ândö. Haka fini congrégation ti mo na ngbene ni ape. Duti na aye mingi ti sara na yâ ti fini congrégation ti mo nga gi ti wara afini kamarade.—w24.07, l. 26-28.

Aye ti manda wa la ayeke na yâ ti atoli ota so ayeke na Matthieu chapitre 25?

Toli ti ataba na angasa aluti mingi na ndö ti dutingo be-ta-zo. Toli ti amaseka-wali so asara ye na ndara nga na ala ti buba afa so a yeke kota ye ti tene e leke terê ti e nga lê ti e akpengba. Toli ti atalent afa nene ti sarango kua ngangu.—w24.09, l. 20-24.

Véranda ti temple ti Salomon ayo lani na nduzu coudée oke?

Na 2 Chronique 3:​4, ambeni ngbene manuscrit atene so a yeke coudée “120”, so ti tene a yo na nduzu mètre 53. Me ambeni manuscrit so a sara confiance na ni atene a yeke “coudée 20,” so ti tene a yo mètre 9. Na bango ni ti lingbi na konongo ti mur ti véranda ni, véranda ni apeut ti yo na nduzu coudée 120 ape, me coudée 20.—w24.10, l. 31.

Ti mbeni wakua ti mungo maboko, ti duti ‘koli so ayeke gï na wali oko’ aye ti tene nyen? (1 Tim. 3:12).

A ye ti tene lo sara mariage gï na wali oko nga lo sara lango-sioni ape. Na ndö ni, a yeke nzoni lo sara nzara ti mbeni wali nde ape.—w24.11, l. 19.

Ngbanga ti nyen la e peut ti tene so Jean 6:53 afa pëpe ye so azo adoit ti sara na ngoi ti Kobe ti Seigneur?

Jean 6:53 atene so azo abezoin ti te nyama ti terê ti Jésus nga ti nyon mênë ti lo. Jésus atene tënë so lani na gbâ ti aJuif so ayeke na Galilée na ngu 32, so ade amä na bê na lo ape. Me lo zia na sese Kobe ti Seigneur na Jérusalem ngu oko na pekoni. Kâ, Jésus ayeke sara tënë na azo so ayeke komande na lo na yayu.—w24.12, l. 10-11.