JÉHOVAH NZAPA awa aChrétien ti ye siriri mingi, ti sara si siriri aduti kota ye na yâ ti fini ti ala. Tongana e sara ni, siriri ayeke duti mingi na popo ti atâ wavorongo Nzapa. Ye so ayeke sara si azo so aye tënë ape ayeke ga na yâ ti congrégation.

Na tapande, mbeni kota zo ti nganga na Madagascar abâ siriri so ayeke na popo ti aTémoin ti Jéhovah. Lo tene na bê ti lo, lo tene: ‘Tongana mbeni lâ mbi ye ti gue na yâ ti mbeni bungbi ti vorongo Nzapa, mbi yeke gue na bungbi ti aTémoin ti Jéhovah.’ A si na mbeni ngoi, lo zia lege ti vorongo asioni yingo, lo sara si mariage ti lo ague oko na ye so Bible ahunda nga lo komanse ti voro Jéhovah, Nzapa ti siriri.

Legeoko tongana ti koli so, ngu oko oko azo saki mingi ayeke ga na yâ ti congrégation na ala wara siriri so ala ye ni mingi. Ye oko, Bible atene polele so tongana “kota bê nga na papa” ayeke na yâ ti congrégation, a lingbi ti buba yâ ti songo ti akamarade nga a lingbi ti ga na kpale (Jacq. 3:14-16). Ye ti nzoni ni ayeke so Bible amû na e anzoni wango so alingbi ti mû maboko na e ti tene mara ti akpale tongaso asi ape nga ti tene e kpengba siriri so ayeke na popo ti e na aita ti e. Zia e bâ tongana nyen la awango so amû maboko na ambeni ita na yâ ti ambeni ye so asi.

“A yeke lani ngangu na mbi ti mä terê na ita-koli so mbi na lo e yeke sara kua. Mbeni lâ na mbeni ngoi so e yeke son na ndö ti mba, azo use alï na ala bâ e na ngangu papa ni.”—CHRIS.

“Hio tongaso, mbeni ita-wali so mbi na lo e yeke fa ka tënë ake ti tene mbi na lo e gue na fango tënë atâa so e mä terê ti gue. Na pekoni, lo ke ti sara tënë na mbi. Mbi hinga ndani ape.”—JANET.

“Mbi yeke sara lani tënë na azo use na téléphone. Mbeni zo ni atene na mbi mo ngbâ nzoni na mbi pensé mbi tene lo kanga téléphone ni awe. Na pekoni, mbi sara sioni tënë na ndö ti lo na mbeni zo ni, me kozo zo ni so ade akanga téléphone ti lo ape.”—MICHAEL.

“Na yâ ti congrégation ti e, apionnier use akomanse ti wara kpale. Mbeni oko akomanse ti tene sioni tënë na ndö ti mba ti lo ni. Kpale ti ala ni azia vundu na bê ti ambeni zo.”—GARY.

Mo lingbi ti pensé so aye so asi so ayeke nga kota kpale ape. Me aye so alingbi ti zia vundu na bê ti azo so tënë ni abâ ala nga alingbi ti buba siriri ti congrégation. Me a yeke nzere na mo ti hinga so siriri akiri na popo ti aita so ndali ti so ala kue amû lani peko ti afango lege ti Bible. Afango ye ti Bible wa la ala sara kua na ni?

“Ala sara ngonzo na terê ti mba na lege pëpe.” (Gen. 45:24). Joseph amû lani wango so na aita ti lo ti koli na ngoi so ala yeke kiri na babâ  ti ala. So tâ wango ti ndara la! Tongana zo akanga bê ti lo ape si bê ti lo ason hio, lo lingbi ti sara si ngonzo agbu amba ti lo. Chris aga lani ti bâ so wokongo ti lo ayeke lani baba nga lo ye ti sara ye pëpe alingbi na aye so a fa na lo. So lo ye ti changé sarango ye ti lo, lo hunda pardon na ita so lo na lo apapa. Na pekoni Chris agi ti kanga bê ti lo na yâ ti aye. Na ngoi so ita so lo na Chris asara kua abâ ngangu so lo yeke sara ti changé, lo nga kue lo changé. Fadeso ala yeke sara na Jéhovah na siriri.

“Tongana azo abungbi ti pika patara pëpe, ye so ala leke ti sara atï na ngu.” (aProv. 15:22). Janet abâ lani so a lingbi lo sara ye alingbi na tâ tënë so. Lo mû desizion ti gue ti “pika patara” wala ti sara lisoro na ita-wali ni. Janet ahunda lo wala ni sara mbeni ye so ason bê ti lo. Na tongo nda ni lisoro ni ayeke lani ngangu, me ye ni achangé na ngoi so ala sara lisoro yeke na ndö ti kpale ti ala ni. Ita-wali ni aga ti bâ so lo mä lani yâ ti ye so asi so nzoni ape na Janet asara nga mbeni ye so ason bê ti lo ape. Lo hunda pardon na Janet na ala kiri akomanse ti sara kua ti Jéhovah legeoko.

“Tongaso, tongana mo ga na matabisi ti mo na gbele gbalaka, na kâ mo dabe ti mo so ita ti mo ayeke na mbeni tënë na terê ti mo, zia matabisi ti mo kâ na gbele gbalaka ni na mo gue. Leke tënë na ita ti mo kozoni.” (Mat. 5:23, 24). Peut-être mo dabe ti mo so Jésus amû lani wango so na yâ ti fango ye ti lo na ndö ti hoto. Vundu asara lani Michael ndali ti so lo bâ so lo tene atënë so ayeke na lege ni ape na ndö ti mbeni ita-koli. Lo leke lani na bê ti lo ti sara ngangu ti tene siriri akiri na popo ti ala. Lo sara terê ti lo kete lo hunda pardon na ita so lo son bê ti lo so. Nyen la asi na pekoni? Michael atene: “Ita ti mbi ti koli apardonné lani mbi na bê ti lo kue.” Songo ti kamarade ti ala akiri na place ni.

“Ala ngbâ ti kanga bê na amba ti ala na popo ti ala, na ti pardonné mba na bê ti ala kue, même tongana mbeni zo ayeke na tënë ti dema na terê ti mba ti lo.” (aCol. 3:12-14). Ti apionnier so apapa so, mbeni ancien asara ye na nzoni bê, lo mû maboko na ala ti gbu li ti ala na ndö ti ahundango ndo so: ‘Eskê e use kue e yeke na droit ti sara si azo asara vundu ndali ti papa ti e so? Eskê e yeke na mbeni kpengba raison ti kanga bê na mba pëpe nga ti ngbâ pëpe ti sara na Jéhovah na siriri?’ Ala yeda na wango ti ancien ni na ala sara ye alingbi na ni. Fadeso, ala mä terê nzoni nga ala yeke na ngia ti sara kua maboko na maboko na fango nzoni tënë.

A-oko wango so ayeke na aColossien 3:12-14 alingbi ti mû maboko na mo ti sara terê ti mo kete, ti pardonné mbeni zo so ason bê ti mo na ti zia ti pensé na ndö ti tënë ni. Azo mingi abâ so tongana ala sara terê ti ala kete, ala lingbi ti pardonné zo nga ala girisa tënë ni. Me ka tongana e gi ti pardonné zo ni me a yeke ngangu ti sara ni?  Mama-ndia so ayeke na Matthieu 18:15 alingbi ti mû maboko na e. Wango ti Jésus so ge asara tënë ti ye so mbeni zo adoit ti sara tongana mbeni mba ti lo asara kota siokpari na terê ti lo. Me peut-être e bezoin ti sara ye alingbi na mama-ndia so. E lingbi gï ti ga nduru na ita ni na nzoni bê nga e sara terê ti e kete e gi ti sara lisoro na lo na ndö ti tënë ni ti leke ni.

Bible amû nga ambeni wango nde. Ti sara ye alingbi na awango so, a lingbi mo lë “lengo ti yingo . . . ndoye, ngia, siriri, kangango bê ti ku, sarango nzoni na zo, nzoni bê, mabe, sarango ye na ngangu pëpe, kangango nzara ti bê.” (aGal. 5:22, 23). Legeoko tongana ti so mafuta asara si mbeni masini asara kua nzoni, asarango ye so, so alondo na Nzapa, amû lege na e ti leke atënë na popo ti e na amba ti e na ti duti na nzoni songo na ala.

Zo oko oko kue ayeke na asarango ye ti lo. E oko oko kue e yeke na sarango ye so ayeke nde nde, nga fason so e yeke bâ na aye nga e yeke fa atënë ti bê ti e ayeke nde nde. Ye so alingbi ti sara si songo so ayeke na popo ti e ayeke pendere mingi. Me asarango ye ti e so ayeke nde nde alingbi ti sara nga si e mä terê nzoni ape. Mbeni ancien so aninga na yâ ti kua ni amû tapande so: “A lingbi ti duti ngangu na mbeni zo so ayeke kamene mingi ti duti na terê ti mbeni zo so lakue ayeke na ngia nga lo yeke ndu azo na ngoi so lo yeke sara tënë na ala. Zo alingbi ti pensé so mara ti ye so ayeke nga kota ye ape; ye oko, a lingbi ti ga na akota kpale.” Mo pensé so azo so sarango ye ti ala ayeke nde nde adoit gï ti wara akpale na popo ti ala? Gbu li ti mo na ndö ti ambeni bazengele use. Sarango ye ti Pierre ayeke lani tongana nyen? Peut-être mo pensé so lo yeke mbeni zo so ayeke tene atënë kue so aga na li ti lo. Ka ti Jean? E lingbi ti pensé so lo yeke mbeni zo so aye amba ti lo nga lo yeke gbu li ti lo kozo si lo sara tënë wala lo sara mbeni ye. Pierre na Jean ayeke lani na asarango ye so ayeke nde nde. Me ala sara kua ti Jéhovah maboko na maboko  (Kus. 8:14; aGal. 2:9). Legeoko nga, aChrétien so sarango ye ti ala ayeke nde nde alingbi ti sara kua maboko na maboko laso.

Peut-être na yâ ti congrégation ti mo mbeni ita ayeke dä so atënë ti lo nga na asarango ye ti lo ason bê ti mo. Me dabe ti mo so Christ akui ndali ti lo nga a lingbi mo ye lo (Jean 13:34, 35; aRom. 5:6-8). Tongaso, ahon ti tene mo ke ti sara kamarade na lo wala ti gi ti sara tënë na lo ape, hunda terê ti mo: ‘Ita ti mbi ni asara mbeni ye so ague nde na ndia ti Jéhovah? Lo yeke gi na mayele ti son bê ti mbi? Wala gï asarango ye ti e la ayeke nde nde?’ Nga, hundango ndo so ayeke kota mingi: ‘Ambeni nzoni sarango ye ti lo wa la mbi ye ti duti na ni?’

Ndangba hundango tënë so ayeke kota mingi. Tongana zo ni aye ti sara lisoro mingi si mo yeke ti mo zo so ayeke kpô mingi, gbu li ti mo na ndö ti lege so a yeke ngangu na lo ape ti komanse lisoro na azo na fango tënë. Mo lingbi ti hunda na lo ti fa tënë legeoko na lo na ti bâ ye so mo lingbi ti manda na mbage ti lo. Tongana lo yeke zo so ayeke mû ye na azo me mo yeke sara ka ni ape, mo bâ ngia so zo ayeke wara ni na mungo ye na ambakoro, na azo so terê ti ala ason, wala na azo so abezoin mungo maboko? Kota ye ni ayeke so, atâa asarango ye ti ala ayeke nde nde, mo na ita ti mo ni alingbi ti ga nduru na Nzapa tongana ala zia li ti ala gï na ndö ti anzoni sarango ye ti mba. Tongana ala sara tongaso, peut-être ala yeke ga akota kamarade ape, me a lingbi ti mû maboko na ala ti ga nduru na mba na a yeke sara si siriri amaï na popo ti ala nga na yâ ti congrégation.

Peut-être asarango ye ti Évodie na Syntyche ayeke lani nde nde. Ye oko, bazengele Paul awa ala “ti tene ala duti na oko bibe na yâ ti Seigneur.” (aPhil. 4:2). E kue e ye ti sara na Jéhovah legeoko na aita ti e nga ti maï siriri na yâ ti congrégation.

Legeoko tongana asioni pere so ayeke kono na popo ti afleur, sioni bibe so e yeke na ni na  mbage ti aita ti e alingbi ti ga sioni mingi tongana e zi ni ape. Tongana bê ti zo ason ngangu, a lingbi ti ga na kpale na yâ ti congrégation. Tongana e ye Jéhovah nga na aita ti e, e yeke sara kue ti bata siriri ti congrégation.

Tongana e leke atënë na popo e ti duti na siriri, li ti e ayeke kpe ti bâ anzoni ye so ayeke ga na pekoni. Bâ ye so asi na mbeni Témoin, lo tene: “Mbi bâ lani so mbeni ita-wali ayeke sara ye na mbi mo bâ mo tene mbi yeke molenge. Tënë ni ason mbi lani. Na ngoi so ngonzo akomanse ti gbu mbi ngangu, mbi komanse ti ne lo ape na yâ ti atënë ti mbi. Mbi pensé lani so: Lo mû na mbi pëpe nengo so mbi lingbi na ni, mbi nga kue mbi yeke ne lo ape.’”

Na pekoni, ita so akomanse ti gbu li ti lo na ndö ti asarango ye ti lo wani. Lo tene: “Mbi komanse ti bâ asioni sarango ye ti mbi, na vundu asara mbi mingi. Mbi bâ lani so a lingbi mbi changé bango ndo ti mbi. Na peko ti so mbi sambela Jéhovah na ndö ti tënë ni, mbi vo mbeni kete cadeau na ita-wali ni nga mbi sû mbeti na lo na lê ti mbeni carte ti hunda pardon na lo ndali ti sioni bango ndo ti mbi. E gbu mba na kate na e use kue e mä terê ti girisa tënë ni. Kpale ayeke na popo ti e encore ape.”

Azo kue ayeke na bezoin ti siriri. Ye oko, tongana azo abâ so mbeni ye alingbi ti ga na kpale na dutingo ti ala wala tongana baba alï ala, a lingbi ti sara si ala sara mbeni ye so ayeke buba yâ ti siriri. Tënë so ayeke tâ tënë na ndö ti azo so avoro Jéhovah ape, me a lingbi siriri aduti na popo ti azo ti Jéhovah. Yingo ti Jéhovah apusu Paul ti tene tënë so na aChrétien, lo tene: “Mbi voro yanga na ala ti tambela alingbi na iringo ndo so lani a iri na ala, ti sara terê ti ala kete na yâ ti aye kue nga ti sara ye na ngangu pëpe, ti duti na kangango bê ti ku; ala kanga bê na mba na yâ ti ndoye, ala sara ngangu ti bata beoko ti yingo na yâ ti kamba ti siriri so abungbi ala oko.” (aÉph. 4:1-3). “Kamba ti siriri so abungbi” e oko so ayeke ye ti ngangu ngere. Zia e ngbâ lakue ti kpengba ni nga e leke atënë kue so alingbi ti londo na popo ti e.