1. Ye so a futa ti zi azo aga na aye ti nzoni wa?

YE SO Jésus Christ afuta ti zi azo amû lege na e ti wara gbâ ti aye ti nzoni. Azi yanga-da na amolenge ti Adam kue so aye ye ti mbilimbili ti ga ande mbage ti sewa ti Nzapa. Ye so a futa ti zi azo amû nga lege na e ti wara pasa ti ngbâ ande na fini lakue lakue na ngia. Me ye so a futa ti zi azo ayeke ga gï na aye ti nzoni pëpe na azo so amä yanga, a yeke sara nga ambeni ye mingi. Jésus ayeda na bê ti lo kue ti kui ndali ti mbeni kpengba tënë so abâ a-ange nga na azo.​—aHéb. 1:8, 9.

2. (a) Akpengba tënë wa la Jésus azia na yâ ti sambela ti lo? (Bâ foto so ayeke na tongo nda ti article so.) (b) Nyen la e yeke bâ na yâ ti article so?

² Ngu use tongaso kozo si Jésus akui ti mû fini ti lo tongana ye so afuta ti zi azo, lo fa na adisciple ti lo ti tene ala sambela, ala tene: “Babâ ti e so mo yeke na yayu, zia a sara si iri ti mo aga nzoni-kue. Zia Royaume ti mo aga. Zia a sara ye so bê ti mo aye, na yayu legeoko nga na ndö ti sese.” (Mat. 6:9, 10). Ti mû lege na e ti kiri singila mingi ndali ti ye so a futa ti zi azo, zia e  bâ tongana nyen la a ndu sarango si iri ti Nzapa aga nzoni-kue, komandema ti Royaume ti Nzapa nga sarango ye so bê ti Nzapa aye.

3. Iri ti Jéhovah aye ti fa nyen na ndö ti lo? Tongana nyen la Satan abuba iri ti Jéhovah?

³ Kozo ye so Jésus asara tënë ni na yâ ti sambela so lo fa na adisciple ti lo ayeke sarango si iri ti Nzapa aga nzoni-kue. Iri ti Jéhovah aye ti sara tënë ti lo Jéhovah ni wani, so ti tene asarango ye ti terê ti lo. Lo yeke na ngangu mingi nga lo yeke mbilimbili ahon azo kue na yâ ti dunia. Na yâ ti mbeni sambela ni nde, Jésus atene lo yeke “Babâ so [a]yeke nzoni-kue”. (Jean 17:11). Ndali ti so Jéhovah ayeke nzoni-kue, amama-ndia nga na andia so alondo na lo ayeke nzoni-kue. Me na yaka ti Éden, na lege ti handa, Satan atene so Nzapa ayeke na droit pëpe ti fa na azo aye so ala doit ti sara. Satan atene mvene na ndö ti Jéhovah, na sarango tongaso lo buba iri ti Nzapa so ayeke nzoni-kue.​—Gen. 3:1-5.

4. Tongana nyen la Jésus asara si iri ti Nzapa aga nzoni-kue?

⁴ Me ti Jésus, lo ye ti lo iri ti Jéhovah mingi (Jean 17:25, 26). Jésus asara si iri ti Nzapa aga nzoni-kue. (Diko Psaume 40:8-10.) So Jésus so ayeke mbilimbili-kue angbâ be-ta-zo na ngoi so lo yeke na sese, lo fa so a yeke na lege ni ti tene Jéhovah afa na a-ange nga na azo aye so ala doit ti sara ni nga lo yeke na droit ti fa ni. Même na ngoi so Satan asara si Jésus abâ pasi ngbii juska na kuâ, lo ngbâ be-ta-zo na Babâ ti lo ti yayu na yâ ti aye kue. So Jésus angbâ be-ta-zo, lo fa so mbeni zo so ayeke mbilimbili-kue alingbi ti ngbâ ti sara ye mbilimbili-kue alingbi na andia ti Nzapa.

5. Tongana nyen la e lingbi ti sara si iri ti Nzapa aga nzoni-kue?

⁵ Tongana nyen la e lingbi ti fa so e ye iri ti Jéhovah? E lingbi ti fa ni na lege ti sarango ye ti e. Jéhovah ahunda na e ti duti nzoni-kue. (Diko 1 Pierre 1:15, 16.) So aye ti tene so e voro gï Jéhovah oko nga e mä yanga ti lo na bê ti e kue. Même tongana a sara ye ti ngangu na e, e yeke sara kue ti sara ye alingbi na amama-ndia ti lo nga na andia ti lo so ayeke mbilimbili. Tongana e sara aye so ayeke mbilimbili, e yeke zia si lumière ti e aza na ayeke mû gloire na iri ti Jéhovah (Mat. 5:14-16). E yeke fa na yâ ti sarango ye ti e so andia ti Jéhovah ayeke nzoni nga so atënë ti Satan ayeke mvene. E yeke mbilimbili-kue pëpe, tongaso e yeke sara afaute. Me tongana e sara ni, e yeke changé bê ti e nga e yeke sara kue ti zia lege ti sarango aye so ayeke buba iri ti Jéhovah.​—Ps. 79:9.

6. Ngbanga ti nyen la Jéhovah alingbi ti bâ e tongana azo ti mbilimbili atâa so e yeke mbilimbili-kue pëpe?

⁶ Na lege ti sacrifice ti Christ, Jéhovah ayeke pardonné siokpari ti azo so ayeke na mabe. Lo yeda ti tene azo so aduti awakua ti lo aduti azo so amû terê ti ala na lo. Jéhovah atene aChrétien so a soro ala ti gue na yayu ayeke amolenge ti lo nga azo so ayeke “ambeni taba” ayeke akamarade ti lo (Jean 10:16; aRom. 5:1, 2; Jacq. 2:21-25). Tongaso, même laso ye so a futa ti zi azo amû lege na e ti duti na nzoni songo na Babâ ti e nga ti sara si iri ti lo aga nzoni-kue.

7. Aye ti nzoni wa la e yeke wara ande ni na gbe ti komande ti Royaume ndali ti ye so a futa ti zi azo?

⁷ Na yâ ti sambela so Jésus afa na adisciple ti lo, lo tene: “Zia royaume ti mo aga.” Ye so a futa ti zi azo ague oko na Royaume ti Nzapa tongana nyen? Ye so a futa ti zi azo  asara si a bungbi azo 144000 ti duti agbia na aprêtre legeoko na Jésus na yayu (Apoc. 5:9, 10; 14:1). Jésus na amba ti lo, so ayeke komande legeoko na lo, ayeke komande na yâ ti Royaume ti Nzapa na ala yeke sara si azo so amä yanga ayeke bâ nzoni na lege ti ye so a futa ti zi azo na yâ ti ngu saki oko. Sese ayeke ga ande paradis, azo so ayeke be-ta-zo ayeke ga ande mbilimbili-kue nga mbage ti sewa ti Nzapa so ayeke na yayu na ti so ayeke na sese ayeke duti ande beoko (Apoc. 5:13; 20:6). Jésus ayeke mboko ande li ti ngbo ni nga lo yeke zi aye kue so aga na peko ti kpengbango-li ti Satan.​—Gen. 3:15.

8. (a) Jésus amû maboko na adisciple ti lo tongana nyen ti bâ so Royaume ti Nzapa ayeke kota ye mingi? (b) Laso e yeke fa tongana nyen so e yeke mû maboko na Royaume ni?

⁸ Na ngoi so Jésus ayeke lani na sese, lo mû maboko na adisciple ti lo ti bâ so Royaume ti Nzapa ayeke kota ye mingi. Hio na peko ti batême ti Jésus, lo fa “nzoni tënë ti Royaume ti Nzapa” na ando kue so lo gue dä (Luc 4:43). Na yâ ti atanga ti tënë so lo tene na adisciple ti lo kozo ti kiri na yayu, lo fa na ala ti fa tënë ti témoin ti lo na “ambage ti sese so ayeke tâ yongoro.” (Kus. 1:6-8). Na lege ti kua ti fango tënë ti Royaume, azo ti sese kue ayeke wara lege ti manda ye na ndö ti ye so a futa ti zi azo na ti ga azo so ayeke duti na gbe ti Royaume ni. Laso, e yeke fa so e mû maboko na Royaume ni na lege so e yeke mû maboko na aita ti Christ so ayeke na sese na yâ ti kua so a mû na ala ti fa nzoni tënë ti Royaume na yâ ti dunia kue.​—Mat. 24:14; 25:40.

9. Ngbanga ti nyen la e hinga so Jéhovah ayeke sara ande ye so lo leke na bê ti lo ti sara teti azo?

⁹ Jésus aye ti tene nyen tongana lo tene: “Zia a sara ye so bê ti mo aye”? Jéhovah ayeke Lo so asara aye kue. Tongana Jéhovah amû yanga ti tene mbeni ye asi, ye ni ayeke si (És. 55:11). Lo yeke zia lege pëpe na kpengbango-li ti Satan ti buba yâ ti ye so lo leke na bê ti lo ti sara teti azo. Na tongo nda ni, Jéhovah aleke lani ti tene amolenge ti Adam na Ève so ayeke mbilimbili-kue amû ndö ti sese kue (Gen. 1:28). Tongana fade Adam na Ève akui sân ti dü molenge, ka ye so Nzapa aleke na bê ti lo ti tene ahale ti ala amû ndö ti sese kue ayeke ga tâ tënë pëpe. Ni la, na peko ti so Adam na Ève asara siokpari, Jéhovah amû lege na ala ti dü amolenge. Na lege ti ye so a futa ti zi azo, Nzapa ayeke mû ande lege na azo kue so amä na bê ti ga mbilimbili-kue nga ti duti na fini lakue lakue. Jéhovah aye azo nga lo ye ti tene e duti na fini so lo ye lani ti tene e duti na ni.

10. Ye so a futa ti zi azo ayeke ga na ye ti nzoni na azo so akui awe tongana nyen?

¹⁰ Ka ti azo milliard mingi so akui sân ti wara lege ti hinga Nzapa nga ti sara na lo? Ye so a futa ti zi azo asara si a yeke zingo azo so akui. Babâ ti e so ayeke na yayu so aye e mingi ayeke kiri na ala ande na fini nga lo yeke mû lege na ala ti manda ye na ndö ti ye so lo leke na bê ti lo ti sara nga ti wara fini ti lakue lakue (Kus. 24:15). Jéhovah aye ti tene azo aduti na fini, me lo ye ti tene ala kui pëpe. So fini alondo na lo, lo yeke ga Babâ ti azo kue so azingo na kuâ (Ps. 36:9). A yeke tâ na lege ni so Jésus afa na e ti sambela: “Babâ ti e so mo yeke na yayu.” (Mat. 6:9). Jéhovah amû na Jésus kota kua na yâ ti zingongo azo na kuâ (Jean 6:40, 44). Na yâ ti paradis, Jésus ayeke sara ye alingbi na kua so a mû na lo. Lo tene: “Mbi yeke zingongo ti akuâ nga na fini.”​—Jean 11:25.

11. Nyen la Nzapa aye ndali ti “azo mingi mingi”?

¹¹ Jéhovah ayeke sara nzoni gï na mbeni kete wungo ti azo pëpe, ndali ti so Jésus  atene: “Zo so asara ye so bê ti Nzapa aye, zo so la ayeke ita ti mbi ti koli, ita ti mbi ti wali nga mama ti mbi.” (Marc 3:35). Nzapa aye ti tene “azo mingi mingi” so a lingbi ti diko wungo ti ala pëpe, so alondo na popo ti amara kue, akete mara kue nga na ayanga ti kodro kue aga awakua ti lo. Azo so amä na bê na ye so Christ afuta ti zi azo nga so asara ye so bê ti Nzapa aye ayeke duti na popo ti azo so adekongo, atene: “E wara salut ndali ti Nzapa ti e so aduti na ndö ti trône, nga ndali ti Molenge ti taba ni.”​—Apoc. 7:9, 10.

12. Ye so Jéhovah aleke na bê ti lo teti azo so amä yanga asigi tongana nyen na yâ ti sambela so Jésus afa na adisciple ti lo?

¹² E manda ye mingi na ndö ti ye so Jéhovah aleke na bê ti lo ti sara teti azo na yâ ti sambela so Jésus afa na adisciple ti lo. Ti gue oko na sambela so, e ye ti sara kue si iri ti Nzapa aga nzoni-kue wala ti bâ ni na nene ni (És. 8:13). Nda ti iri ti Jésus wani aye ti tene “Jéhovah ayeke salut,” nga salut so e yeke wara na lege ti ye so a futa ti zi azo amû nengo nga na gloire na iri ti Jéhovah. Jéhovah ayeke sara ande kua na Royaume ti lo ti tene azo so amä yanga abâ nzoni ti peko ti ye so a futa ti zi azo. Sambela so Jésus afa na adisciple ti lo adë bê ti e so mbeni ye alingbi pëpe ti kanga lege na ye so bê ti Nzapa aye.​—Ps. 135:6; És. 46:9, 10.

13. Tongana e wara batême a fa nyen?

¹³ Mbeni kpengba ye so e lingbi ti sara ti fa singila ti e ndali ti ye so a futa ti zi azo ayeke ti mû terê ti e na Jéhovah nga ti wara batême. Tongana e sara tongaso e fa so e yeke na mabe na ye so a futa ti zi azo nga so “e yeke ti Jéhovah.” (aRom. 14:8). Tongana e wara batême e fa so e hunda na Nzapa ti mû maboko na e ti duti na nzoni conscience  (1 Pi. 3:21). Jéhovah ayeke mä e na lege so lo yeke sara kua na mênë ti Christ ti sukula e. E yeke na kite oko ape so lo yeke mû na e ye kue so lo mû zendo ti mû na e.​—aRom. 8:32.

14. Ngbanga ti nyen la a hunda na e ti ye amba ti e?

¹⁴ Mbeni ye nde so e lingbi ti sara ti fa singila ti e ndali ti ye so a futa ti zi azo ayeke nyen? Ndali ti so Jéhovah asara aye kue na ndoye, lo ye ti tene awakua ti lo kue afa so ndoye ayeke kota sarango ye ti terê ti ala (1 Jean 4:8-11). E yeke fa so e ye ti duti “amolenge ti Babâ ti [e] so ayeke na yayu” tongana e ye amba ti e (Mat. 5:43-48). Commandement so aga na peko ti commandement so ahunda ti ndoye Jéhovah ayeke ti ndoye amba ti e (Mat. 22:37-40). Mbeni kpengba lege so e lingbi ti fa so e ndoye azo ayeke ti fa na ala nzoni tënë ti Royaume ti Nzapa. Tongana e ye amba ti e, e yeke fa gloire ti Nzapa. Ndoye ti Nzapa ayeke ‘ga mbilimbili-kue na yâ ti e’ tongana e sara ye alingbi na commandement so a hunda ti ye azo, mbilimbili aita ti e.​—1 Jean 4:12, 20.

15. (a) Aye ti nzoni wa la e wara na mbage ti Jéhovah? (b) Aye ti nzoni wa la e yeke ku ni?

¹⁵ Lege ayeke zi ti tene a pardonné e kue kue kue tongana e mä na bê na ye so a futa ti zi azo. Bible adë bê ti e so a lingbi ti ‘zi asiokpari’ ti e. (Diko Kusala 3:19-21.) Tongana ti so e bâ fade, na lege ti ye so a futa ti zi azo, Jéhovah amû awakua ti lo so lo soro ala na lege ti yingo ti gue na yayu ti ga amolenge ti lo (aRom. 8:15-17). Ti e so e yeke “ambeni taba”, a yeke mo bâ mo tene Jéhovah asara mbeni mbeti na iri ti e ti mû e ti ga amolenge ti lo. Na ngoi so e ga mbilimbili-kue nga e hon na yâ ti ndangba tara awe, Jéhovah ayeke duti ande na ngia ti sû maboko ti lo na gbe ti mbeti ni ti mû e tongana amolenge ti lo so ayeke na sese so lo ye ala mingi (aRom. 8:20, 21; Apoc. 20:7-9). Jéhovah ayeke ye ande amolenge ti lo kue teti lakue lakue. Aye ti nzoni ti peko ti ye so a futa ti zi azo ayeke ngbâ ande lakue lakue (aHéb. 9:12). Matabisi so Jéhovah amû na e ayeke kota mingi. Mbeni zo wala mbeni ngangu ti zi ni na maboko ti e ayeke dä ape.

16. Ye so a futa ti zi azo amû maboko na e tongana nyen ti duti na liberté?

¹⁶ Satan alingbi pëpe ti sara mbeni ye ti kanga lege na azo so achangé bê ti ala ti duti na yâ ti sewa ti Jéhovah. Jésus aga lani na sese na lo kui “gï fani oko biani biani awe”. Tongaso, ye so a futa ti zi azo ayeke teti lakue lakue (aHéb. 9:24-26). Kuâ ti Jésus azi na li ti e biani biani ngbanga so e wara ndali ti Adam. Grâce na sacrifice ti Christ, a zi e na gbe ti ngangu ti dunia ti Satan nga e yeke encore na mbeto ti kuâ ape.​—aHéb. 2:14, 15.

17. So Jéhovah aye e so mo bâ ti mo ni tongana nyen?

¹⁷ Azendo ti Nzapa kue ayeke ga ande tâ tënë. Gï tongana ti so andia so Jéhovah amû ti fa lege na aye so ayeke na yâ ti dunia achangé ape, Jéhovah ayeke changé lâ oko pëpe. Lo yeke zia ande vundu na bê ti e lâ oko pëpe (Mal. 3:6). Jéhovah amû na e aye mingi lo mû na e gï fini ape. Lo ye e. “E hinga na e mä na bê na ndoye so Nzapa ayeke na ni na mbage ti e.” (1 Jean 4:16). Sese kue ayeke ga ande mbeni pendere paradis nga azo kue ayeke duti ande na mara ndoye so Nzapa ayeke na ni. Na pekoni, acréature kue so ayeke na yayu nga na sese ayeke tene ande: “Zia sepela, gloire, ndara, singila, nengo, komandema nga na ngangu ague na Nzapa ti e lakue lakue nga kpu na kpu. Amen.”​—Apoc. 7:12.