Terê ti Don na Margaret * anzere ti yamba molenge ti ala ti wali na sewa ti lo na da ti ala. Margaret, so ândö ayeke sara kua ti tongo kobe na so lo gue na retraite awe, ato macaroni na fromage mbeni kobe so a-âta ti lo ti koli use aye ni mingi.

Tongana sewa ni kue aduti awe, Margaret amû kobe ni lo zia ni na ndö ti table na milieu ti ala. Lo zi yanga ti sembe ni, na azo kue abâ so gï sauce ti fromage so angbâ wâ la ayeke na yâ ti sembe ni. Margaret agirisa ti to ni na macaroni! *

Atâa ngu ti mo ayeke oke wala mo hinga ye tongana nyen, e kue e yeke sara ka afaute. A peut ti duti mbeni tënë so e tene sân ti gbu li ti e, wala e sara mbeni ye ti nzoni me e sara ni na nzoni ngoi ni ape, wala e girisa ti sara mbeni ye. Ngbanga ti nyen e yeke sara afaute? E yeke sara tongana nyen tongana e sara faute? Eskê e peut ti kpe ti sara afaute? Ti duti na mbeni nzoni bango ndo na ndö ti afaute ayeke mû maboko na e ti wara akiringo tënë na ahunda so.

Tongana e sara mbeni ye ti nzoni, a yeke nzere na e tongana a gonda e nga tongana e hinga so e lingbi biani na gonda ni. Me tongana e sara mbeni faute, atâa e sara ni na mbana ape wala azo ahinga ni ape, eskê e yeke yeda biani so e sara faute la? Ti sara tongaso, a hunda ti sara terê ti e kete.

Tongana e pensé gï na e wani mingi, e yeke bâ afaute so e sara tongana senge ye, e yeke bi tënë ni na li ti mbeni zo nde wala e yeke ke même so e la e sara faute ni. Mara ti sarango ye tongaso, kpale ti peko ni ayeke ka sioni mingi. Kpale ni apeut ti ngbâ gï tongaso sân ti tene a leke ni, nga a peut ti bi tënë ni na li ti ambeni zo senge senge. Atâa e bere mbeni faute so e la e sara ni, me zia e girisa ape so mbeni lâ, “zo oko oko na popo ti e ayeke kiri tënë ande na Nzapa ndali ti lo wani.”​—aRomain 14:12.

Nzapa ahinga ndani so e yeke sara afaute. Na yâ ti mbeti ti Psaume, a fa Nzapa tongana Nzapa so “asara nzoni bê na zo nga lo bâ mawa ti zo”; lo “yeke ngbâ ande lakue pëpe ti gi ti bâ afaute so zo asara, nga lo yeke ngbâ lakue ti bata ngonzo na terê ti zo pëpe.” Lo hinga so siokpari ayeke na terê ti azo nga “lo dabe ti lo so e yeke fuku ti sese.”​—Psaume 103:8, 9, 14.

Na ndö ni, tongana babâ so ayeke sara nzoni bê na zo, Nzapa aye si e so e yeke amolenge ti lo, e duti na oko bango ndo ti lo na ndö ti afaute (Psaume 130:3). Atënë ti lo, so ayeke na yâ ti Bible, amû na e gbâ ti awango nga na afango lege so alingbi ti aidé e tongana e sara afaute nga tongana amba ti e asara afaute.

Mingi ni, tongana mbeni zo asara faute, lo yeke sara kue ti bi tënë ni na li ti amba ti lo wala lo yeke gi araison ti fa so tënë so lo tene wala ye so lo sara ayeke na lege ni. Nde na so, tongana mo tene mbeni tënë so ason bê ti mbeni zo, hunda pardon, tene mara ti tënë ni so encore ape nga sara si ala ngbâ lakue kamarade. Mo sara mbeni faute so asara si mo yeke nzoni ape wala asara sioni na mo wani wala na mbeni zo nde? Ahon ti sara ngonzo na terê ti mo wani wala ti bi tënë  ni na li ti amba ti mo, sara kue ti leke gï tënë ni awe. Tongana e ngbâ ti tene so faute ni ayeke ti e ape, kpale ni ayeke kiri aga ande ngangu. Ye so ayeke nzoni ti sara ayeke ti manda ye na lege ti faute ni so, ti leke ni na ti sara ye so ayeke nzoni ti sara.

Me, tongana mbeni zo la asara faute, hio e yeke fa so zo ni so asara ye na lege ni ape. A yeke nzoni e sara ye alingbi na wango ti Jésus so: “Ye kue so ala ye azo asara na ala, ala sara ni na azo ni nga.” (Matthieu 7:12). Tongana mo sara faute, atâa a yeke kota faute ape, kite ayeke dä ape so mo ye si amba ti mo abâ mawa ti mo wala même ala girisa na ndö ni biani biani. Ngbanga ti nyen mo kue mo bâ mawa ti amba ti mo tongaso ape?​—aÉphésien 4:32.

Mbeni bakari atene so zo ayeke sara afaute tongana lo “bâ yâ ti aye nzoni ape, lo hinga ye na ndö ti mbeni ye nzoni ape, wala lo sara hange na mbeni ye ape.” A lingbi e hinga so nyen na nyen kue mbeni ye oko na popo ti aye so e fa so ayeke si na e kue. Ye oko, e yeke sara faute mingi ape tongana e sara ye alingbi na amama-ndia ti Bible.

Mbeni mama-ndia ni ayeke na aProverbe 18:13, a tene: “Tongana zo afa bibe ti lo na ndö ti mbeni tënë kozo ti hinga ye nzoni na ndö ni, a yeke mbeni ye ti buba nga ye ti kamene mingi.” Ni la, tongana mo mû kete ngoi ti mä tënë ni kue nga ti bâ tënë so mo yeke kiri na ni ayeke sara si mo tene asioni tënë ape nga ti sara pëpe mbeni ye so mo regretté na pekoni. Tongana zo aduti kpo ti mä tënë ayeke sara si lo bâ yâ ti aye nzoni nga lo yeke kpe ti sara faute.

Mbeni mama-ndia ti Bible ni nde atene: “Tongana lege ni ayeke dä, na ala lingbi ti sara mbeni ye, zia ala duti na siriri na azo kue.” (aRomain 12:18). Sara kue ti tene siriri nga na mango terê aduti na popo ti mo na amba ti mo. Na ngoi so mo yeke sara kua na amba ti mo, dengi mê ti mä ala, ne ala nga kpengba ala. Na yâ ti angoi tongaso, zo apeut ti pardonné mbeni tënë so mba ti lo atene sân ti gbu li, wala mbeni sarango ye so ayeke na lege ni ape nga zo apeut ti kanga bê na mbeni tënë so ason bê ti zo na ti leke tënë ni yeke na ndoye.

Gi ti manda ye na lege ti afaute so mo yeke sara. Ahon ti tene mo gi araison ndali ti mbeni tënë so mo tene wala mbeni ye so mo sara, gi ti duti na anzoni sarango ye ahon ti kozo. Peut-être mo yeke na bezoin ti asarango ye tongana kangango bê ti ku, sarango nzoni bê, kangango nzara ti bê, sarango ye na ngangu pëpe, siriri nga na ndoye (aGalate 5:22, 23). Mo yeke manda so ti peko ambeni ye ayeke dä so mo hinga so mo doit ti sara ape. Me zia si mo sara vundu ahon ndö ni ape ndali ti ye ni so. Tongana mo tene atënë ti ngia alingbi ti sara si kpale akaï.

Ti duti na nzoni bango ndo na ndö ti afaute so e yeke sara, a yeke aidé e ti sara ye na lege ni tongana e sara faute. A yeke sara si e yeke na siriri e ti bê nga e yeke duti na siriri na amba ti e. Tongana e sara kue ti manda ye na lege ti afaute so e sara, e yeke ga zo ti ndara nga e yeke ga nzoni zo ahon ti kozo na lê ti amba ti e. Tongana e sara tongaso, e yeke sara vundu ahon ndö ni ape nga e yeke wara asioni pensé na ndö ti e wani ape. Ti hinga so amba ti e kue ayeke sara afaute ayeke sara si e ga nduru na ala. Kota ye ni ayeke so, e yeke wara ye ti nzoni tongana e mû tapande ti ndoye ti Nzapa nga na nzara so lo yeke na ni ti pardonné na bê ti lo kue.​—aColossien 3:13.

Eskê faute so Margaret asara, si e sara tënë ni fade na tongo nda ni so, abuba ngoi so ala passé na sewa so? Ên-ën. Azo ni kue abâ gï ye so asara ala ngia na yâ ti ye so asi so, mbilimbili Margaret, nga kobe ni anzere na ala atâa so macaroni ayeke na yâ ni ape! Angu mingi na pekoni, a-âta ti Margaret asara lisoro ti ye ni so na amolenge ti ala nga ala fa apendere souvenir na ndö ti a-âta ti ala. A yeke gï faute la lo sara lani so!