Exode 6:1-30
6 Jéhovah atene na Moïse: “Mo yeke bâ ye so mbi yeke sara ande na Pharaon.+ Na lege ti ngangu ti mbi, mbi yeke sara si lo zia lege na ala ti gue, na lege ti ngangu ti mbi, mbi yeke sara si lo tomba ala ti sigi na kodro ti lo.”+
2 Nzapa atene na Moïse: “Mbi yeke Jéhovah Nzapa ti mo.
3 Mbi yeke si lani na Abraham, na Isaac nga na Jacob tongana Nzapa so ngangu ti lo ahon angangu kue,+ me âdu ti iri ti mbi Jéhovah,+ ade mbi fa ndani kue na ala pëpe.*+
4 Mbi te nga mbele ti mbi na ala ti mû na ala kodro ti Canaan, kodro so ala duti ândö dä tongana awande.+
5 Mbi mä dema ti azo ti Israël so azo ti Égypte ayeke sara ala na ngbâa so, ni la mbi dabe ti mbi na mbele ti mbi.+
6 “Tongaso, mo tene na azo ti Israël: ‘Mbi Jéhovah, mbi yeke zi ala na gbe ti joug ti azo ti Égypte, na gbe ti ngbâa ti ala,+ mbi yeke yôro maboko ti mû ala ti kiri na ni nga mbi yeke punir azo ti Égypte ngangu.+
7 Mbi yeke mû ala ti ga azo ti mbi, na mbi yeke ga Nzapa ti ala;+ ala yeke hinga ande so mbi Jéhovah Nzapa ti ala la mbi yeke zi ala na gbe ti joug ti azo ti Égypte.
8 Mbi yeke gue na ala na kodro so mbi deba yanga ti mbi* ti mû na Abraham, Isaac na Jacob; na mbi yeke mû ni na ala ti ga ti ala.+ Mbi yeke Jéhovah Nzapa ti ala.’”+
9 Moïse atene tokua so na azo ti Israël, me ala mä lo pëpe ndali ti so bê ti ala anze nga ndali ti ngangu kua ti ngbâa so ala yeke sara.+
10 Na pekoni, Jéhovah atene na Moïse:
11 “Gue mo tene na Pharaon, gbia ti Égypte, ti zia azo ti Israël ti sigi na kodro ti lo.”
12 Me Moïse akiri tënë na Jéhovah, lo tene: “Bâ, so azo ti Israël amä mbi pëpe so,+ Pharaon ayeke mä mbi ande tongana nyen, so mbi hinga ti sara tënë nzoni ape so?”+
13 Jéhovah akiri afa na Moïse na Aaron atënë so ala yeke tene na azo ti Israël nga na Pharaon, gbia ti Égypte, tongaso si a zi azo ti Israël na Égypte.
14 So a yeke iri ti azo so ayeke na li ti asewa ti akotara ti ala la. Ruben ayeke kozo molenge ti Israël,+ amolenge ti lo ti koli ayeke: Hanok, Pallu, Hesron na Carmi.+ So ahale ti Ruben la.
15 Amolenge ti Siméon ti koli ayeke Jémuel, Jamin, Ohad, Jakin, Zohar na Shaül, molenge ti mbeni wali ti kodro ti Canaan.+ So ahale ti Siméon la.
16 Iri ti amolenge ti Lévi ti koli+ ayeke Guershon, Kohath na Mérari.+ Na lege ti ala si ahale ti ala abâ gigi. Ngu ti Lévi kue ayeke 137.
17 Amolenge ti Guershon ti koli, so a bungbi ala na lege ti asewa ti akotara ti ala, ayeke Libni na Shiméï.+
18 Amolenge ti Kohath ti koli ayeke Amram, Izhar, Hébron na Uzziel.+ Ngu ti Kohath kue ayeke 133.
19 Amolenge ti Mérari ti koli ayeke Mahli na Mushi.
So asewa ti mara ti Lévi la. Na lege ti ala si ahale ti ala abâ gigi.+
20 Amram amû Jokébèd ita ti babâ ti lo ti ga wali ti lo.+ Na pekoni, lo dü na lo Aaron na Moïse.+ Ngu ti Amram kue ayeke 137.
21 Amolenge ti Izhar ti koli ayeke Coré,+ Népheg na Zicri.
22 Amolenge ti Uzziel ti koli ayeke Mishaël, Elzaphan+ na Sithri.
23 Aaron amû Élishéba ti ga wali ti lo; Élishéba ayeke molenge ti Aminadab, Élishéba ayeke ita ti Nahshon.+ Na pekoni, lo dü na lo Nadab, Abihu, Éléazar na Ithamar.+
24 Amolenge ti Coré ti koli ayeke Assir, Elcanah na Abiasaph.+ So asewa ti Coré la.+
25 Éléazar,+ molenge ti Aaron, amû mbeni oko ti amolenge ti Putiel ti wali. Na pekoni, lo dü na lo Phinéhas.+
So ayeke iri ti azo so ayeke na li ti ahale ti akotara ti azo ti mara ti Lévi, so a bungbi ala na lege ti asewa ti ala la.+
26 So ayeke iri ti ahale ti azo so na popo ti ala a yeke wara Aaron na Moïse dä la; Aaron na Moïse la Jéhovah atene na ala, atene: “Ala sigi na azo ti Israël na kodro ti Égypte, na lege ti agroupe ti ala nde nde.”+
27 A yeke Aaron na Moïse la asara tënë lani na Pharaon, gbia ti Égypte, ti zi azo ti Israël na Égypte.+
28 Na lango ni so, tongana Jéhovah asara tënë na Moïse na kodro ti Égypte,
29 Jéhovah atene na lo: “Mbi yeke Jéhovah Nzapa ti mo. Mo tene na Pharaon, gbia ti Égypte, atënë kue so mbi tene na mo so.”
30 Moïse atene na Jéhovah: “Bâ! Mbi hinga ti sara tënë nzoni pëpe, tongaso, Pharaon ayeke mä ande mbi tongana nyen?”+
Akete tënë na terê ni
^ Na Hébreu: “mbi sara si ala hinga mbi pëpe.”
^ Na Hébreu: “mbi yôro maboko ti mbi na nduzu.”
