Apocalypse 5:1-14
5 Na pekoni, mbi bâ mbeni rouleau na yâ ti maboko ti Lo so aduti na ndö ti trône ni;+ rouleau ni ayeke na yâ ti maboko ti lo ti koli. A sû mbeti na yâ ni nga na peko ni, a kanga ni ngangu si a kpo anzoroko mbasambala na ndö ni.
2 Mbi bâ mbeni ngangu ange so ato mbela na kota go, atene: “Zo wa la si akpa ti zi yâ ti rouleau so nga ti zi anzoroko ni?”
3 Me atâa na yayu wala na ndö ti sese wala na gbe ti sese, mbeni zo ayeke dä pëpe so alingbi ti zi yâ ti rouleau ni wala ti bâ ndo na yâ ni.
4 Mbi tï na kota toto ngbanga ti so a wara mbeni zo oko pëpe so akpa ti zi yâ ti rouleau ni wala ti bâ ndo na yâ ni.
5 Me mbeni ancien ni oko atene na mbi: “Kaï toto ni. Bâ, bamara so ayeke ti mara ti Juda,+ gunda+ ti David,+ asö benda awe+ ti zi yâ ti rouleau ni nga na anzoroko mbasambala ni.”
6 Na pekoni, mbi bâ mbeni molenge ti taba+ so mo bâ mo tene a fâ lo awe+ aluti na milieu ti trône ni na popo ti acréature osio so ayeke na fini nga na popo ti a-ancien+ ni. Lo yeke na adidi mbasambala nga na alê mbasambala, alê ti lo ni aye ti sara tënë ti ayingo mbasambala ti Nzapa+ so a tokua ala na ndö ti sese kue.
7 Hio, lo gue lo mû rouleau ni so Lo so aduti na ndö ti trône ni agbu na yâ ti maboko ti lo ti koli so.+
8 Tongana lo mû rouleau ni awe, acréature osio so ayeke na fini nga na a-ancien 24+ atï na gbe ti Molenge ti taba ni, zo oko oko ayeke na harpe nga na akete dû ti sembe ti lor so dukane asi yâ ni. (Dukane ni aye ti sara tënë ti asambela ti azo ti be-vulu.)+
9 Ala he mbeni fini bia,+ ala tene: “Mo lingbi biani ti mû rouleau ni nga ti zi anzoroko ni, ngbanga ti so a fâ mo awe na mo vo na mênë ti mo azo na Nzapa,+ azo ti akete mara kue, azo ti ayanga ti kodro kue, azo ti akodro kue nga na azo ti amara kue,+
10 na mo sara si ala ga mbeni royaume+ na aprêtre ti Nzapa ti e,+ na ala yeke komande tongana agbia+ na ndö ti sese.”
11 Mbi bâ ndo, na mbi mä go ti a-ange mingi so angoro terê ti trône ni, na acréature so ayeke na fini nga na a-ancien ni, wungo ti ala ayeke gbani gbani nga saki na saki,+
12 so asara tënë na kota go, atene: “Molenge ti taba so a fâ lo ândö+ so alingbi biani ti tene a mû na lo komandema, mosoro, ndara, ngangu, nengo, gloire nga na tënë nzoni.”+
13 Na pekoni, mbi mä acréature kue so ayeke na yayu, na ndö ti sese, na gbe ti sese,+ na lê ti ngu-ingo nga na aye kue so ayeke na yâ ti aye so, atene: “Zia a iri tënë nzoni na ndö ti Lo so aduti na ndö ti trône ni+ nga na ndö ti Molenge ti taba ni,+ nga zia a mû nengo,+ gloire na ngangu na ala lakue lakue nga kpu na kpu.”+
14 Acréature osio so ayeke na fini atene: “Amen!” nga a-ancien ni akuku na ala voro Nzapa.
