Ésaïe 65:1-25
65 “Mbi zia si ala so ahunda tënë ti mbi pëpe agi mbi.
Mbi zia si ala so agi mbi pëpe awara mbi.+
Mbi tene na mbeni mara so adi iri ti mbi pëpe, mbi tene: ‘Mbi la! Mbi la!’+
2 Na yâ ti lango ni kue, mbi gbara yâ ti maboko ti mbi na mbeni mara so azo ni ayeke azo ti kpengba-li,+azo so ayeke mû sioni lege,+azo so ayeke mû gï peko ti apensé ti ala wani,+
3 azo so lakue ala yeke son bê ti mbi polele tongaso,+azo so ayeke mû sandaga na yâ ti ayaka+ nga ala yeke zö sandaga na ndö ti abrique.
4 Ala yeke duti na popo ti acimetière;+lakue na bï, ala yeke duti na ando so zo abâ ni pëpe,*ala yeke te nyama ti cochon+nga ala yeke nyon soupe ti aye so afun awe* na yâ ti asembe ti ala.+
5 Ala tene: ‘Ngbâ kâ; ga nduru na mbi pëpe,ndali ti so mbi yeke nzoni-kue ahon mo.’
Azo so ayeke tongana guru na yâ ti hôn ti mbi, tongana wâ so ayeke gbi na yâ ti lango ni kue.
6 A sara tënë ti aye ni so na mbeti na lê ti mbi.
Mbi yeke duti kpô pëpe,me mbi yeke kiri na ala peko ti ye so ala sara,+mbi yeke pesé futa ti ala kue ti mû na ala*
7 ndali ti afaute ti ala nga na ti akotara ti ala.”+ Tënë ti yanga ti Jéhovah la.
“So ala zö asandaga na ndö ti ahotonga ala sara si iri ti mbi abuba na ndö ti akete hoto,+kozo ye so mbi yeke sara ayeke ti pesé futa ti ala kue ti mû na ala.”*
8 Jéhovah atene:
“Tongana ngu ti lê ti vigne ayeke na yâ ti alê ti vigne ni,mbeni zo ayeke tene: ‘Buba ni pëpe ndali ti so nzoni ye ayeke na yâ ni.’*
Mbi nga kue mbi yeke sara tongaso ndali ti awakua ti mbi,mbi yeke futi ala kue pëpe.+
9 Mbi yeke sara si mbeni molenge* abâ gigi na lege ti Jacobnga mbi yeke mû ahoto ti mbi na zo so abâ gigi na lege ti Juda.+
A yeke ga ti azo ti mbi so mbi soro ala,na awakua ti mbi ayeke sara kodro dä.+
10 Saron+ ayeke ga ande ndo ti tengo pere ti ataba,na Popo-hoto* ti Akor+ ayeke ga ndo ti wungo terê ti abagara.
So ayeke ye so a yeke sara ndali ti azo ti mbi so agi mbi.
11 Me ti ala, ala yeke na popo ti azo so adö Jéhovah azia,+azo so li ti ala agirisa na ndö ti hoto ti mbi so ayeke nzoni-kue,+azo so ayeke leke table ndali ti nzapa so ayeke mû chance na zonga na azo so ayeke tuku vin na yâ ti akopo ndali ti nzapa so ayeke diko ye so alingbi ti si na zo.
12 Tongaso, mbi yeke zia si a fâ ala na épée+na ala kue ayeke kuku na sese si a fâ ala,+ndali ti so mbi iri ndo, me ala yeda pëpe;mbi sara tënë, me ala ke ti mä mbi.+
Ala ngbâ ti sara ye so ayeke sioni na lê ti mbina ala soro ti sara ye so anzere na mbi pëpe.”+
13 Ndani la bâ tënë so Jéhovah, Seigneur ti dunia kue, atene la:
“Bâ, awakua ti mbi ayeke te ye nzoni, me ti ala, ala yeke duti na nzara.+
Bâ, awakua ti mbi ayeke na ye ti nyongo ni,+ me ti ala, go ti ala ayeke hule hulengo.
Bâ, awakua ti mbi ayeke sara ngia,+ me ti ala, kamene ayeke sara ala.+
14 Awakua ti mbi ayeke dekongo na ngia ndali ti so bê ti ala ayeke na ngia,me ti ala, ala yeke toto ndali ti vundu so ayeke na bê ti alanga ala yeke toto ndali ti kä so ayeke na bê ti ala.
15 Ala yeke zia na peko ti ala mbeni iri so azo ti mbi so mbi soro ala ayeke deba na ni,na mbi Jéhovah, Seigneur ti dunia kue, mbi yeke fâ ala oko oko kue,me awakua ti mbi,* mbi yeke iri ande ala na mbeni iri nde,+
16 tongaso si zo kue so ayeke gi ti wara tënë nzoni na ndö ti sese,Nzapa ti tâ tënë* ayeke iri tënë nzoni na ndö ti lo;na zo kue so adeba yanga ti lo na ndö ti sese,lo yeke deba na iri ti Nzapa ti tâ+ tënë.*
Azo ayeke dabe ti ala ande na angbene ye ti vundu* pëpe;mbi yeke kiri ti bi lê ti mbi dä pëpe.+
17 Bâ, mbi yeke créé afini yayu na fini sese;+azo ayeke dabe ti ala na angbene ye encore ape,nga azo ayeke bi bê ti ala na ni pëpe.+
18 Tongaso ala dekongo na ngia nga ala duti na ngia lakue ndali ti aye so mbi yeke créé.
Mbi yeke sara si Jérusalem aga ye so amû ngia na zonga mbi yeke sara si azo ni azia ngia na bê ti azo.+
19 Mbi yeke duti na ngia ndali ti Jérusalem, nga terê ti mbi ayeke nzere ndali ti azo ti mbi;+a yeke mä na yâ ti Jérusalem encore ape go ti azo so atoto wala ti azo so adekongo na vundu.”+
20 “A yeke wara pëpe na ndo ni so mbeni molenge so aduti na fini gï teti kete ngoi.
A yeke wara nga pëpe mbeni mbakoro so akui kozo ti tene ngangu ti lo ahunzi kue.
Zo kue so akui na ngu ngbangbo oko, azo ayeke bâ lo tongana mbeni kete molenge.
Nga a yeke deba wasiokpari, atâa so lo sara ngu ngbangbo oko.*
21 Azo ayeke leke ada, na ala yeke lango na yâ ni,+nga ala yeke fâ ayaka ti vigne, na ala yeke te lengo ni.+
22 Ala yeke leke da si mbeni zo nde alango dä pëpe;nga ala yeke lu ye si mbeni zo nde ate ni pëpe.
Fini ti azo ti mbi ayeke ninga tongana ti keke,+nga azo so mbi soro ala ayeke wara ngia na yâ ti kua so ala sara na maboko ti ala.
23 Ala yeke bâ pasi* gï senge senge pëpe,+nga ala yeke dü amolenge ti wara vundu na pekoni pëpe,ndali ti so ala yeke amolenge* so Jéhovah airi tënë nzoni na ndö ti ala,+ala na ahale ti ala.+
24 Même kozoni si ala toto na mbi, mbi yeke kiri tënë na ala;na ngoi so ala ngbâ ti sara tënë, mbi yeke mä ala.
25 Mbo ti ngonda na kete taba ayeke te ye ndo oko.
Bamara ayeke te asaleté ti peko ti alê ti kobe tongana koli-bagara.+
Kobe ti ngbo ayeke duti ande fuku ti sese.
Ala yeke sara ye ti sioni pëpe, na ala yeke buba ye pëpe na ando kue so ayeke na ndö ti hoto ti mbi so ayeke nzoni-kue,”+ tënë ti yanga ti Jéhovah la.
Akete tënë na terê ni
^ A lingbi nga ti tene “akpangba so zo ayeke luti na gbe ni ti bâ ndo.”
^ Wala “aye so aga sioni awe.”
^ Na Hébreu: “mbi yeke tuku futa ni na yâ ti poche ti kota bongo so ayeke na kate ti ala.”
^ Na Hébreu: “mbi yeke tuku futa ni na yâ ti poche ti kota bongo so ayeke na kate ti ala.”
^ Na Hébreu: “tufa ayeke dä.”
^ Na Hébreu: “mbeni ngongoa.”
^ Wala “Kpangbala ndo.”
^ Na Hébreu: “lo.”
^ Wala “so ayeke be-ta-zo.” Na Hébreu: “Amen.”
^ Wala “so ayeke be-ta-zo.” Na Hébreu: “Amen.”
^ Wala “angangu kpale.”
^ A lingbi nga ti tene “Nga zo so akui kozoni si lo wara ngu ngbangbo oko, a yeke bâ lo tongana zo so a deba lo.”
^ Wala “sara kua ngangu.”
^ Na Hébreu: “ngongoa.”
