Na dimanche lango 24 ti février 1924 na lakui, fini radio WBBR ti aWamandango Bible a akomanse pan ti sara kua. Kozo émission so apassé lani tongana nyen? Azo wa la amä ni lani? Tongana nyen la aTémoin ti Jéhovah angbâ ti sara kua lani na afini ye so awandara asigi na ni ti tene azo amä “nzoni tënë ti Royaume na ndö ti sese kue so azo ayeke dä”?—Matthieu 24:14.

 Kozo émission ni akomanse lani na 20:30 na asara l’heure use. A sara émission ni na yâ ti fini studio so a leke ni na Staten Island, na New York. Ita Ralph Leffler, so ayeke bâ ndo na ndö ti programme ni si atoto nzoni, atene: “Terê ti azo kue so ayeke lani na yâ ti studio ni anzere.” Lo kiri lo tene: “Eskê ambeni zo ayeke mä ande e la? Mbi branché a-appareil ni, na e komanse programme ni nga e hinga so aye kue ayeke passé bien.”

 Ita Victor Schmidt so abâ ndo na ndö ti radio ni la azi yanga ti kozo émission ni. Lo komanse programme ni na lege so lo présenté azo ti pikango mozoko nga na azo ti hengo bia so ahinga kua ti ala nzoni, ala kue ayeke lani aWamandango Bible. Kozoni, mbeni ita ayeke joué abia ni so a composé ni na lege ti piano. Na pekoni, Cora Wellman a-interprété bia “Bale-gumbaya na gumbaya”, so aluti na ndö ti parabole ti Jésus so asara tënë ti taba so agirisa (Luc 15:4-7). Ambeni so a-interprèté abia ni aga na pekoni, so na popo ni a yeke wara Frederick Franz so ahe bia so li ni ayeke “Zo so achangé bê ti lo” so asara tënë ti toli ti molenge so agirisa wala molenge so abuba aye ti lo kue.—Luc 15:11-25.

 Joseph Rutherford, so ayeke bâ ndo na ndö ti kua ti aWamandango Bible na ngoi ni kâ, amû lani diskur ti inauguration ti radio ni so mama-tene ni ayeke “Aux intérêts du royaume du Messie.” Lo tene: “So Seigneur azia lege ti tene radio so abâ gigi, e yeke sûr so lo ye ti tene e sara kua na ni ti fa ye na azo na ndö ti gango tâ tënë ti akpengba prophétie na ndö ti Lo.”

 Mingi ti azo so ayeke lani na nord-est ti États-Unis amä kozo émission so. Mbeni zo so amä lani émission ni, so ayeke na gbata ti Morrisville na Vermont so asara kilomètre 320, atene: “Mbi yeke na ngia ti tene na ala so mbi mä émission ni nzoni. . . . Go ti Rutherford atoto nzoni. . . . Mbi mä alê ti tënë oko oko kue so lo tene.” Mbeni zo so ayeke lani même na Monticello, na Floride, amä émission ni. Fini radio ni amarché bien, nga mingi ti azo atokua alettre ti tene merci.

 A fa lani tënë ti Royaume na lege ti radio ni teti angu 33, b mingi ti ando ni ayeke na mbage ti nord-est ti États-Unis. Me, a connecté radio WBBR na ambeni radio na asara si mingi ti azo so ayeke na États-Unis, na Canada nga na ambeni ndo so ayo amä lani émission ni. Na ndö ni, Annuaire des Témoins de Jéhovah ti ngu 1975 atene: “A yeke na ngu 1933 la a sara kua na aradio 408 ti fa tënë ti Royaume na yâ ti acontinent omene, nga a diffusé adiskur 23 783 na yâ ti aradio ni . . . Na temps ni so, azo apeut ti capté na ndö ti radio ti ala ti mä émission ti Watch Tower na même heure na yâ ti aradio nde nde. Azo so ayeke na ando nde nde so amä radio ni apeut ti mä atënë ti tâ tënë so ayeke mû gloire na Nzapa.”

 Na ngoi so aWamandango Bible akomanse lani ti sara kua na radio WBBR, awafango tënë ti Royaume na États-Unis ayeke lani gï 1 064. A-émission so a-aidé lani kete groupe ti awafango tënë ni ti ndu bê ti azo mingi na nzoni tënë. Me na ngu 1957, wungo ti awafango tënë ti Royaume na États-Unis ayeke lani 187 762, nga awafango tënë na yâ ti dunia kue ayeke lani 653 273. Ye ti pekoni ni ayeke so, grâce na formation so aita awara na ngoi ti abungbi asara si ala yapu na fango tënë da na da nga na alege kue so azi.

 Mara ti guengo na li ni tongaso apusu aita-koli so ayeke mû li ni ti kiri ti bâ aye ti nzoni so aga na peko ti sarango kua na radio nga ti haka ni na fango tënë da na da. Ye ti pekoni ayeke nyen? Ala mû desizion ti kä radio WBBR, so ayeke gï oko radio so Watch Tower Society ayeke lani na ni. A kä lani radio ni na lango 15 ti avril 1957. Na bï so na ndade ni a sara ndangba émission ni, a hunda Ita Nathan Knorr na ndani so a kä radio ni. Ita Knorr atene so wungo ti aTémoin ti Jéhovah ayeke gue na li ni ayeke ndali ti so ala mû mbage mingi na fango tënë da na da. Lo tene: “Azo mingi ahinga tâ tënë na lege ti radio WBBR.” Lo kiri lo tene: “Wungo ti aTémoin ti Jéhovah ague na li ni mingi na ando so radio WBBR ayeke dä ape ahon ando so radio ni ayeke dä.” Tongaso, aita ni aga ti bâ so fango tënë da na da ayeke aidé azo mingi ti mä nzoni tënë ti Royaume ahon ti radio. Me, a ye ti tene ape so e awakua ti Jéhovah e yeke sara kua encore ape na radio. Angu mingi na pekoni, e kiri e sara kua na ni, me na mbeni lege nde.

 Na lango 6 ti octobre 2014, mbeni ye so ahon gbungo li ti zo asi na yâ ti bungbi ti Jéhovah; a yeke na lango ni so la a sigi na mbeni chaîne ti télé na ndö ti Internet so a iri ni Télé JW. Laso, aTémoin ti Jéhovah nga na ambeni zo ayeke connecté ti bâ kuasinga ti Télé JW so ayeke sigi nze na nze na lege ti Internet, application JW Library, a-appareil wala na lege ti satellite. c Me na yâ ti ambeni kodro, aTémoin ti Jéhovah angbâ ti sara kua na radio nga na télé ti fa na tënë. Ala yeke sara kua na ni tongana nyen?

 Na yâ ti angu so ahon ade ti ninga ape, bungbi ti Jéhovah asara kua na radio nga na télé so ayeke ti bungbi ti e ape ti tene azo amä akapa ti bungbi so a yeke sara ni yenga oko oko, nga na akota bungbi na ando so kpale ti connexion ayeke dä. Mingi ti azo so ayeke aTémoin ti Jéhovah ape so ayeda na tënë ni awara lege ti manda ye mingi na lege ti Bible. Ni la, na popo ti ngu 2021 nga na ngu 2022, akota zo so ayeke bâ ndo na ndö ti aradio afa na filiale ti Afrique de l’Est so, mingi ti azo so ayeke aTémoin ti Jéhovah ape akiri singila ndali ti akapa ti abungbi ti e. Mingi ti azo so amä akapa ni na Kenya, na Soudan du Sud nga na Tanzanie ahunda même ti tene a manda Bible na ala.

 Me, a yeke na lege ti fango tënë da na da, présentoir nga na site jw.org la aTémoin ti Jéhovah awara lege ti fa tënë ti Royaume na azo na yâ ti dunia kue. Site Internet ti e amû lege na azo so ayeda na tënë ni ti wara Bible nga na ambeti ti e na ayanga ti kodro ahon 1 080, nga aye ni so kue ayeke gï senge senge. Ala peut nga ti wara kiringo tënë na ahunda ti ala na ndö ti Bible, ti hinga l’heure nga na ndo so e yeke sara abungbi ti e dä. Ye ti peko ti aye so ayeke so, a yeke laso facile na azo ti manda ye na ndö ti nzoni tënë ti Royaume ti Nzapa ahon ti so a yeke sara lani kozo. Ti vrai ni, a yeke fa tënë ni “na ndö ti sese kue so azo ayeke dä,” tongana ti so Bible atene kozo awe.—Matthieu 24:14.