Nginza so a dépensé ndali ti aye ti bira na yâ ti dunia kue ahon 2 240 milliard ti dollars na 2022. A dépensé kota mbage ni ndali ti lingo ti Russie na ngangu ti mû Ukraine. Ti gue oko na mbeni sango so mbeni ndokua (Stockholm International Peace Research Institute) asigi na ni na avril 2023. Sango ni afa so na 2022:

•   Nginza so a dépensé ndali ti aye ti bira na Europe “ague na li ni 13 % na yâ ti ngu 2022, ti fa so nginza so a dépensé na Europe na yâ ti ngu ni so ayeke mingi ahon nginza so a dépensé ngu oko oko depuis so guerre froide ahunzi.”

•   “Nginza so a yeke dépensé na Russie … ague na li ni presque 9,2 %. Lo yeke lani cinquième kodro so adépensé nginza mingi ndali ti aye ti bira na yâ ti dunia kue, me lo kiri na troisième position.”

•   États-Unis la ayeke premier kodro so ayeke dépensé nginza mingi ndali ti aye ti bira, so ti tene, “tongana a mû nginza kue so a dépensé ndali ti aye ti bira na yâ ti dunia kue, dépense ti lo ayeke 39 %.”

 “Docteur Nan Tian, so ayeke oko ti ambeni zo so asû lani sango ti ndokua ni, (Stockholm International Peace Research Institute) atene: “Guengo na li ni ti adépense ndali ti aye ti bira na yâ ti dunia kue so a sara na yâ ti angu so ahon ade ti ninga ape, a fa so e yeke vivre na yâ ti mbeni dunia so kpale ti insécurité aga ngangu.”

 Bible atene kozo awe so akodro so akomande dunia kue laso ayeke mä terê ape nga afa oko beku so ayeke ga na siriri na azo.

•   Bible airi ngoi so e yeke dä so “ngoi ti nda ni”.—Daniel 8:19.

•   Mbeti ti Daniel afa kozo awe so na ngoi ni so, akodro so akomande dunia kue ayeke sara mandako na popo ti ala. Akodro so ayeke pusu mba ti tiri wala ayeke gi ti sara mandako na popo ti ala ti fa zo so ayeke na ngangu. Sarango mandako ni ayeke pusu ala ti dépensé gbâ ti “amosoro” wala nginza.—Daniel 11:40, 42, 43.

 Ti hinga ye mingi na ndö ti prophétie ti Bible so ahon gbungo li ti zo so, bâ vidéo Aprophétie so aga tâ tënë: Chapitre 11.

•   Bible afa so Nzapa ayeke zi ande agouvernement ti azo. Lo yeke “sigi na mbeni royaume so a yeke futi ni lâ oko pëpe. Royaume ni ayeke gue na ambeni zo nde pëpe. Royaume ni so ayeke neka aroyaume so kue nga ayeke futi ala biaku biaku, na gï royaume so oko la ayeke ngbâ lakue lakue.”—Daniel 2:44.

•   Na yâ ti kete ngoi, Jéhovah a Nzapa ayeke ga ande na tâ siriri so ayeke ngbâ lakue lakue, mbeni ye so akara azo ti sara ni. Lo yeke sara ni tongana nyen? Na lege ti Royaume ti lo so ayeke na yayu, lo yeke zi ande aye ti bira kue nga na sarango ye ti ngangu na zo.—Psaume 46:8, 9.

 Ti hinga ye mingi na ndö ti ye so Royaume ti Nzapa ayeke sara ande, diko article “Na gbe ti Royaume ti Nzapa, ‘siriri ayeke duti dä mingi.’”