A-Évangile asara tënë ti mbeni koli so iri ti lo ayeke Jean Baptiste, so ayeke fa lani tënë na ndö ti Royaume ti Nzapa na gbata ti Judée. Eskê mbaï so Bible asû na ndö ti lo ayeke tâ tënë? Gbu li na ndö ti atënë so:

•   Bible atene: “Jean Baptiste aga, lo yeke fa tënë na yâ ti benyama ti Judée. Lo tene: ‘Ala changé bê ti ala, ngbanga ti so Royaume ti yayu aga nduru awe.’” (Matthieu 3:1, 2). Eskê ambeni senge mbeti nde aye peko ti tënë so? En.

   Mbeni wasungo mbaï Flavius Josèphe, so avivre lani na ngoi ti akozo Chrétien, asara tënë ti mbeni koli so iri ti lo ayeke “Jean, so azo amû na lo iri ti Baptiste,” na so “ayeke wa aJuif lani ti sara ye na lege ni na yâ ti gigi ti ala” ti “mû bê ti ala kue na Nzapa” nga ti “wara batême.”​—Histoire ancienne des juifs, livre XVIII.

•   Bible atene so Jean asuku lani na Hérode Antipas, so akomande lani sese ti Galilée nga na Pérée. Hérode atene lani so ni yeke mbeni Juif so abata Ndia ti Moïse. Me Jean atene na lo so lo sara ye na lege ni ape la lo sara mariage na Hérodiade so ayeke wali ti ita ti lo ti koli (Marc 6:18). Ambeni zo nde ayeda na tënë ti Bible so.

   Wasungo mbaï Josèphe atene so Antipas “asara nzara ti Hérodiade” na sân kamene lo hunda lo na mariage. Hérodiade ayeda, na lo ke koli ti lo lo gue lo sara mariage na Antipas.

•   Bible atene so “azo ti Jérusalem, azo ti sese ti Judée kue nga na ti akodro kue so ayeke na terê ti Ngu ti Jourdain ayeke ga na mbage ti [Jean], na lo batize ala na yâ ti Ngu ti Jourdain.”​—Matthieu 3:5, 6.

   Josèphe kue ayeda na tënë so. Lo sû na mbeti lo tene so azo ayeke ga lani “gbani gbani” ti bâ Jean na atënë so lo yeke tene lani na ala andu tâ bê ti ala ngangu.

 A yeke polele so Josèphe, so ayeke mbeni wasungo mbaï so avivre na ngoi ti akozo Chrétien, ahinga na bê ti lo kue so Jean Baptiste ayeke lani dä biani. E kue e yeke sûr so lo yeke lani dä biani.