•   “Ndo achauffé mingi na Chine ‘ahon ti kozo’ nga ndo ahule ngangu na temps ti ndowa ahon ti so ayeke si ka.”—The Guardian, 7 septembre 2022.

•   “Na ambeni mbage ti Afrique, ndo ahule ngangu na peko ti terê teti ngu oku.”—UN News, 26 août 2022.

•   “Kpale ti ngangu buru asi na yâ ti moitié ti Europe, na peut-être mara ni ade ti si ape asara ngu 500 awe.”—BBC News, 23 août 2022.

 Mingi ti aspécialiste atene so mara ti aburu tongaso ayeke ngbâ ti si na ye ni ayeke ga ande pire. Eskê mbeni beku ayeke dä ndali ti nzoni gigi ti kekereke? Bible atene nyen na ndö ni?

 Bible atene kozo awe so na ngoi ti e:

•   ‘Na ando nde nde na peko ti terê, kota nzara ayeke tï.’—Luc 21:11.

 Aburu asara si mingi ni kota nzara ayeke tï. Mara ti kota nzara so asara si azo ayeke bâ pasi nga ala ayeke kui, na aprophétie ti Bible ayeke ga tâ tënë.—Apocalypse 6:6, 8.

 Bible afa mbeni kota raison ti kpale ti aburu so ayeke ga gï pire. A tene:

•   “Zo so ayeke tambela, a yeke même na lo wani ti fa lege na gere ti lo pëpe.”—Jérémie 10:23.

 Ye so aye ti tene so azo apeut ape ti “fa lege na gere ti [ala]” nzoni wala ti komande terê ti ala wani. Mingi ti adesizion so azo amû na lege ni ape ayeke ga na angangu buru nga na kpale ti ngu.

•   Mingi ti ascientifique ayeda so aye so azo ayeke sara la asara si ndo achauffé mingi na yâ ti dunia, na ye ti peko ni ayeke so angangu buru asara mingi ahon ti kozo.

•   Aye so azo asara na kota bê nga sân ti gbu li na ndö ti kekereke ti azo asara si abuba agbako, pupu nga ala sara ye na lege ni ape na amosoro ti sese. Na ye ti peko ni ayeke so, a buba ambeni ye so asara si ngu ayeke lakue dä.

 Me, Bible amû mbeni beku na azo.

 Bible amû zendo so Nzapa ayeke hunzi ande kpale ti ngu so ayeke laso dä so. Na lege wa?

1.  1. Nzapa ayeke ‘futi azo so ayeke futi sese.’ (Apocalypse 11:18). Lo yeke zi ande azo so asara si azo awara akpale ti ngu, so ti tene azo ti sioni, azo ti sarango bê ti ye so abuba aye so angoro e.—2 Timothée 3:1, 2.

2.  2. ‘Sese so ndowa asara si ahule ngangu ayeke ga ande lando so asosongo asigi dä.’ (Ésaïe 35:1, 6, 7). Nzapa ayeke leke ande akpale so angangu buru aga na ni nga lo yeke sara si sese aga mbeni paradis so ngu ayeke dä gbani.

3.  3. ‘Mo bâ lege ti sese nzoni, mo sara si aye alë dä gbani nga sese ni ayeke na anzoni ye mingi.’ (Psaume 65:9). Nzapa ayeke sara ande tufa na ndö ti sese na ayeke sara si kobe nga na nzoni ngu ayeke si singo ndali ti azo kue.