YE TI MANDA 8
Ngbanga ti nyen Nzapa azia lege na aye ti sioni nga na pasi?
1. Aye ti sioni abâ gigi tongana nyen?
Nzapa azia lege na azo ti komande teti angu mingi si e hinga so komandema ti zo alingbi ti zi akpale ti e pëpe
Aye ti sioni abâ gigi na ndo ti sese na ngoi so Satan atene kozo mvene. Satan ayeke lani mbeni ange so siokpari ayeke na tere ti lo pëpe, me lo “ngbâ na yâ ti tâ tënë pëpe”. (Jean 8:44). Lo sara si nzara ti tene azo avoro lo adü na yâ ti bê ti lo, atâa so gi Nzapa oko la alingbi ti tene azo avoro lo. Satan atene mvene na kozo wali, Ève, na lo gue na Ève ti mä yanga ti lo ahon ti mä yanga ti Nzapa. Adam amû peko ti Ève, lo ke yanga ti Nzapa. Desizion so Adam amû so asara si pasi nga na kuâ aga na pekoni.—Diko Genèse 3:1-6, 19.
Na handango Ève ti ke yanga ti Nzapa, Satan azi lê ti kengo droit ti Nzapa ti komande dunia. Mingi ti azo amû peko ti Satan, ala ke komandema ti Nzapa. Tongaso, Satan aga “mokonzi ti dunia so”.—Diko Jean 14:30; 1 Jean 5:19.
2. Mbeni ye ti sioni ayeke na yâ ti aye so Nzapa asara lani?
Sioni oko ayeke pëpe na yâ ti aye kue so Nzapa aleke. Azo nga na a-ange so Nzapa asara ala lani alingbi ti sara aye kue so Nzapa ahunda na ala (Deutéronome 32:4, 5). Nzapa asara e na lo mû na e liberté ti soro ti sara ye ti nzoni wala ti sara ye ti sioni. Liberté so amû lege na e ti fa na Nzapa so e ndoye lo.—Diko Jacques 1:13-15; 1 Jean 5:3.
3. Ngbanga ti nyen Nzapa azia lege na pasi juska laso?
Ngbene ye so kengo yanga abâ gigi na Éden, Jéhovah amû lege na azo ti duti nde na komandema ti lo teti mbeni ngoi. Ngbanga ti nyen? Ti fa so, nde na lo, ngangu kue so azo ayeke sara ti komande alingbi ti ga na ye ti nzoni na azo pëpe (Zo-ti-fa-tene 7:29; 8:9). Angu 6 000 so ahon afa polele so tënë so ayeke tâ tënë. Komandema ti azo awara lege pëpe ti sara si bira, aye ti sioni, fango ngbanga ti kirikiri nga na kobela ahunzi.—Diko Jérémie 10:23; aRomain 9:17.
Me, azo so ayeda na komandema ti Nzapa awara ye ti nzoni na pekoni (Ésaïe 48:17, 18). Na yâ ti kete ngoi Jéhovah ayeke futi angorogbia ti azo kue. Gi azo so ayeda ti tene Nzapa aduti Gbia ti ala la ayeke ngbâ ande na ndo ti sese.—Ésaïe 11:9.—Diko Daniel 2:44.
Bâ vidéo Ngbanga ti nyen la Nzapa azia si azo abâ pasi?
4. So Nzapa akanga bê lo ku azi lege na e ti sara nyen?
Satan atene so azo ayeke mä yanga ti Jéhovah gi ndali ti so lo yeke mû ye na ala. Mo lingbi ti fa so a yeke mvene la? En! So Nzapa akanga bê lo ku amû lege na e ti fa wala e ye komandema ti Nzapa wala ti azo. E yeke fa ni na lege ti aye so e yeke sara na yâ ti fini ti e.—Diko Job 1:8-12; aProverbe 27:11.
5. E yeke fa tongana nyen so Nzapa ayeke Gbia ti e?
Aye so e yeke soro la ayeke fa wala e ye ti tene Nzapa aduti Gbia ti e wala pëpe
Tongana e gi ti voro Nzapa alingbi na ye so Bible afa nga e sara ye alingbi na ni, e yeke fa so lo yeke Gbia ti e (Jean 4:23). Tongana ti so Jésus asara, e yeke ke ti tene Satan aga gbia ti e tongana e kpe ti yôro tere ti e na yâ ti aye ti poroso nga na bira.—Diko Jean 17:14.
Satan amû ngangu ti lo ti pusu azo ti sara aye ti sioni. Tongana e ke aye ti sioni so, ambeni kamarade ti e nga na afami ti e alingbi ti he e wala ti kanga lege na e (1 Pierre 4:3, 4). Tongaso, e yeke na mbeni desizion ti mungo ni: E yeke bungbi oko na azo so aye Nzapa? Andia ti lo so ayeke nzoni mingi, so ndoye apusu lo ti mû ni na e so, e yeke sara ye alingbi na ni? Tongana e mû nzoni desizion, e yeke fa so Satan atene mvene tongana lo tene so zo oko ayeke mä yanga ti Nzapa pëpe na gbe ti kpale.—Diko 1 aCorinthien 6:9, 10; 15:33.
Ndoye so Nzapa ayeke na ni na mbage ti azo afa na e so sioni na pasi ayeke hunzi ande. Azo so amä na bê na atënë so ayeke wara fini ti lakue lakue na ndo ti sese.—Diko Jean 3:16.
