Na ngoi ti mandango Bible so, mo manda aye mingi na ndö ti Jéhovah. Aye so mo manda asara si mo ye lo mingi na asara si peut-être mo mû terê ti mo na lo nga mo wara batême awe. Tongana ade, peut-être mo yeke pensé ti sara ni fafadeso. Me mo yeke zia ti gue na li ni na peko ti batême ti mo ape. Mo peut ti ngbâ lakue ti ga nduru mingi na Jéhovah. Mo yeke sara ni tongana nyen?

1. Ngbanga ti nyen la a yeke nzoni mo ngbâ ti kpengba songo ti mo na Jéhovah?

E doit ti sara ngangu ti ngbâ ti kpengba songo ti e na Jéhovah. Ngbanga ti nyen? “Tongaso si yeke yeke e hon yongoro lâ oko pëpe” na lo (aHébreu 2:1). Nyen la apeut ti aidé e ti ngbâ ti sara na Jéhovah be-ta-zo? E peut ti ngbâ ti fa tënë mingi nga ti gi ambeni lege ti sara na Nzapa mingi. (Diko aPhilippien 3:16.) Ti sara na Jéhovah ayeke nzoni ahon aye kue so e peut ti sara na yâ ti gigi ti e.​—Psaume 84:10.

2. Mbeni ye nde wa la a yeke nzoni mo ngbâ ti sara ni?

Atâa so mandango Bible so ayeke gue ti hunzi, gigi ti mo ti Chrétien ayeke ngbâ ti gue. Bible atene e doit ti “yü fini zo”. (aÉphésien 4:23, 24). Tongana mo ngbâ ti manda Bible nga ti gue na abungbi, mo yeke hinga afini ye na ndö ti Jéhovah nga na asarango ye ti lo. Gi alege ti sara ye tongana lo mingi na yâ ti gigi ti mo. Ngbâ ti sara achangement kue so mo doit ti sara ti zia ngia na bê ti Jéhovah.

3. Tongana nyen la Jéhovah ayeke aidé mo ti gue na li ni?

Bible atene: ‘Nzapa ayeke sara si ala luti ngangu, lo yeke sara si ala kpengba, lo yeke sara ande si gere ti ala aluti ngangu.’ (1 Pierre 5:10). E kue, bê ti e ayeke pusu ka e ti sara sioni ye. Me Jéhovah amû na e aye kue so e bezoin ni ti ke ti sara ni (Psaume 139:23, 24). Lo mû zendo ti mû na e nzara nga na ngangu ti sara na lo be-ta-zo.​—Diko aPhilippien 2:13.

 GI TI HINGA AYE MINGI

4. Ngbâ ti sara lisoro na Kamarade ti mo so ayeke nzoni ahon atanga ni kue

Sambela nga na mandango ye la a-aidé mo ti ga kamarade ti Jéhovah. Tongana nyen la aye so apeut ti aidé mo ti ga même nduru mingi na lo?

Diko Psaume 62:8, na pekoni kiri tënë na hunda so:

• Tongana nyen la mo peut ti sambela nzoni mingi ahon ti kozo tongaso si mo kpengba songo ti mo na Jéhovah?

Diko Psaume 1:2 nga na kete tënë na gbe ni, na pekoni kiri tënë na hunda so:

• Tongana nyen la mo peut ti diko Bible nzoni mingi ahon ti kozo tongaso si mo kpengba songo ti mo na Jéhovah?

Nyen la mo peut ti sara ti bâ nzoni mingi na lege ti mandango ye mo wani? Ti hinga ambeni ye so mo peut ti sara, zia VIDÉO ni, na pekoni kiri tënë na ahunda so:

• Na yâ ti vidéo so, akode wa la mo peut ti sara kua na ni?

• Atënë wa la mo ye ti manda ye na ndö ni?

 NA NDURU TËNË

Ngbâ ti kpengba songo ti mo ti kamarade na Jéhovah nga gi ti sara ambeni ye na yâ ti kua ti lo. Tongaso, mo peut ti ngbâ na fini lakue lakue.

Dango bê

• Ngbanga ti nyen la mo peut ti duti na confiance so Jéhovah ayeke aidé mo ti sara na lo be-ta-zo?

• Tongana nyen la mo peut ti kpengba songo ti mo ti kamarade na Jéhovah?

• Tongana nyen la aye so mo gi ti sara na yâ ti kua ti Jéhovah apeut ti aidé mo ti gue na li ni?