Na ngoi so e yeke na popo ti aita, atënë ti bê ti e ague oko na ti Gbia David so lo tene: “Ala bâ tongana nyen a yeke nzoni mingi nga a nzere mingi ti tene aita aduti ndo oko na yâ ti beoko!” (Psaume 133:1). Beoko ti e aga gï tongaso ape. E oko oko kue e yeke na mbeni ye ti sara ti bata ni.

1. Nyen la apika bê mingi na popo ti awakua ti Nzapa?

Tongana mo gue na bungbi na mbeni kodro nde, peut-être mo yeke comprendre yanga ti kodro ni ape, me na yâ ti aye mingi mo yeke bâ so mo yeke na ndo ti mo. Ngbanga ti nyen? Ngbanga ti so a-oko mbeti la e yeke manda na Bible na ndo kue. Nga e yeke sara ngangu ti ye terê na popo ti e. Atâa ndo wa la e yeke dä, e kue e ‘lingbi ti di iri ti Jéhovah, ti duti beoko ti voro lo.’​—Sophonie 3:9, kete tënë na gbe ni.

2. Nyen la mo peut ti sara ti tene beoko amaï?

“Ala ndoye terê ngangu mingi na ndoye so alondo na bê.” (1 Pierre 1:22). Mo peut ti sara ye alingbi na wango so tongana nyen? Ahon ti bâ gï afaute ti amba ti mo, gi ti hinga anzoni sarango ye ti ala. Sara kamarade gï pëpe na azo so aye so agbu bê ti mo na ala ayeke oko, me gi ti hinga aita so ayeke nde na mo. E peut nga ti sara ngangu ti zi na yâ ti bê ti e bibe so apusu e ti ke zo ndali ti so lo yeke nde na e.​—Diko 1 Pierre 2:17. a

3. Nyen la mo yeke sara tongana mo na mbeni ita amä terê ape?

E yeke beoko, me e yeke nga mbilimbili-kue ape. Na ambeni ngoi e yeke sara ye so anzere na mba ape wala e son même bê ti mba. Bible atene na e, atene: “Ala ngbâ . . . ti pardonné mba na bê ti ala kue,” a kiri a tene: “Gï tongana ti so Jéhovah apardonné ala na bê ti lo kue, ala nga ala sara tongaso.” (Diko aColossien 3:13.) Fani mingi e son bê ti Jéhovah, me lo ngbâ ti pardonné e. Tongaso, lo ye ti tene e pardonné aita ti e. Tongana mo bâ so mo son bê ti mbeni zo, mû li ni ti leke tënë ni.​—Diko Matthieu 5:23, 24. b

 GI TI HINGA AYE MINGI

4. Zia ti ke azo so ayeke nde na mo

E ye ti ndoye aita ti e kue. Me a peut ti duti ngangu na e ti ye mbeni zo so na bango ni lo yeke nde na e. Nyen la apeut ti aidé e? Diko Kusala 10:34, 35, na pekoni kiri tënë na ahunda so:

• Jéhovah ayeda ti tene mara ti azo nde nde kue aduti aTémoin ti lo. A yeke nzoni ye so apusu e ti bâ azo so ayeke nde na e tongana nyen?

• Na ndo so mo yeke dä, aye wa la azo mingi ake amba ti ala ndali ni, so mo ye ti zia lege ni?

Diko 2 aCorinthien 6:11-13, na pekoni kiri tënë na hunda so:

• Mo pensé tongana nyen la mo peut ti ga nduru mingi na aita so ayeke nde na mo?

5. Pardonné ita ti mo na bê ti mo kue nga leke tënë na lo

Jéhovah apardonné e na bê ti lo kue atâa so lo bezoin lâ oko ape ti tene e pardonné lo. Diko Psaume 86:5, na pekoni kiri tënë na ahunda so:

• Versê so afa na e nyen na ndö ti pardon ti Jéhovah?

• Ngbanga ti nyen la mo kiri singila ndali ti so lo pardonné e?

• Aye wa la apeut ti sara si a yeke ngangu na e ti mä terê na amba ti e?

Tongana nyen la e peut ti sara ye tongana Jéhovah nga ti ngbâ ti duti beoko na aita ti e? Diko aProverbe 19:11, na pekoni kiri tënë na ahunda so:

• Tongana mbeni zo asara mbeni ye so anzere na mo ape wala lo son bê ti mo, nyen la mo peut ti sara ti tene a ga tënë ape?

 Na ambeni ngoi, e yeke son bê ti amba ti e. Tongana a si, a yeke nzoni e sara nyen? Zia VIDÉO ni, na pekoni kiri tënë na hunda so:

• Na yâ ti vidéo ni, nyen la ita-wali ni asara ti maï siriri?

 NA NDURU TËNË

Mo peut ti sara si beoko angbâ na yâ ti congrégation na lege so mo pardonné aita ti mo kue nga mo fa so mo ye ala.

Dango bê

• Tongana nyen la mo peut ti zia lege ti kengo azo ndali ti so ala yeke nde na mo?

• Nyen la mo yeke sara tongana mo na mbeni ita amä terê ape?

• Ngbanga ti nyen la mo ye ti sara ye tongana Jéhovah ti pardonné amba ti mo?