Jésus ayeke li ti congrégation ti aChrétien (aÉphésien 5:23). Laso, Jésus angbâ na yayu kâ, lo yeke fa lege na adisciple ti lo ge na sese na lege ti “ngbâa be-ta-zo so ayeke sara ye na ndara.” (Diko Matthieu 24:45.) Jésus Christ wani la asoro “ngbâa” so nga lo mû na lo droit ti mû ambeni desizion. Ye oko, ngbâa so adoit ti mä yanga ti Christ nga ti sara kua na aita ti Christ. Zo wa la ayeke ngbâa ni so? Tongana nyen la lo yeke bâ lege ti e?

1. Zo wa la ayeke “ngbâa be-ta-zo so ayeke sara ye na ndara”?

Jéhovah ayeke sara kua lakue na mbeni zo wala groupe ti ambeni zo ti fa lege na azo ti lo (Malachie 2:7; aHébreu 1:1). Na peko ti kuâ ti Jésus, abazengele nga na a-ancien na Jérusalem la ayeke mû lani li ni (Kusala 15:2). Ti gue oko na tapande so, laso mbeni kete groupe ti a-ancien, so ti tene Bebungbi ti aTémoin ti Jéhovah, la ayeke mû na e kobe ti yingo nga ayeke mû li ni na kua ti fango tënë. Groupe ni so la ayeke “ngbâa be-ta-zo so ayeke sara ye na ndara so [Jésus] azia lo”. (Matthieu 24:45a). Amembre ti Bebungbi kue ayeke aChrétien so a soro ala ti gue na yayu, so ayeke ku kungo ti komande legeoko na Christ na yayu na yâ ti Royaume ti lo na peko ti so fini ti ala na sese ahunzi.

2. Kobe ti yingo so ngbâa be-ta-zo ayeke mû na e ayeke nyen?

Jésus atene lani so ngbâa be-ta-zo ayeke “mû na [amba ti lo aChrétien] kobe ti ala na ngoi ni so alingbi”. (Matthieu 24:45b). Gï tongana ti so kobe so e te ayeke aidé e ti ngbâ ti duti na ngangu nga na nzoni seni, kobe ti yingo, so ti tene afango lege ti Bible, ayeke mû na e ngangu so e bezoin ni ti ngbâ be-ta-zo na Jéhovah nga ti sara kua so Jésus amû na e ti sara (1 Timothée 4:6). E yeke wara kobe ti yingo so na lege ti abungbi, akota bungbi, ambeti nga na avidéo so ayeke aidé e ti mä yâ ti ye so Nzapa ahunda na e ti sara nga ti kpengba songo ti e na lo.

 GI TI HINGA AYE MINGI

3. Awakua ti Jéhovah adoit ti leke yâ ti bungbi ti ala

Na gbe ti fango lege ti Jésus, Bebungbi ayeke leke yâ ti kua ti aTémoin ti Jéhovah. Jésus afa nga ye lani na akozo Chrétien tongaso. Zia VIDÉO ni.

Diko 1 aCorinthien 14:33, 40, na pekoni kiri tënë na hunda so:

• Tongana nyen la aversê so afa so Jéhovah aye ti tene aTémoin ti lo aleke yâ ti bungbi ti ala?

4. Ngbâa be-ta-zo ayeke leke yâ ti kua ti e ti fango tënë

Fango tënë ayeke kota kua so akozo Chrétien ayeke sara lani. Diko Kusala 8:14, 25, na pekoni kiri tënë na ahunda so:

• Na popo ti akozo Chrétien, azo wa la ayeke mû li ni lani na kua ti fango tënë?

• Pierre na Jean asara ye lani tongana nyen na ngoi so amba ti ala abazengele afa na ala mbeni ye ti sara?

Fango tënë ayeke kota kua so Bebungbi aleke ni. Zia VIDÉO ni.

 Jésus afa lani so fango tënë ayeke kota kua mingi. Diko Marc 13:10, na pekoni kiri tënë na ahunda so:

• Ngbanga ti nyen la kua ti fango tënë ayeke kota mingi na Bebungbi?

• Ngbanga ti nyen la e bezoin “ngbâa be-ta-zo so ayeke sara ye na ndara” ti leke yâ ti kua so na yâ ti dunia kue?

5. Ngbâa be-ta-zo la ayeke fa lege na e

Bebungbi ayeke fa lege na aChrétien na yâ ti dunia kue. Bebungbi ayeke mû adesizion tongana nyen? Bâ tongana nyen la Bebungbi ti akozo Chrétien ayeke mû lani adesizion. Diko Kusala 15:1, 2, na pekoni kiri tënë na ahunda so:

• Tënë wa la asara si papa alondo lani na popo ti ambeni kozo Chrétien?

• Azo wa la Paul, Barnabas nga na ambeni zo ague abâ ala ti leke tënë so?

Diko Kusala 15:12-18, 23-29, na pekoni kiri tënë na hunda so:

• Kozo ti mû mbeni desizion, nyen la bebungbi ti akozo Chrétien asara lani ti hinga fango lege ti Nzapa na ndö ti tënë ni?​—Bâ versê 12, 15 na 28.

Diko Kusala 15:30, 31 nga na 16:4, 5, na pekoni kiri tënë na ahunda so:

• Akozo Chrétien ayeke sara lani ye tongana nyen na ngoi so bebungbi afa na ala mbeni ye?

• So ala mä yanga, Jéhovah asara tufa na ndö ti ala tongana nyen?

Diko 2 Timothée 3:16 nga na Jacques 1:5, na pekoni kiri tënë na hunda so:

• Laso, tongana Bebungbi aye ti mû mbeni desizion lo yeke gi fango lege na ndo wa?

 NA NDURU TËNË

Bebungbi ayeke “ngbâa be-ta-zo so ayeke sara ye na ndara” so Christ azia. Bebungbi ayeke fa lege na aChrétien na yâ ti dunia kue nga lo yeke mû na ala kobe ti yingo.

Dango bê

• Zo wa la azia “ngbâa be-ta-zo so ayeke sara ye na ndara”?

• Tongana nyen la Bebungbi ayeke bâ lege ti e?

• Mo yeda so Bebungbi la ayeke “ngbâa be-ta-zo so ayeke sara ye na ndara”?