Jéhovah ayeke Nzapa ti wusuwusu pëpe (1 aCorinthien 14:33). Tongaso, a yeke na lege ni ti tene awakua ti lo asara ye na yâ ti wusuwusu ape. Aye ayeke tambela tongana nyen na yâ ti congrégation ti aChrétien? Tongana nyen la e lingbi ti sara si aye atambela nzoni na yâ ti congrégation?

1. Zo wa la ayeke mokonzi ti congrégation?

‘Christ ayeke li ti congrégation.’ (aÉphésien 5:23). Na yayu kâ, lo yeke bâ ndo na ndö ti kua so awakua ti Jéhovah ayeke sara na yâ ti dunia kue. Jésus azia na sese “ngbâa be-ta-zo so ayeke sara ye na ndara”, mbeni kete groupe ti a-ancien so ayeke biazo so a iri ala nga Bebungbi. (Diko Matthieu 24:45-47.) Bebungbi ayeke fa lege na acongrégation kue na yâ ti dunia, legeoko tongana ti so abazengele nga na a-ancien asara lani na Jérusalem (Kusala 15:2). Me akoli so la ayeke amokonzi ti bungbi ti e ape. Ala yeke diko Bible ti hinga ye so Jéhovah aye ti tene ala sara, na ala yeda na bê ti ala wani ti sara ye alingbi na afango lege ti Jésus.

2. Kua ti nyen la a-ancien ayeke sara?

A-ancien ayeke akoli so ayeke be-ta-zo a sara angu mingi awe. Ala yeke fa na awakua ti Jéhovah aye so Bible afa, ala yeke mû maboko na ala nga ala yeke kpengba ala. A yeke futa ala ape ndali ti kua so ala sara. Me ala yeke sara kua ni “na bê ti ala wani na gbele Nzapa; . . . na bibe ti warango ye na lege ti likisi pëpe, me na bê ti ala kue.” (1 Pierre 5:1, 2). Awakua ti mungo maboko ayeke akoli so ayeke na yâ ti congrégation so ayeke mû maboko na a-ancien. Tongana ngoi ayeke hon si ala sara ye alingbi na aye so Bible ahunda, ala peut ti ga a-ancien.

Bebungbi ayeke mû ambeni ancien ti ga asurveillant ti circonscription. Ala yeke sara vizite na acongrégation nde nde ti fa lege na aita nga ti kpengba ala. Asurveillant ti circonscription ayeke sara kua na aye so Bible afa ti bâ wala ala peut ti mû mbeni ita-koli ti ga wakua ti mungo maboko wala ancien.—1 Timothée 3:1-10, 12; Tite 1:5-9.

3. Kua ti nyen la Témoin oko oko ayeke sara?

Azo kue na yâ ti congrégation ayeke ‘sepela iri ti Jéhovah’ na lege so ala yeke mû mbage na abungbi nga ala yeke fa tënë alingbi na dutingo ti ala.—Diko Psaume 148:12, 13.

 GI TI HINGA AYE MINGI

4. Jésus ayeke mbeni mokonzi so adë bê ti zo

Jésus atisa e ti sara mbeni ye, fason so lo tisa na e ayeke pendere mingi. Diko Matthieu 11:28-30, na pekoni kiri tënë na hunda so:

• Jésus aye ti tene e bâ so komandema ti lo ayeke tongana nyen?

5. A-ancien ayeke fa ye na lege ti tapande ti ala

1. A-ancien ayeke sara kue ti tene songo ti ala nga na ti azo ti sewa ti ala na Jéhovah angbâ ti kpengba

2. A-ancien ayeke bâ lege ti azo kue na yâ ti congrégation

3.   A-ancien ayeke fa tënë lakue

4. A-ancien ayeke awafango ye. Ala yeke mû nga maboko na lekengo yâ ti Da ti Royaume nga na ambeni kua

6. E peut ti sara kua maboko na maboko na a-ancien

Bible afa na e mbeni kota raison ti sara kua maboko na maboko na a-ancien. Diko aHébreu 13:17, na pekoni kiri tënë na ahunda so:

• Eskê a yeke na lege ni so Bible awa e ti mä yanga ti azo so ayeke mû li ni na ti woko terê na gbe ti ala? Mo tene tongaso ngbanga ti nyen?

Diko Luc 16:10, na pekoni kiri tënë na hunda so:

• Ngbanga ti nyen la a yeke kota ye ti sara kua maboko na maboko na a-ancien même na yâ ti aye so, na bango ni, ayeke nga kota ye ape?

 NA NDURU TËNË

Jésus la ayeke mokonzi ti congrégation. E yeke na ngia ti sara kua maboko na maboko na a-ancien so ayeke sara kua na gbe ti lo, ndali ti so ala yeke dë bê ti e nga ala yeke fa ye na e na lege ti tapande ti ala.

Dango bê

• Zo wa la ayeke mokonzi ti congrégation?

• Tongana nyen la a-ancien ayeke mû maboko na congrégation?

• Kua ti nyen la wakua ti Jéhovah oko oko ayeke sara?