YE TI MANDA 03
Eskê mo lingbi ti sara confiance na Bible?
Na yâ ti Bible, mo yeke wara gbâ ti azendo nga na gbâ ti awango. Peut-être mo ye ti hinga aye so Bible afa, me peut-être mo yeke gi bê ti mo. Eskê mo bâ so a yeke nzoni ti sara confiance na azendo nga na awango so ayeke na yâ ti mbeni mbeti so aninga mingi? Eskê aye so Bible atene alingbi ti mû maboko na e ti duti na ngia laso nga na yâ ti angoi so ayeke ga? Azo kutu mingi apensé tongaso. Zia e bâ wala mo nga mo lingbi ti pensé tongaso.
1. Eskê ambaï so ayeke na yâ ti Bible ayeke tâ tënë?
Bible afa so atënë so ayeke na yâ ni ‘ayeke na lege ni nga ayeke tâ tënë.’ (Zo-ti-fa-tene 12:10). Bible asara tënë ti atâ ye so avrai zo asara. (Diko Luc 1:3; 3:1, 2.) Azo mingi so ayeke sû mbaï nga na azo so ayeke gi aye na gbe ti sese ayeda so ambeni mbilimbili lango, azo, ando nga na aye so Bible asara tënë ni ayeke na lege ni.
2. Ngbanga ti nyen la e lingbi ti tene so Bible aga ngbene ye ape?
Fani mingi, Bible asara tënë ti aye so azo ahinga lani ye na ndö ni ape na ngoi so a sû ni. Na tapande, Bible asara tënë na ndö ti atënë ti awandara. Mingi ti atënë so Bible atene na ndö ti aye so awandara ahinga laso, azo amä terê lani na ndö ni ape na ngoi so a sû ni na yâ ti Bible. Ye oko, awandara ti ngoi ti e ayeda so atënë so Bible atene ayeke na lege ni. Aye so ayeke na yâ ti Bible, “zo alingbi lakue ti zia bê ti lo dä, laso nga lakue lakue”.—Psaume 111:8.
3. Ngbanga ti nyen la e lingbi ti zia bê ti e na aye so Bible atene na ndö ti kekereke?
Aprophétie a ti Bible asara tënë ti “aye so ade ti si pëpe.” (Ésaïe 46:10). Bible afa na lege ni aye mingi so asi lani angu mingi kozoni si aye ni asi. Bible afa nga anzene nzene tënë na ndö ti aye so ayeke si laso. Na yâ ti ye ti manda so, e yeke bâ ambeni prophétie ti Bible. Fason so a fa aye ni tâ na lege ni ahon gbungo li ti zo.
GI TI HINGA AYE MINGI
Gi ti bâ tongana nyen la awandara ayeda na aye so Bible atene, nga gi nda ti ambeni prophétie ti Bible so apika bê mingi.
4. Awandara ayeda na atënë so Bible atene
Ândö, azo mingi amä na bê so sese ayeke na ndö ti mbeni ye. Zia VIDÉO ni.
Bâ ye so mbeti ti Job atene a sara ngu 3 500 tongaso awe. Diko Job 26:7, na pekoni kiri tënë na hunda so:
-
Ngbanga ti nyen la tënë so atene “lo zia sese na ndö ti ye oko pëpe” asara si li ti zo akpe?
A sara gï ngu ngbangbo use tongaso la azo mingi ahinga ye nzoni na ndö ti ye so asara si ngu aduti lakue na ndö ti sese. Me bâ ye so Bible atene so asara ngu 3500 tongaso awe. Diko Job 36:27, 28, na pekoni kiri tënë na ahunda so:
-
Ngbanga ti nyen la fason so akpengba ape so a fa ndani so ngu ayeke lakue na ndö ti sese apika bê ti mo?
-
Eskê aversê so mo diko so asara si mo yeke na confiance mingi na Bible?
5. Bible atene kozo awe so ambeni kpengba ye ayeke si
Diko Ésaïe 44:27–45:2, na pekoni kiri tënë na hunda so:
-
Anzene nzene tënë wa la Bible atene lani ngu 200 kozo ti tene Babylone atï?
Aye so asi lani afa so Cyrus, gbia ti Perse, nga na aturugu ti lo asö benda na ndö ti gbata ti Babylone na ngu 539 K.N.E. b Ala sara si ngu so abata lani gbata ni asua ague na mbeni ndo nde. So a kanga lani ayanga ti gbagba ti gbata ni ape, ala lï na yâ ti gbata ni ala mû ni sân ti sara bira. Laso, ngu 2 500 na pekoni, gbata ti Babylone abuba kue. Bâ ye so Bible atene lani atene ayeke si.
Diko Ésaïe 13:19, 20, na pekoni kiri tënë na hunda so:
-
Tongana nyen la prophétie so aga lani tâ tënë?
Agbagbara da ti Babylone so ayeke laso na Irak
6. Bible afa kozo awe aye so e yeke bâ ni laso
Bible atene so e yeke na “lâ ti nda ni”. (2 Timothée 3:1). Bâ aye so Bible atene lani atene ayeke si na lâ ti nda ni so:
Diko Matthieu 24:6, 7, na pekoni kiri tënë na hunda so:
-
Bible atene nyen la ayeke si na lâ ti nda ni?
Diko 2 Timothée 3:1-5, na pekoni kiri tënë na ahunda so:
-
Bible atene nyen na ndö ti asarango ye ti azo na lâ ti nda ni?
-
Na popo ti asarango ye ni so, ati so wa la mo bâ ni?
AMBENI ZO ATENE: “Atënë ti Bible ayeke atënë ti tere.”
-
Ti mo, nyen la asara si mo hinga na bê ti mo kue so e lingbi ti sara confiance na Bible?
NA NDURU TËNË
Mbaï, aye so awandara ahinga nga na aprophétie afa so e lingbi ti sara confiance na Bible.
Dango bê
-
Eskê ambaï so ayeke na yâ ti Bible ayeke tâ tënë?
-
Ambeni tënë wa la Bible atene so awandara ayeda na ni?
-
Mo pensé so Bible afa kozo awe aye so ayeke si kekereke? Mo tene tongaso ngbanga ti nyen?
GI NDA TI YE
Eskê atënë so ayeke na yâ ti Bible so andu aye so awandara ahinga ayeke na lege ni ape?
Aye wa la afa so e yeke na “lâ ti nda ni”?
“Aprophétie omene ti Bible so mo yeke bâ gango tâ tënë ni” (Tour ti Ba Ndo ti lango 1 ti juin 2011)
Bâ tongana nyen la aprophétie na ndö ti Kodro-togbia ti Grèce aga lani tâ tënë.
Bâ tongana nyen la aprophétie ti Bible achangé bango ndo ti mbeni koli na ndö ti Bible.
“Mbi pensé lani so Nzapa ayeke dä ape” (Tour ti Ba Ndo, N° 5 2017)
Bâ nga
ATËNË SO AZO AYEKE HUNDA KA
A-Témoin ti Jéhovah ayeke manda Bible na azo tongana nyen?
Mo peut ti sara kua na traduction ti Bible so mo ye na temps so a-Témoin ti Jéhovah ayeke manda Bible na mo senge senge. Mo peut ti tisa afami ti mo kue wala ambeni kamarade ti mo.
