YE TI MANDA 01
Bible alingbi ti mû maboko na mo tongana nyen?
E kue e ye ti hinga ndani so e yeke na fini, ndani so e yeke bâ pasi na e yeke kui. E ye nga ti hinga ye na ndö ti gigi ti e ti kekereke. E bezoin nga mungo maboko ti leke akpale ti e ti lâ oko oko, na tapande ti wara nginza so e bezoin ni nga ti duti na ngia na yâ ti sewa ti e. Azo mingi abâ so Bible akiri tënë na akota hundango tënë ti ala nga amû na ala awango so amû maboko na ala na yâ ti gigi ti ala ti lâ oko oko. Eskê Bible apeut ti mû maboko na mbeni zo so mo hinga lo?
1. Ambeni hunda wa la Bible akiri tënë na ni?
Bible akiri tënë na akota hunda so: Fini abâ gigi tongana nyen? E yeke na fini ngbanga ti nyen? Ngbanga ti nyen la anzoni zo ayeke bâ pasi? Akuâ ahinga ndo? So azo kue aye siriri, ngbanga ti nyen la bira ayeke mingi? A yeke futi ande sese wala pëpe? Bible awa e ti gi ti wara akiringo tënë na mara ti ahunda so, nga akiringo tënë ti Bible anzere na azo kutu mingi.
2. Tongana nyen la Bible alingbi ti mû maboko na e ti duti na ngia na yâ ti gigi ti e ti lâ oko oko?
Bible amû na e anzoni wango. Na tapande, a fa na asewa tongana nyen ti duti na tâ ngia. A fa na e tongana nyen ti hon ndö ti agingo bê ti e nga tongana nyen ti sara kua ti e na ngia. Mo yeke hinga ande aye so Bible afa na ndö ti atënë so nga na ambeni tënë nde na ngoi so e yeke manda mbeti so. Peut-être mo yeke yeda ande so ‘atënë kue ti yâ ti Mbeti ti Nzapa [ye kue so ayeke na yâ ti Bible] ayeke . . . nzoni’.—2 Timothée 3:16.
Mbeti so amû place ti Bible ape. Me a wa mo ti gi nda ti aversê ti Bible mo wani. Tongaso, e wa mo ti diko aversê so ayeke na yâ ti aye ti manda ni nga ti haka ni na aye so mo yeke manda so.
GI TI HINGA AYE MINGI
Bâ tongana nyen la Bible amû maboko na azo, tongana nyen la dikongo Bible apeut ti nzere na mo nga ndani so a yeke nzoni mbeni zo amû maboko na mo ti mä yâ ni.
3. Bible alingbi ti fa lege na e
Bible ayeke tongana mbeni torche so aza ngangu. Bible alingbi ti mû maboko na e ti mû anzoni desizion nga ti hinga aye so ayeke si ande kekereke.
Diko Psaume 119:105, na pekoni kiri tënë na ahunda so:
-
Zo ti sungo psaume so abâ Bible tongana nyen?
-
Mo bâ ti mo Bible tongana nyen?
4. Bible alingbi ti kiri tënë na ahunda ti e
Mbeni wali abâ so Bible akiri tënë na ahunda ti lo so lo wara kiringo tënë na ni ape a sara angu mingi. Zia VIDÉO ni, na pekoni kiri tënë na ahunda so:
-
Na yâ ti vidéo ni, ahunda wa la wali ni ayeke na ni?
-
Tongana nyen la mandango Bible amû maboko na lo?
Bible awa e ti hunda atënë. Diko Matthieu 7:7, na pekoni kiri tënë na hunda so:
-
Ahunda wa la mo yeke na ni so Bible alingbi ti kiri tënë na ni?
5. Dikongo Bible alingbi ti nzere na mo
A nzere na azo mingi ti diko Bible na ala wara nzoni dä. Zia VIDÉO ni, na pekoni kiri tënë na ahunda so:
-
Na yâ ti vidéo ni, bango ndo wa la amaseka ni ayeke na ni lani na ndö ti dikongo ambeti?
-
Atâa so ala ye ti diko ambeti ape, ngbanga ti nyen la ala ye ti diko Bible?
Bible alingbi ti fa ye na e, ti dë bê ti e nga ti mû na e beku. Diko aRomain 15:4, na pekoni kiri tënë na hunda so:
-
So Bible ayeke dë bê ti zo nga ayeke mû na zo beku, a nzere na mo?
6. Ambeni zo alingbi ti mû maboko na e ti mä yâ ti atënë ti Bible
Ambeni zo ayeke diko Bible ala wani, me ala bâ nga so a yeke nzoni mingi ti tene ambeni zo asara lisoro na ala na ndö ni. Diko Kusala 8:26-31, na pekoni kiri tënë na hunda so:
-
E lingbi ti mä yâ ti atënë ti Bible tongana nyen? (Bâ versê 30, 31).
Koli ti Éthiopie so abezoin lani ti tene a mû maboko na lo ti mä yâ ti Mbeti ti Nzapa. Laso, azo mingi abâ so a yeke nzoni mingi ti tene ambeni zo asara lisoro na ala na ndö ti Bible
AMBENI ZO ATENE: “Mandango Bible ayeke bubango ngoi.”
-
Mo yeke tene nyen na ala?
NA NDURU TËNË
Bible amû na e awango so abâ gigi ti e ti lâ oko oko, akiri tënë na akota hunda ti e nga adë bê ti e na amû na e beku.
Dango bê
-
Mara ti awango wa la e lingbi ti wara na yâ ti Bible?
-
Ambeni hunda wa la Bible akiri tënë na ni?
-
Nyen la mo ye ti hinga na yâ ti Bible?
GI NDA TI YE
Bâ tongana nyen la awango ti Bible ayeke nzoni ndali ti e laso.
“Aye so Bible afa angbâ lakue na ngangu” (Tour ti Ba Ndo N° 1 2018)
Bâ tongana nyen la Bible amû maboko na mbeni koli ti hon ndö ti ambeni sioni pensé so lo yeke na ni depuis kete ti lo.
Lege so mbi komanse ti wara ngia na yâ ti gigi ti mbi (2:53)
Bâ anzoni wango so Bible amû na asewa.
“Aye 12 so ayeke sara si sewa aduti na ngia” (Zingo na lango! N° 2 2018)
Bâ tongana nyen la Bible aleke bango ndo so ayeke na lege ni ape so azo mingi ayeke na ni na ndö ti zo so akomande dunia so.
Bâ nga
ATËNË SO AZO AYEKE HUNDA KA
A-Témoin ti Jéhovah ayeke manda Bible na azo tongana nyen?
Mo peut ti sara kua na traduction ti Bible so mo ye na temps so a-Témoin ti Jéhovah ayeke manda Bible na mo senge senge. Mo peut ti tisa afami ti mo kue wala ambeni kamarade ti mo.
