Na peko ti so Jésus ahunzi diskur ti lo na ndo ti hoto, lo gue na gbata ti Capernaüm. Kâ, ambeni ancien ti aJuif aga na mbage ti lo. Mbeni zo so mara ti lo ayeke nde la atokua ala. Zo ni so ayeke mbeni turugu ti kota kamba ti Rome.

Turugu ti kota kamba ni so ayeke na mbeni ngbâa so lo ye lo mingi, me so tere ti lo ason na lo yeke gue ti kui. Atâa so turugu ni so ayeke mbeni Juif ape, lo yeke gi lani ti wara mungo maboko na mbage ti Jésus. A-ancien ni atene na Jésus so zo ti kua ni “ayeke lango na da. Mbage ti tere ti lo akui na lo yeke bâ pasi mingi.” (Matthieu 8:6). A-ancien ti aJuif ni afa nga na Jésus so turugu ti kota kamba so ayeke mbeni zo so a lingbi “biani ti tene mo sara ye so ndali ti lo, ndali ti so lo ye mara ti e mingi, na lo la lo sara synagogue ti e so.”—Luc 7:4, 5.

Droit, Jésus na a-ancien ni alondo ala gue na da ti turugu ni. Tongana ala ga nduru na da ni, turugu ni atokua ambeni kamarade ti lo ti gue ti tene na Jésus atene: “Kota zo, mo fatigué tere ti mo ape, ndali ti so mbi kpa ti tene mo lï na da ti mbi ape. Ndani la mbi bâ tere ti mbi so mbi kpa pëpe ti gue na tere ti mo.” (Luc 7:6, 7). So pendere tënë la si asigi na yanga ti turugu so, so lo la si lo yeke mû ka yanga na azo ti tene ala sara kua na lo so! Ye so afa na gigi so koli so ayeke nde mingi na tanga ti aRomain, so a hinga ala tongana azo so ayeke sara ye na ngangu na mbage ti angbâa ti ala.—Matthieu 8:9.

Turugu ni adoit ti hinga lani so aJuif aye ka pëpe ti bungbi ndo oko na azo so ayeke aJuif ape (Kusala 10:28). Peut-être ayeke ndali ni la si turugu ni atene na akamarade ti lo ti gue ti tene na Jésus atene: “Sara gi tënë, na zo ti kua ti mbi ni ayeke sava.”—Luc 7:7.

Tënë ni so apika bê ti Jésus mingi, ni la lo tene: “Mbi tene na ala: Même na Israël, ade mbi wara mbeni zo so ayeke na kota mabe tongaso ape.” (Luc 7:9). Tongana akamarade ti turugu ni akiri, ala bâ ngbâa so tere ti lo ason mingi so, lo la fadeso lo wara sava ti tere awe so.

Tongana lo sava zo ni so awe, Jésus amû ngoi ni so ti kiri ti fa so azo so ayeke aJuif ape, me so ayeke na mabe, ayeke wara ande atufa. Ni la, lo tene: “Azo mingi ayeke londo [ande] na mbage ti est nga na ouest, ala yeke ga ti duti na table ti te kobe legeoko na Abraham, na Isaac nga na Jacob na yâ ti Royaume ti yayu.” Ka nyen la ayeke si ande na aJuif so ayeke na mabe ape? Jésus atene so fade “a yeke bi . . . [ala] na gigi na yâ ti bingo. Kâ la si ala yeke toto na ala yeke te pembe ti ala.”—Matthieu 8:11, 12.

Ni la, Nzapa ake aJuif so ayeda pëpe na pasa so lo mû na ala kozo ti komande legeoko na Christ na yâ ti Royaume. Me ti ala so ayeke aJuif ape, fade Christ ayeke iri ala ti duti na table ti lo so ayeke “na yâ ti Royaume ti yayu.”