Tongana angu ayeke hon, ambeni koli na wali ayeke fa ndoye mingi na mbage ti mba tongana ti kozo ape. Tongana a yeke ye so asi na yâ ti sewa ti mo la, eskê tënë ni agbu bê ti mo?

•  Ye so mo doit ti hinga

•  Ye so mo peut ti sara

 Tongana koli na wali afa so ala ye terê, songo ti ala ayeke kpengba. Nyongo ngu nga na tengo ye lakue ayeke sara si zo ayeke na ngangu nga lo yeke na nzoni seni, legeoko nga, tongana lakue koli na wali afa so ala ye terê, a yeke sara si songo ti ala ayeke kpengba. Même tongana ala sara mariage asara angu mingi awe, koli wala wali ayeke na bezoin ti hinga so mba ti lo ni aye lo mingi nga lo yeke pensé na lo.

 Tongana zo ayeke na tâ ndoye lo yeke pensé gï na intérêt ti lo ape. Lo yeke pensé gï na nzoni ti mba ti lo. Tongaso, ahon ti tene mo fa ndoye na mba ti mo ni gï na ngoi so mo la mo yeke na nzara ti sara ni, mbeni koli wala wali so ayeke pensé na mba ti lo ayeke gï ti bâ wala mba ti lo ni ayeke na bezoin ti tene a fa na lo so a ye lo, na lo yeke gï ti kaï bezoin ti mba ti lo ni.

 Mingi ni, awali aye mingi ti tene a fa na ala so a ye ala mingi. Mbeni koli apeut ti ye wali ti lo mingi, me tongana lo fa ndoye ti lo ni gï na yanga ti ndapre wala gï na lakui wala gï kozo si lo bungbi na wali ti lo ni, wali ni apeut ti gi bê ti lo wala koli ti lo ni aye lo biani. A yeke kota ye mingi ti fa fani mingi na yâ ti lango oko oko so mo ye mba ti mo ni.

 Fa ndoye ti mo na lege ti atënë. Senge tënë tongana “Mbi ye mo” wala “Mo yeke important mingi na mbi” apeut ti sara si koli wala wali ti mo asentir so mo ye lo.

 Mama-ndia ti Bible: “Yanga ayeke sara tënë ti ye so asi singo na bê ti zo.”​—Matthieu 12:34.

 Wango: A lingbi mo fa ndoye ti mo gï na lege ti tënë ape. Sara ni na mbeti, atâa a yeke na lê ti kugbe-mbeti wala na message.

 Fa ndoye ti mo na lege ti aye so mo sara. Ti gbu mba ti mo na kate, ti embrassé lo, wala ti gbu maboko ti lo ayeke fa na mba ti mo ni so, tënë so mo tene “Mbi ye mo” so ayeke biani tâ tënë. Mo peut ti fa na mba ti mo ni so mo ye lo na lege so mo yeke touché lo yeke, na lege so mo yeke sara lê na lo wala mo mû na lo ambeni cadeau. Peut-être mbeni koli apeut ti yo akungba na tïtî wali ti lo, lo sukula sembe, bongo wala lo peut ti to kobe. Ti mingi ti awali, ala bâ ni gï tongana mungo maboko na ala ape, me ala bâ ni nga tongana fango na ala so mo ye ala mingi!

 Mama-ndia ti Bible: “Zia e ndoye terê [gï] na tënë pëpe wala na yanga pëpe, me na lege ti kusala.”​—1 Jean 3:18.

 Wango: Sara ye na mbage ti koli wala wali ti mo gï tongana ti so mo sara lani na ngoi so ala komanse ti ye terê pan.

 Mû ngoi ti duti na mba ti mo ni. Ti duti gï ala use ayeke sara si songo ti ala ayeke kpengba na ayeke sara si mba ti mo ni abâ so a nzere na mo mingi ti duti na terê ti lo. A yeke tâ tënë so a peut ti duti ngangu ti duti gï ala use tongana ala yeke na amolenge wala tongana ala yeke na gbâ ti kua so ayeke important so ala doit ti sara na yâ ti lango ni. Peut-être mo peut ti leke mbeni programme ti tene lakue mo na lo atambela kete, gï ala use.

 Mama-ndia ti Bible: “[Zia] ala hinga biani aye so ayeke akota ye mingi ahon atanga ni.”​—aPhilippien 1:10.

 Wango: Ambeni koli na wali so ayeke na aye mingi ti sara aleke ti tene lakue na alakui wala na anda-yenga ala passé mbeni ngoi gï ala use.

 Gï ti hinga koli wala wali ti mo nzoni. Zo oko oko ayeke nde nde; tongaso bezoin so zo oko oko ayeke na ni ti tene a fa na lo so a ye lo ayeke nde nde. Mû ngoi ti tene mo na koli wala wali ti mo asara tënë na mba ti fa tongana nyen la zo oko oko aye ti tene a fa na lo so a ye lo, nga ti bâ wala zo ni abezoin ti tene a sara ni na lo encore mingi. Na pekoni, zia zo oko oko asara kue ti kaï bezoin ti mba ti lo ni. Girisa ape, tongana koli na wali aye ti tene songo ti ala akpengba, a yeke kota ye mingi ti tene ala fa ndoye ti ala na mbage ti mba.

 Mama-ndia ti Bible: “Ndoye . . . [ayeke] gi gï aye so anzere na lo pëpe.”​—1 aCorinthien 13:4, 5.

 Wango: Ahon ti tene mo hunda na mba ti mo ni ti tene lo fa na mo so lo ye mo, hunda terê ti mo: ‘Nyen la mbi peut ti sara ti tene koli wala wali ti mbi afa na mbi so lo ye mbi mingi?’