Mo tï mbeni zo na ala use kue adécidé ti gi ti hinga mba na ti bâ wala ala lingbi ti sara mariage. Nyen la mo yeke ku ti tene asi na temps so ala yeke gi ti hinga mba nzoni?

Na yâ ti article so e yeke bâ:

•  Ku ti tene ala causé na mba polele

•  Ku ti tene abango ndo ti ala aduti nde nde

•  Ku ti tene ala wara agingo bê

 Mo na zo so ayeke fréquenté mba ayeke gi ti hinga ye na ndö ti mba tongana ala passé temps ensemble. Ambeni ye nde so mo yeke gi ti hinga ni na ndö ti zo ni ayeke ti bâ tongana nyen la lo yeke sara ye na yâ ti asituation nde nde.

 Me, ambeni ye ayeke dä so ala use kue abezoin ti causé na ndö ni polele. Tongana ala yeke causé, gi ti hinga ye polele na ndö ti zo ni, na zia ape si asentiment ti mo la ayeke pusu mo ti mû desizion.

 Aye so ala use kue adoit ti sara lisoro na ndö ni andu aye tongana:

•   Tënë ti nginza. Eskê bon ti mbeni zo ayeke na li ti mo? Eskê ayeke ngangu na mo ti géré nginza ti mo nzoni? Tongana ala sara mariage awe, tongana nyen la mo na koli wala wali ti mo ayeke géré nginza so ala yeke wara nga tongana nyen la ala yeke sara adépense ti ala?

•   Tënë ti seni. Eskê mo yeke na nzoni seni? Eskê mo yeke lani na mbeni ngangu kpale ti seni?

•   A-objectif ti ala. Nyen la mo ye ti sara na yâ ti gigi ti mo? Eskê mo na zo so ayeke fréquenté mba ayeke na amême objectif? Tongana ala sara mariage awe, eskê mo yeke ngbâ ande ti duti na ngia, tongana situation ti ala amû lege na ala ape ti atteindre a-objectif ti ala?

•   Tënë ti sewa. Eskê mo la mo yeke occupé na ambeni zo ti yâ ti sewa ti mo? Eskê mo pensé so mo peut ande ti ngbâ ti sara aye ni so? Eskê mo ye ande ti dü amolenge? Tongana ayeke tongaso, mo ye ti dü oke?

 Tongana ala yeke causé na ndö ti atënë ni so, duti honnête nga sara tënë polele. Gi ti honde ambeni ye ape wala ba yâ ti ambeni tënë ape ti tene mo nzere na lê ti mba ti mo ni.—aHébreu 13:18.

 Ti gbu li na ndö ni: Nyen la mo yeke gi ti hinga na ndö ti zo so mo na lo ayeke fréquenté mba? Nyen la mba ti mo ni adoit ti hinga na ndö ti mo? Tongana nyen la lisoro so ala sara ni polele ayeke aidé ande ala tongana ala décidé ti sara mariage?

 Mama-ndia ti Bible: “Zo oko oko atene tâ tënë na mba ti lo.”—aÉphésien 4:25, Mbeti ti Nzapa, Tënë amu fini.

 “Wali ni apeut ti pensé so na yâ ti nze omene, peut-être ala yeke sara mariage, me koli ni apeut ti pensé so ayeke na yâ ti ngu oko. Na yâ ti aye tongaso, bê ti wali ni apeut ti son nga lo yeke gi bê ti lo ndali ti so lo pensé so ala yeke sara mariage ni fade hio. A yeke important ti tene ala use kue aduti na même bango ndo na ndö ti tënë ni.”—Ariana, so asara mariage asara ngu oko awe.

 Azo ayeke nde nde. Tongaso, girisa ape so mo na zo so ayeke fréquenté mba apeut ti duti na même bango ndo ape na ndö ti aye kue. Aye tongana ngobo ti ala nga na fason so a bata na ala apeut ti sara ngangu na ndö ti bango ndo ti ala.

 Ti gbu li na ndö ni: Tongana ala yeke na abango ndo nde nde na ndö ti ambeni ye so Bible asara tënë polele na ndö ni ape, eskê ala yeke sara kue ti mä terê si siriri angbâ na popo ti ala?

 Mama-ndia ti Bible: ‘Zia azo ahinga so ala yeke sara ye ahon ndö ni pëpe.’—aPhilippien 4:5.

 “Même si mo pensé so songo ti ala ayeke bien, hinga so bango ndo ti ala ayeke duti ande nde nde. Atâa so mango terê ayeke kota ye, me ye so ayeke kota ye mingi ayeke fason so ala yeke sara ye tongana ala yeke na abango ndo nde nde na ndö ti ambeni ye.”—Matthew, so asara mariage asara ngu oku awe.

 Ti vrai ni, fréquentation ni ayeke mû ngoi ti ala mingi nga apeut ti ga na ala agingo bê. Tongana ayeke tongaso, nyen la mo peut ti sara?

 Zia ambeni limite. Zia si fréquentation ni amû ngoi ti mo kue ape si mo négligé akua ti mo wala akamarade ti mo. Alana, so asara mariage asara ngu oku awe, atene: “Même na peko ti mariage ti mo, mo yeke lakue na bezoin ti akamarade ti mo na ala nga kue ayeke na bezoin ti mo. Sara sanka ti ala ape gï ndali ti so mo komanse ti fréquenté mbeni zo.”

 Girisa ape so, tongana mo sara mariage awe mo doit ti duti na équilibre na yâ ti aye kue na yâ ti fini ti mo. A yeke kota ye ti tene mo sara tongaso na temps so mo yeke fréquenté mbeni zo.

 Ti gbu li na ndö ni: Eskê mo ye ti tene zo so mo na lo ayeke fréquenté mba amû ngoi ti lo kue gï ndali ti mo wala lo passé temps lakue gï na mo? Eskê mo pensé so zo so mo na lo ayeke fréquenté mba ayeke mû temps ti mo mingi? Tongana nyen la ala use kue apeut ti duti na nzoni bango ndo na ndö ti aye so ala yeke ku na mbage ti mba?

 Mama-ndia ti Bible: “Ngoi ayeke dä ndali ti ye oko oko kue, ngoi ayeke dä ndali ti akua kue so zo ayeke sara.”—Zo-ti-fa-tene 3:1.

 “Tongana ala yeke sara gï ngia na temps so ala yeke fréquenté, mariage ti ala ni apeut ti duti ande na yâ ti kpale. A yeke nzoni ti tene azo so ayeke fréquenté mba agi ti sara aye so ala yeke sara ka ensemble, na tapande ti gue ti vo aye, ti sara akua ti yâ ti da wala ti voro Nzapa. Tongana ala sara tongaso, a yeke aidé ande ala mingi na yâ ti mariage ti ala.”—Daniel, so asara mariage asara ngu use awe.

 Girisa ape so, fréquentation ayeke mbeni ngoi so amû lege na mo ti mû desizion ti sara mariage wala ti arrêté ti fréquenté zo ni. Na yâ ti mbage 3 ni, a yeke sara ande tënë na ndö ti aye so mo bezoin ti hinga tongaso si mo mû nzoni desizion.