A yeke na lege ni ti hunda terê ti e ngbanga ti nyen la azo ayeke kui, mbilimbili tongana mbeni zo ti e so e ye lo mingi akui. Bible atene: “Siokpari ayeke kî so akpo zo na kuâ.”—1 aCorinthien 15:56.

Ngbanga ti nyen la azo kue asara siokpari nga ala yeke kui?

 Adam na Ève, so ayeke kozo koli na kozo wali, akui ndali ti so ala ke yanga ti Nzapa (Genèse 3:17-19). Ye ti peko ti kengo yanga ti ala ni ayeke kuâ, ndali ti so Nzapa la ayeke zo so ‘amû fini na aye kue.’—Psaume 36:9; Genèse 2:17.

 Adam amû siokpari ni so na amolenge ti lo kue. Bible atene: “Na lege ti zo oko siokpari alï na yâ ti dunia so, na lege ti siokpari kuâ aga, tongaso kuâ amû azo kue ngbanga ti so ala kue asara fade siokpari.” (aRomain 5:12). Azo kue akui ndali ti so ala kue asara siokpari.—aRomain 3:23.

Tongana nyen la a yeke zi ande kuâ biani biani?

 Nzapa amû zendo so na mbeni ngoi ande “lo yeke mene ande kuâ biaku biaku.” (Ésaïe 25:8). Ti zi kuâ, alingbi lo zi ye so ayeke sara si azo akui, so ti tene siokpari. Nzapa ayeke sara ande ye ni so na lege ti Jésus Christ, lo so “azi siokpari ti dunia so.”—Jean 1:29; 1 Jean 1:7.