En. Nzapa ayeke pensé na awakua ti lo so ayeke na kobela. Bible atene na ndö ti mbeni wakua be-ta-zo, atene: “Jéhovah ayeke mû na lo ngangu na ndö ti tange ti kobela”. (Psaume 41:3). Tongana mo yeke na mbeni kobela so apeut ti sava ni ape, aye so ge ayeke aidé mo ti wara dengo bê:

1.   Sambela ti wara lege ti gbu ngangu. Mo lingbi ti wara “siriri ti Nzapa so ahon ndö ti bibe kue”, so ayeke aidé mo ti gbu ngangu atâa kpale (aPhilippien 4:6, 7).

2.   Gi ti duti na anzoni pensé. Bible atene: “Bê so ayeke na ngia ayeke nzoni yorö, me bê so awoko kue azi ngangu ti zo kue.” (aProverbe 17:22). Gi ti sara atënë ti ngia ndali ti so apeut ti aidé mo na angoi ti vundu, me nga apeut ti sara nzoni na seni ti mo.

3.   Zia bê ti mo na ndö ti azendo ti Nzapa. Mbeni nzoni beku alingbi ti aidé mo ti duti na ngia atâa kobela so aninga na terê ti mo (aRomain 12:12). Bible atene mbeni ngoi ayeke ga ande so “zo ti kodro ni ayeke tene ande pëpe: ‘Terê ti mbi ason.’” (Ésaïe 33:24). Nzapa ayeke kaï ande angangu kobela, so azo so abâ tënë ti seni laso awara lege ti kaï ni ape. Na tapande, ambakoro ayeke kiri ande ti ga maseka nga ti duti na nzoni seni, Bible atene: “Zia si terê ti lo akiri aza ahon ti lâ ti maseka ti lo; zia lo kiri na tango so lo de maseka si ngangu ti lo ayeke mingi so.” (Job 33:25).

 Bâ tënë so: Atâa so aTémoin ti Jéhovah ahinga so Nzapa ayeke aidé ala, ala yeke gi nga mbeni nzoni kode ti kaï na ngangu kobela so aninga na terê ti ala (Marc 2:17). Me, e yeke sara pëpe publicité ti mbeni mbilimbili kode ti kaïngo na kobela; a lingbi zo oko oko la amû desizion na ndö ti fason so lo doit ti kaï na kobela ti lo.