Na ngu 2005, mbeni wali so iri ti lo ayeke Sowbhagya na Inde aperdre koli ti lo so lo ye lo mingi. Koli ni a-occupé lani na lo nga na molenge ti ala ti wali, Meghana so ayeke na ngu ota, nzoni mingi. Fadeso, a yeke ngangu na Sowbhagya ti wara nginza ti tene lo na molenge ti lo ti wali avivre na ni.

 Ye so ayeke ngangu mingi ayeke so, azo ake Sowbhagya. Afami ti lo atraité lo na molenge ti lo ti wali tongana azo ti iringo ye, nga ala yeke tene na lo lakue so lo yeke mbeni charge na ndö ti ala. Ti tene Sowbhagya awara dengo bê, lo komanse lani ti gue na eglize ti ndo so lo yeke dä, me azo ni abâ lo tongana mbumbuse zo ndali ti so lo yeke pauvre. Sowbhagya akomanse ti gi kua tongaso si lo peut ti wara nginza. Me, atâa effort kue so lo sara, lo wara kua ape.

 Sowbhagya atene: “Mbi bâ so mbeni espoir ayeke dä ape, tongaso mbi décidé lani ti fâ terê ti mbi. Me, mbi hinga so tongana mbi yeke dä ape, molenge ti mbi ti wali ayeke wara gbâ ti aproblème. Tongaso, mbi décidé ti tene e use kue e fâ terê ti e.” So Sowbhagya abâ so lo yeke ye oko ape nga azo aye lo ape, lo sigi ti gue ti vo poison.

 Na temps so Sowbhagya ayeke kiri na yanga-da na train, mbeni Témoin ti Jéhovah so iri ti lo ayeke Elizabeth aga nduru na lo na lo komanse ti causé na lo. Sowbhagya atene na lo so lo wara kua ti sara ape, na nzoni bê, Elizabeth atene na lo so lo yeke aidé lo ti wara mbeni kua. Elizabeth atene nga na lo so lo yeke gue ti manda Bible na mbeni zo la. Tënë ni a-étonné Sowbhagya ndali ti so atâa so lo gue na gbâ ti a-eglize, lo mä lâ oko ape so azo ayeke manda Bible. Elizabeth atene na Sowbhagya ti ga na yanga-da ti lo tongaso si lo hinga tongana nyen la a yeke manda Bible.

 Na temps so Sowbhagya asi na yanga-da, lo ngbâ lakue na idée ti tene lo fâ terê ti lo. Me, mbeni fami ti Sowbhagya nga na Meghana ague ti fono, tongaso lo décidé ti ku juska ti tene molenge ti lo ni akiri awe si lo sara ye so lo leke ti sara.

 Ti ku na kiringo ti molenge ni, lo gue na ndo ti Elizabeth, na Elizabeth ayamba lo. Na temps so lo yeke na yanga-da ni, Elizabeth afa na lo livre Bible afa nyen biani? Lê ti Sowbhagya atï na ndö ti chapitre “Azo so akui ayeke na ndo wa?” Chapitre so agbu bê ti lo ndali ti so koli ti lo akui ade ti ninga ape. Na lango ni so, Sowbhagya ayeda ti manda Bible.

 Elizabeth a-invité lani Sowbhagya na mbeni kota bungbi ti lango ota so a yeke sara ni na semaine ti peko, na Sowbhagya ayeda ti gue. Programme ni agbu bê ti lo mingi na lo décidé ti ga Témoin ti Jéhovah. Na temps so lo londo na kota bungbi ni lo kiri na yanga-da, lo wara mbeni kua.

 Sowbhagya angbâ lani ti manda Bible. Fadeso, ahon ti tene lo fâ terê ti lo, lo yeke na mbeni raison ti ngbâ na fini. Lo wara batême, na pekoni molenge ti lo ti wali, Meghana awara nga batême. Laso, ala use kue ayeke apionnier permanent, nga Meghana ayeke sara kua tongana télévolontaire na mbeni bureau ti traduction na Inde.

 Sowbhagya nga na Meghana akiri merci mingi na Elizabeth so aga lani nduru na terê ti Sowbhagya na yâ ti train ni, so abi bê na lo nga afa tâ tënë na lo. Ala kiri nga merci mingi na Jéhovah. Meghana atene: “Tongana e hinga lani tâ tënë na lango ni so ape, ânda a lu e awe. Fadeso, e yeke na ngia mingi. Mbi na mama ti mbi, e yeke ku kungo ngoi so e yeke kiri ti gbu babâ ti mbi na kate, ti fa ye na lo na ndö ti Jéhovah, nga ti tene na lo comment Jéhovah asö lani fini ti e.”