Na gbata ti Tabasco so ayeke na kodro ti Mexique, a bâ so wungo ti azo so ayeke fâ terê ti ala ague na li ni mingi. Ni la na ngu 2017, aTémoin ti Jéhovah aleke mbeni kapa ti fango tënë ti Nzapa ti nze use ti kiri ti kangbi Zingo na lango! ti nze ti avril 2014, so li ti tënë ni na Français ayeke “Trois bonnes raisons de s’accrocher à la vie.” Kapa ni so andu bê ti azo lani mingi.

Mbeni Témoin ti Jéhovah, so iri ti lo ayeke Faustino, asara lisoro na mbeni wali so ayeke gi bê ndali ti molenge ti lo ti koli so ayeke na ngu 22. Nzara ti gigi asigi na yâ ti molenge ti lo ni nga lo tara ti fâ terê ti lo. Wali ni ahinga ye so lo peut ti sara ndali ti molenge ti lo ni ape. Me na ngoi so Faustino amû na lo Zingo na lango! ni, lo tene: “A yeke biani ye so molenge ti mbi ayeke tâ na bezoin ni la.” Na ndade ni, Faustino akiri aga abâ molenge-koli ni na ala sara lisoro na ndö ti awango ti Bible so ayeke na yâ ti Zingo na lango! ni. Na peko ti so Faustino aga abâ molenge ni fani mingi, molenge ni achangé. Faustino atene: “Fadeso lo yeke na vundu mingi encore ape nga lo yeke na ngia.” Na ndö ni, lo fa nga aye so lo manda so na mbeni ita ti lo ti koli so ayeke nga na oko kpale ni so.

Karla so ayeke na gbata ti Huimanguillo amû Zingo na lango! ni so ti mû maboko na mbeni kamarade ti lo ti klase. Lo tene: “Mbi bâ lani so mbeni kamarade ti mbi ti wali so ayeke na ngu 14 aduti gï na mawa. Mbi hunda lo, na lo fa na mbi akpale so ayeke na yâ ti sewa ti lo. Na ngoi so e yeke causé, mbi bâ aplace ti kä na ndö ti maboko ti lo ti gauche.” Molenge-wali ni ayeke na habitude ti suru ndö ti maboko ti lo nga na gere ti lo na kä. Lo bâ so lo yeke pendere ape nga fini ti lo ayeke na sens ape. Karla amû na lo Zingo na lango! ni. Na peko ti so molenge-wali ni adiko ni, lo tene na Karla lo tene so a yeke mo bâ mo tene a sara mbeti ni gï ndali ti lo. Na ngia na yanga ti lo lo tene so ti duti na fini ayeke bien.

Na gbata ti Villahermosa, mbeni koli ayeke lani dä so ayeke na yâ ti kota vundu. Lo perdre kua ti lo, nga wali ti lo adö lo na amolenge azia. Lo sambela ti tene Nzapa amû maboko na lo, me vundu ti lo ni angbâ gï ngbango. Na ngoi so lo ye ti fâ terê ti lo, Martín na Miguel, so ayeke ambeni Témoin ti Jéhovah apika yanga-da ti lo. Koli ni azi porte, na aTémoin ni amû na lo Zingo na lango! ni. Tongana koli ni abâ gï li ti tënë ti mbeti ni, lo bâ so a yeke Nzapa la akiri tënë na sambela ti lo so. Martín na Miguel adë bê ti lo na atënë ti Bible. Ambeni lango kete na pekoni, ala bâ so koli ni ayeke gi bê ti lo ahon ndö ni tongana ti kozo ape. Fadeso, ala yeke manda Bible na lo fani use na yâ ti yenga oko.

Na ngoi ti kapa ti fango tënë so, aTémoin ti Jéhovah ague nga na ada ti kanga mingi so ayeke na yâ ti gbata ti Tabasco ti sara lisoro na azo ti kanga ni na ndö ti awango ti Bible tongaso si ala duti na ngia na yâ ti fini ti ala. A-Témoin ti Jéhovah aleke ti sara lisoro na azo ni na lege ti avidéo, afango tënë ti Nzapa nga ala leke ti sara lisoro na azo ni na ndö ti raison so ndali ni alingbi e ngbâ na fini, so a sara tënë ni na yâ ti Zingo na lango! ni. Ye so anzere mingi na azo ti kanga ni nga na azo so asara kua na yâ ti ada ti kanga ni. Na tapande, mbeni zo ti kanga ni atene: “Mbi tara ti fâ terê ti mbi fani ota. Ambeni zo atene na mbi so Nzapa ayeke pensé na mbi, me ala mû lâ oko Bible ape ti fa na mbi so tënë so ala tene so ayeke tâ tënë. Atënë so ala [aTémoin ti Jéhovah] atene amû tâ biani ngangu na mbi.”

Ambeni zo nde amä nga tënë ti kapa ti fango tënë so. Secrétaire d’État ti santé ti kodro ni agonda aTémoin ti Jéhovah ndali ti ngangu kua so ala sara ti mû maboko na azo ti gbata so. A sigi nga na mbeni mbeti-sango na ndö ti kapa ni, so li ti tënë ni ayeke “Ala gue ti tiri ti tene azo azia lege ti fâ terê ti ala wani.”