1. Tinaphindula tani na luso yathu yakunyerezera pinthu pyakuti tidzati kupiona? (Onani cithundzithundzi cakutoma.)

 LUSO yathu yakunyerezera pinthu pyakuti tidzati kupiona ndi muoni udatipasa Mulungu. Luso ineyi isatiphedza toera kucita masasanyiro andzeru mbatidikhira pinthu pyadidi pyantsogolo. Yahova asaona mwanyapantsi pinthu pyantsogolo, m’Bhibhlya kazinji kene iye asatipanga pinthu pinafuna kucitika ntsogolo. Ife tisakwanisa kunyerezera pinthu pinafuna kudzacitika. Mwandimomwene, luso yathu yakunyerezera pinthu pyakukhonda kuoneka, isatiphedza toera kukulisa cikhulupiro.​—2 Akor. 4:18.

2, 3. (a) Kodi manyerezero athu anatiphedza tani? (b) Ndi mibvundzo ipi inafuna ife kudinga mu nsolo uno?

² Midzidzi inango tisanyerezera pinthu pyakuti cipo pinadzacitika. Mwacitsandzo, mwana ntsikana anganyerezera kukwira padzulu pa bemberuwa, pyenepi nkhabe kwanisika. Mbwenye khala Yana aphatisira ndzidzi toera kunyerezera kuti mbapidakhala tani kukwata mwanace Samwele toera kutumikira ku tabernakulu, iye mbadakhala na mathangwi adidi toera kunyerezera pyenepi. Pyenepi mbapidabverana na pikhadatonga iye, natenepa mbapidamphedza toera kukwanirisa pidapikira iye. (1 Sam. 1:22) Tinganyerezera  pinthu pidapikira Mulungu, mwandimomwene tikunyerezera pinthu pyakuti pinadzacitikadi.​—2 Ped. 1:19-21.

³ Mwakukhonda penula, anthu azinji akukhulupirika a midzidzi ya Bhibhlya akhanyerezera pinthu pidapikira Mulungu. Kodi iwo aphindula tani mu kunyerezera nkhombo za ntsogolo? Na tinaphindula tani mu kunyerezera pinthu pyakutsandzayisa pidapikira Mulungu kwa anthu akubvera?

4. Thangwi yanji Abheli mbadakwanisa kunyerezera pyantsogolo?

⁴ Abheli ndi munthu wakutoma adapangiza cikhulupiro ku mapikiro a Yahova. Iye akhadziwa pidalonga Yahova kuna nyoka pakumala kudawa kwa Adamu na Eva: ‘Ndinadzayikha udani pakati pa mbeu yako na ya nkazi. Iye anadzaphwanya nsolo wako, iwe unadzaluma citende cace.’ (Gen. 3:14, 15) Mbwenye Abheli nee akhadziwa kuti mwandimomwene pyenepi mbapidacitika tani. Panango, iye anyerezera kakamwe pinthu pikhadalonga Mulungu. Iye mbadakwanisa kunyerezera: ‘Mbani anafuna kudzalumwa citende’ toera kuphedza anthu kuti akhale pontho aungwiro?’ Abheli akhakhulupira kuti pyonsene pidapikira Yahova mbapidakwanirisika, natenepa Yahova akomerwa na ntsembe yace.​—Lerini Genesi 4:3-5; Ahebere 11:4.

5. Thangwi yanji kunyerezera pyantsogolo mbakudawangisa Enoki?

⁵ Mamuna wakukhulupirika Enoki apangiza cikhulupiro, maseze athimbana na anthu akuipa akuti akhatikana Mulungu. Enoki apumirwa toera kulonga kuti Yahova mbadabwera ‘pabodzi na pikwi na pikwi pya aanju ace akucena, toera kudzatonga onsene, mbaonesa nyatwa anyakudawa onsene thangwi ya pyakuipa pyonsene; pidacita iwo nee kulemedza Mulungu, thangwi ya kuxola kudacita anyakudawa akukhonda kubvera Mulungu.’ (Yuda 14, 15) Ninga munthu wacikhulupiro, Enoki mbadakwanisa kunyerezera dziko yakusowa uipi.​—Lerini Ahebere 11:5, 6.

6. Kodi Nowa mbadapitiriza kunyerezeranji pakumala kwa Cigumula?

⁶ Nowa apulumuka pa Cigumula thangwi ya cikhulupiro cace. (Aheb. 11:7) Pakumala kwa Cigumula, cikhulupiro cace cankulumiza toera kupereka ntsembe. (Gen. 8:20) Ninga Abheli, mwakukhonda penula Nowa akhali na cikhulupiro cakuti anthu mbadasudzulwa ku madawo na kufa. Pakumala kwa Cigumula, dziko yadzakhala pontho yakuipa kakamwe. Nimrode atoma kutonga mbacitisa anthu kukhonda kubvera Yahova. Mbwenye Nowa apitiriza na cikhulupiro cakuwanga. (Gen. 10:8-12, NM) Mwakukhonda penula, Nowa mbadawangiswa mu kunyerezera pya ndzidzi wakuti Mulungu mbadadzamalisa utongi wakuipa, madawo na kufa kudatambira ife. Tinakwanisambo kunyerezera ndzidzi unoyu wakutsandzayisa wakuti uli cifupi kakamwe!​—Arom. 6:23.

7. Ndi tsogolo ipi yakuti Abrahamu, Izaki na Yakobe mbadakwanisa kuinyerezera?

⁷ Abrahamu, Izaki, na Yakobe mbadakwanisa kunyerezera tsogolo yakutsandzayisa kakamwe, thangwi Mulungu akhadaapikira kuti kubulukira mwa mbeu yawo, anthu a madzindza onsene mbadapaswa nkhombo. (Gen. 22:18; 26:4; 28:14) Anawo mbadadzanjipa, pontho mbadakhala mu Dziko Yakupikirwa ya Mulungu. (Gen. 15:5-7) Cikhulupiro ca amuna anewa akugopa Mulungu, mbacidaaphedza kunyerezera mabanja awo mbakatsandzaya na umaso mu dziko ineyi. Mwandimomwene, kubulukira pa kudawa kwa Adhamu na Eva, Yahova asapasa cinyindiro atumiki ace akukhulupirika cakuti anadzakhala pontho na nkhombo zidaluza Adhamu.

8. Ninji cidaphedza Abrahamu toera kupangiza cikhulupiro cakuwanga?

 ⁸ Panango luso yakunyerezera pinthu pidapikira Mulungu, pyaphedza Abrahamu toera kupangiza cikhulupiro cakuwanga. Bhibhlya isalonga kuti maseze Abrahamu na atumiki anango akukhulupirika a Mulungu ‘nee aona kukwanirisika kwa pinthu pidapikirwa iwo’ mu ndzidzi wawo, ‘iwo apiona nakutali mbapitambira.’ (Lerini Ahebere 11:8-13.) Abrahamu akhadziwa kuti Yahova ndzidzi onsene akwanirisa mapikiro ace a nduli, natenepa, iye akhali na cinyindiro cakuti mapikiro onsene a Yahova a ntsogolo mbadakwanirisika.

9. Kodi kukhulupira mapikiro a Mulungu kwaphedza tani Abrahamu?

⁹ Cikhulupiro ca Abrahamu ku mapikiro a Mulungu, camuwangisa toera kucita pidaphembwa iye na Yahova. Na cikhulupiro, iye asiya nzinda wa Uri mbakhonda kumanga mudzi toera kukhazikika m’mizinda yonsene ya Kanani. Abrahamu akhadziwa kuti mizinda ineyi nee mbidapitiriza kwenda na kwenda, thangwi atongi ace nee akhatumikira Yahova. (Yos. 24:2) Mu umaso wace onsene, Abrahamu ‘akhadikhira nzinda wakumangwa mwadidi, wakuti mwanacinthu na nyakuumanga ndi Mulungu.’ (Aheb. 11:10) Abrahamu akwanisa kunyerezera ninga akukhala mu nzinda wakwenda na kwenda wakutongwa na Yahova. Abheli, Enoki, Nowa, Abrahamu na anango ninga iwo, akhakhulupira pya kulamuswa muli akufa mbadikhira kukhala maso pa dziko yapantsi mu Umambo wa Mulungu, wakuti ndi ‘nzinda wakumangwa mwadidi.’ Kunyerezera nkhombo zenezi kwawangisa cikhulupiro cawo kwa Yahova.​—Lerini Ahebere 11:15, 16.

10. Kodi maonero akulinganira a Sara thangwi ya ntsogolo amphedza tani?

¹⁰ Nyerezerani pya Sara nkazi wa Abrahamu. Pikhali iye na pyaka 90 pyakubalwa na wakusowa mwana, maonero ace akulinganira thangwi ya ntsogolo amphedza kupangiza cikhulupiro. Mwandimomwene, iye anyerezera mbeu yace mbikatsandzaya na nkhombo zidapikira Yahova. (Aheb. 11:11, 12) Ninji cidamphedza kukhala na cidikhiro ceneci? Yahova akhadapanga mamunace: ‘Ndinadzampasa nkhombo, pontho ndinadzakupasa mwana wamamuna kubulukira mwa iye; ndinadzampasa nkhombo, iye anadzakhala mama wa madzindza; mwa iye munadzabuluka amambo.’ (Gen. 17:16) Pidamala iye kubala Izaki, Sara akhali na mathangwi adidi toera kunyindira kuti mapikiro anango onsene a Mulungu kuna Abrahamu mbadakwanirisika. Ife tinakwanisambo kuwangisa cikhulupiro cathu tinganyerezera pinthu pyonsene pyakutsandzayisa pidatipikira Yahova, pyakuti pinadzakwanirisika.

11, 12. Kodi Mose akulisa tani ufuni kwa Yahova?

¹¹ Mose ndi munthu unango adapangiza cikhulupiro kwa Yahova, mbakulisa ufuni wakuwanga kwa iye. Pikakhala iye mphale Mose akakhala pa nyumba ya mambo wa mu Ejito, mbipidakhala pyakukhonda nentsa kwa iye kukulisa cifuno cakukhala na mbiri na mpfuma. Mbwenye kubulukira kwa anyakubalace, Mose apfundziswa pya Yahova na cifuniro Cace ca kuombola Ahebheri mu ubitcu na kuapasa Dziko Yakupikirwa. (Gen. 13:14, 15; Eks. 2:5-10) Khala kazinji kene Mose akhanyerezera pya nkhombo za ntsogolo za mbumba ya Mulungu, musanyerezera kuti mbadakulisanji muntima mwace​—cifuno ca kubvekera peno ufuni kwa Yahova?

¹² Bhibhlya isatipanga: ‘Pa kukhala na cikhulupiro, Mose, pidamala iye kukula, akhonda kuthulwa mwana wa mwana wacikazi wa Farao, mbasankhula kuona nyatwa pabodzi na mbumba ya Mulungu, mbakhonda kukomerwa na maphindu akutsandzayisa a ndzidzi wakucepa a madawo. Mose akhaona kuti kunyozeka  thangwi ya Kristu kuli ninga mpfuma yakupita upfumi wa mu Ejito; thangwi iye akhaona muoni ukhafuna iye kudzatambira.’​—Aheb. 11:24-26.

13. Kodi kunyerezera mwacidikhodikho mapikiro a Mulungu kwaphedza tani Mose?

¹³ Kunyerezera mwacidikhodikho pinthu pidapikira Yahova kwa Israele, pyaphedza Mose toera kuwangisa cikhulupiro cace na ufuni wace kwa Mulungu. Ninga atumiki anango a Yahova, Mose akhadziwambo kuti Yahova mbadaombola anthu onsene mu kufa. (Yobe 14:14, 15; Aheb. 11:17-19) Pyenepi pyakulumiza Mose toera kufuna Mulungu wakuti akhabvera ntsisi Ahebheri na anthu onsene. Cikhulupiro na ufuni, pyaphedza Mose mu umaso wace onsene. (Deut. 6:4, 5) Ngakhale akhadathuswa na Farao kuti mbadamupha, Mose nee agopa. Cikhulupiro cace, ufuni wace kwa Mulungu, na kunyerezera pinthu pyakutsandzayisa pyantsogolo pyamuwangisa toera kuthimbana mwacipapo na kuthuswa kweneku.​—Eks. 10:28, 29.

14. Kodi anango asanyerezera tani thangwi ya ntsogolo?

¹⁴ Lero, anthu azinji ali na maonero akuphonyeka thangwi ya ntsogolo. Mwacitsandzo, maseze iwo nkhabe pizinji, asanyerezera pyakukhala akupfuma kakamwe na kukhala akutsidzikizika, ngakhale kuti umaso lero wadzala na “nyatwa na kutsukwala.” (Sal. 90:10) Iwo asanyerezera kukhala na umaso wakusowa pyakudzudzumisa pantsi pa utongi wa anthu, mu ndzidzi wakuti Bhibhlya isalonga kuti Umambo wa Mulungu ndiwo basi unafuna kubweresa citsidzikizo candimomwene kwa anthu. (Dan. 2:44) Anthu azinji asanyerezera kuti Mulungu nee anadzafudza makhaliro ano akuipa a pinthu, mbwenye Bhibhlya isalonga mwakusiyana kakamwe. (Sof. 1:18; 1 Jwau 2:15-17) Pidikhiro pyenepi pya anthu anapwaza cifuniro ca Yahova mphyapezi kakamwe.

15. (a) Kodi Akristu asaphindula tani mu kunyerezera pya cidikhiro cawo? (b) Longani cinthu cinadikhira imwe kucita ntsogolo Mulungu angakwanirisa mapikiro ace.

¹⁵ Mbwenye ninga Akristu, tisawangiswa toera kunyerezera pya cidikhiro cathu, mwakukhonda tsalakana khala ndi cakudzulu peno cakukhala pa dziko yapantsi. Munakwanisa kunyerezera kuti muli kutsandzaya na pinthu pidapikira Mulungu? Kunyerezera mwacidikhodikho pinafuna imwe kucita mu ndzidzi wakuti Mulungu akukwanirisa mapikiro ace, mwakukhonda penula pinatsandzayisa ntima wanu. Panango munakwanisa ‘kunyerezera’ kuti mukukhala pa dziko yapantsi kwenda na kwenda. Nyerezerani kuti muli kuphata basa na anango toera kucitisa dziko yonsene kukhala paradizu. Kukhala na anyakuendekana akuti asafuna Yahova ninga imwe. Nyerezerani kuti muli na ungumi wadidi, mphambvu, pontho nkhabe cinthu cinakunentsani. Ale anatsogolera basa yakusasanyira papswa dziko asacita umaso kukhala wakutsandzayisa, thangwi iwo asakutsalakanani na ntima onsene. Imwe muli wakukomerwa mu kuphatisira maluso anu, thangwi pyonsene pinacita imwe pisaphindulisa anango na kupasa mbiri Mulungu. Mwacitsandzo, nyerezerani kuti mukuphedza munthu adamala kulamuswa muli akufa toera kudziwa Yahova. (Jwau 17:3; Mach. 24:15) Maonero anewa si ndoto tayu. Manyerezero anewa akutsandzayisa kakamwe asabverana na undimomwene wa Bhibhlya unalonga pyantsogolo.​—Iza. 11:9; 25:8; 33:24; 35:5-7; 65:22.

16, 17. Tisaphindula tani tingalonga pya cidikhiro cathu?

¹⁶ Tingalonga na Akristu anango thangwi ya pinthu pinadikhira ife kucita mu ndzidzi unakwanirisa Yahova mapikiro ace, manyerezero athu thangwi ya pinthu pyantsogolo asakhala akuwanga kakamwe. Maseze nee m’bodzi wa ife asadziwa mwadidi kuti mwandimomwene  makhaliro athu anadzakhala tani mu dziko ipswa, munalonga ife pyenepi, tisawangisana unango na ndzace na kupangiza cikhulupiro cathu ku pinthu pidapikira Mulungu. Pidacedzera mpostolo Paulu abale a ku Roma, mwandimomwene iwo apereka takhuta na ‘kuwangisana mu cikhulupiro,’ ndi pyenepi pinafunambo ife m’midzidzi ino yakunentsa.​—Arom. 1:11, 12.

¹⁷ Kunyerezera pya ntsogolo kunatiphedzambo toera kucalira manyerezero akuphonyeka thangwi ya nyatwa zinathimbana na ife lero. Mpostolo Pedhro panango akhali wakudzudzumika mudapanga iye Yezu kuti: ‘Onani, ife tasiya pyonsene mbatikutowerani; tinadzapaswanji mphapo?’ Toera kuphedza Pedhro na anango kuti anyerezere pyantsogolo, Yezu atawira: ‘Andedi ine ndinakupangani, pangacitwa pontho pantsi pano, Mwana wa munthu mbakhala pa mpando wace wambiri, imwe mudanditowera, munadzakhalambo m’mipando khumi na miwiri, mbamudzatonga madzindza khumi na mawiri a Israele. Munthu onsene adasiya nyumba peno abaleace acimuna peno acikazi peno babace, peno mai wace peno ana, peno minda thangwi ya dzina yanga anadzatambira pizinji kupiringana pyenepi, mbadzakhala na umaso wakukhonda mala.’ (Mat. 19:27-29) Pedhro na anyakupfundza anango mbadakwanisa kunyerezera basa yawo mu utongi wakuti mbudatonga dziko yonsene yapantsi na kubweresa nkhombo zizinji kwa anthu akubvera.

18. Kodi kunyerezera pya kukwanirisika kwa mapikiro a Mulungu kusatiphindulisa tani lero?

¹⁸ Ndzidzi onsene, atumiki a Yahova pa dziko yapantsi asaphindula mu kunyerezera pya kukwanirisika kwa mapikiro a Mulungu. Abheli akhanyerezera pya pikiro ya Mulungu thangwi ya tsogolo yadidi, natenepa, apangiza cikhulupiro ku mapikiro anewa mbakomeresa Yahova. Abrahamu akwanisa kupangiza cikhulupiro cakuwanga thangwi akhanyerezera pya kukwanirisika kwa pikiro ya ‘mbeu,’ natenepa akwanisa kubvera Yahova ngakhale m’midzidzi yakunentsa. (Gen. 3:15) Mose ‘akhanyerezera pya muoni ukhafuna iye kudzatambira’ natenepa apangiza cikhulupiro cakuwanga na ufuni kuna Yahova. (Aheb. 11:26) Cikhulupiro cathu na ufuni wathu kuna Mulungu pinakwanisa kuthimizirika tingaphatisira maluso athu toera kunyerezera pya kukwanirisika kwa pinthu pidapikira Yahova. Mu nsolo unatowerera tinadzadinga kuti tinaphatisira tani mwadidi muoni unoyu udapaswa ife na Mulungu.