NYEREZERANI kuti mukufamba mu nseu tcititciti. Mwakukhonda dikhira, musaona kuti alipo anakutowerani nduli mwanu. Mungalimira kufamba, iye asalimirambo. Mungafamba mwakucimbiza kakamwe, iye asafambambo mwakucimbiza kakamwe. Imwe musathamangira kunyumba ya xamwali wanu wakuti ali cifupi. Xamwali wanu angafungula nsuwo mbamupita n’nyumba mwace, imwe munakhurudzika thangwi musadziwa kuti muli wakutsidzikizika.

Panango imwe mwadzati kuthimbana na makhaliro anewa. Mbwenye panango pana pinthu pinango pinakudzudzumisani mu umaso wanu. Mwacitsandzo, kodi musathimbana na madodo akuti musafuna kuasiya, mbwenye musapitiriza kuacita? Kodi musawangisira mu ndzidzi uzinji toera kugumana basa mbwenye mudzati kuigumana? Kodi musagopa kugwesera mbamuthimbana na nyatwa za ungumi thangwi yakugwesera? Peno ciripo cinthu cinango cinakudzudzumisani?

Mungathimbana na nyatwa yonsene, mbapidakhala pyadidi kukhala na xamwali wakuti munakwanisa kucedza naye, mbakuphedzani mungafuna ciphedzo. Yahova ndi ntundu unoyu wa xamwali kwa imwe. Mwakubverana na Izaiya 41:8-13, Yahova akhali xamwali wa Abhrahamu, iye anakwanisambo kukhala xamwali wanu. Pa vesi 10 na 13, Yahova asapikira kuna m’bodzi na m’bodzi wa ife: ‘Leka kugopa, ndiri na iwe. Leka kudzudzumika, thangwi ndine Mulungu wako. Ndinadzakupasa mphambvu, ndinadzakuphedza, ndinadzakuphata mwamphambvu na nkono wanga wamadyo waulungami. Thangwi ine Yahova Mulungu wako, ndisaphata nkono wako wamadyo, mbandikupanga: Leka kugopa. Ndinadzakuphedza.’

Mafala a Yahova ndi akuwangisa kakamwe. Nyerezerani kuti ninji pinatipikira Yahova pa Izaiya. Vesi ineyi nee isalonga kuti imwe mukufamba na Yahova mbamuphata manjace. Mbamudafamba na Yahova, nkono wace wamadyo mbudaphata nkono wanu wabzwere. M’mbuto mwace, Yahova asafuthula ‘nkono wamadyo waulungami mbaphata nkono wanu wamadyo’ ninga akukukwewani toera kukubulusani m’makhaliro akunentsa. Yahova angaphata nkono wanu wamadyo, iye asakupasani mphambvu mukulonga: ‘Leka kugopa. Ndinadzakuphedza.ʼ

Kodi musaona Yahova ninga Babanu na Xamwali wanu waufuni? Kodi musanyindira kuti iye anadzakuphedzani mungathimbana na nyatwa? Mwandimomwene, Yahova asakutsalakanani na asafuna kukuphedzani. Mungathimbana na nyatwa na pinentso, Yahova asafuna kuti mupibve kukhala wakutsidzikizika, thangwi iye asakufunani kakamwe. Iye ndi ‘mphedzi wathu wandimomwene mu ndzidzi wa nyatwa.’​—Masalmo 46:1.

Anthu anango asapitiriza kukumbuka madodo awo akale mbapenula khala Mulungu aalekerera.  Khala musapibva tenepo, nyerezerani pya mamuna wakukhulupirika Yobe. Iye atawira kuti adawa pikhali iye mphale. (Yobe 13:26) Nyamasalmo Dhavidhi akhalimbo na mabvero mabodzi ene mbadembetera Yahova: ‘Lekani kukumbuka madawo na pyakuipa pidacita ine mu uphale wanga.’ (Masalmo 25:7) Nakuti ndife akusowa ungwiro, tonsene ‘tisadawa mbaticimwana kuona mbiri ya Mulungu.’​—Aroma 3:23.

Mafala acibalangazo anagumanika pa Izaiya kapitulu 41 alemberwa Aisraele. Madawo awo akhali makulu kakamwe, natenepa Yahova alonga kuti mbadaatcunyusa mukutawirisa kuti aendeswe ku ubitcu ku Bhabhilonya. (Izaiya 39:6, 7) Mu ndzidzi ubodzi ene, Mulungu apikira kuti mbadasudzula ale akuti mbadatcunyuka mbabwerera kuna iye! (Izaiya 41:8, 9; 49:8) Lero, Yahova asapangiza ufuni na ntsisi zibodzi zene kuna ale anatcunyuka mbabwerera kuna iye.​—Masalmo 51:1.

Dingani citsandzo ca Takuya, * wakuti akhayesera kukunda nsambo wakuona ucipezipezi na kubalangazika na pyakumaso [peno masturbação]. Mbwenye kazinji kene iye akhagwa m’madawo mabodzi ene. Kodi iye akhapibva tani? Iye alonga: “Ndikhapibva kuti ndine munthu wakusowa basa, mbwenye pikhacita ine phembero kuna Yahova mbandiphemba kulekererwa, iye akhandiphedza.” Kodi Yahova akhacita tani pyenepi? Iye apangwa na akulu a mpingo toera ndzidzi onsene aamenyere ntokodzi angagwa pontho mu nsambo unoyu. Iye alonga: “Ndikhali na manyadzo toera kuamenyera ntokodzi, mbwenye pikhacita ine pyenepi ndikhakhala na mphambvu. Buluka penepo, akulu a mpingo acita masasanyiro toera muyang’aniri wa cisa acedzere Takuya. Muyang’aniri wa cisa ampanga: “Ine nee ndiri pano mwasusudeu. Mbwenye ndiri pano thangwi akulu a mpingo afuna kuti ndigumanike pano. Iwo akusankhulani toera mucedzerwe.” Takuya alonga: “Ine ndikhacita madawo, mbwenye Yahova andipasa ciphedzo kubulukira kwa akulu a mpingo.” Mukupita kwa ndzidzi, Takuya asiya nsambo wace wakuipa, adzakhala mpainiya wa ndzidzi onsene, lero asatumikira ku Bheteli. Ninga mudaphedzera iye m’bale unoyu, Yahova anadzakuphedzanimbo mungacita madodo.

Anango asadzudzumika thangwi yakuluza basa yawo mbakhonda kugumana inango. Mphyakunentsa kakamwe khala mukusaka basa mwakubwereza-bwereza mbamukhondwa. Munthu angathimbana na makhaliro anewa akunentsa, asakhala na mabvero akusowa basa. Kodi Yahova anakuphedzani tani? Panango iye nee anakuphedzani kugumana mwakucimbiza basa yakuti musaifuna kakamwe. Mbwenye iye anakwanisa kukuphedzani toera kukumbuka mafala a Dhavidhi: ‘Ndine nkhalamba, mbwenye kutomera uwana wanga ndidzati kuona munthu wakulungama, peno anace kuenda kasundza cakudya.’ (Masalmo 37:25) Yahova asakuonani kukhala munthu wakufunika kakamwe, pontho iye anakwanisa kuphatisira ‘nkono wace wamadyo waulungami’ toera kukupasani pinafuna imwe toera mupitirize kuntumikira.

Sara, anakhala ku Kolombiya, aona ciphedzo ca Yahova mu umaso wace. Iye akhaphata basa pa komponi ikulu, pontho akhawina kobiri izinji. Mbwenye iye akhafuna kucita pizinji m’basa ya Yahova, natenepa, iye asiya basa yace mbatoma kutumikira  ninga mpainiya. Mbwenye pikhali pyakunentsa kwa iye kugumana basa yakuti mbadaphata basa midzidzi mingasi pa ntsiku ninga pikhafuna iye. Iye afungula mbuto toera kugulisa sorvete, mbwenye mwapang’ono-pang’ono kobiri yace yamala, mbasiya malonda ace. Iye alonga: “Papita pyaka pitatu, mbwenye na ciphedzo ca Yahova ndakwanisa kupirira.” Mu ndzidzi unoyu, iye adzindikira kuti ndi pinthu pipi pyakufunika kakamwe kwa iye, mbakhonda kudzudzumika na pya ntsiku ya mangwana. (Mateo 6:33, 34) Mukupita kwa ndzidzi, patrau wace wakale ancemera mbampasa pontho basa ikhacita iye kale. Sara alonga kuti basi ene mbadatawira basa khala mbadaphata midzidzi mingasi pa ntsiku, pontho khala mbadatawiriswa kubulusa ferya toera akhale na ndzidzi wakuenda ku misonkhano ya mpingo, ya cisa na ya gawo. Lero, Sara nee asawina kobiri ninga ikhawina iye kale, mbwenye iye asapitiriza kutumikira ninga mpainiya. Iye alonga kuti mu ndzidzi ukhathimbana iye na pinentso, akhaona ciphedzo ca Yahova.

Kugwesera kusadzudzumisambo anthu azinji. Iwo asadzudzumika khala anakwanisa kukhala na kobiri yakukwana toera kutsalakanika nayo. Iwo asadzudzumikambo thangwi ya nyatwa za ungumi zakuti panango anathimbana nazo ntsogolo. Panango ndi Mambo Dhavidhi adadembetera Yahova: ‘Lekani kundidwala cincino mu unkhalamba wanga; lekani kundisiya cincino thangwi yakusowa kwanga mphambvu.’​—Masalmo 71:9, 18.

Kodi anyakugwesera anakwanisa tani kukhala na cinyindiro ca ntsogolo? Iwo asafunika kupitiriza kuwangisa cikhulupiro cawo kuna Mulungu mbanyindira kuti iye anadzaapasa pyonsene pinafuna iwo. Mbwenye khala mu uphale peno mu utsikana wawo akhali na umaso wadidi kakamwe, panango asafunika kululupisa umaso wawo mbakomerwa na pinthu pyakucepa piri na iwo. Iwo panango ananyerezera kuti ‘kudya masamba’ m’mbuto mwa ‘kudya nyama ya ng’ombe’ pinaphedza ungumi wawo! (Misangani 15:17) Mungatumikira Yahova mwaphinga, iye anapitiriza kukutsalakanani, mwakukhonda tsalakana thunga yanu.

Nyerezerani pya José na Rose, anatumikira Yahova m’basa ya ndzidzi onsene mu pyaka pyakupiringana 65. Mukupita kwa ndzidzi, iwo athimbana na pinentso pizinji. Iwo akhafunika kutsalakana pai wace Rose wakuti akhafuna ciphedzo masiku na masikati. Pontho, José akhali na utenda wa câncer, iye akhafunika kucitwa operasau na ukondzi wa quimioterapia. Kodi Yahova aphatisira tani nkono wace wamadyo toera kuphedza banja ineyi yakukhulupirika? Iye aphatisira banja inango Yacikristu, Tony na Wendy. Iwo akhali na nyumba yakuti akhafuna kupasa apainiya a ndzidzi onsene mwakukhonda lipa. Tony akumbuka kuti mu ndzidzi ukhapfundza iye kuxikola, akhaona banja ineyi na pa janela mbakamwaza mphangwa. Tony akhakomerwa na phinga ikhapangiza iwo, pyenepi pyamphedza kakamwe. Nakuti José na Rose aphatisira umaso wawo onsene m’basa ya Yahova, Tony na Wendy aapasa nyumba toera kukhala. Mu pyaka 15, iwo asaphedza José na Rose akuti ali nkati mwa pyaka 85 pyakubalwa. José na Rose asaona kuti Tony na Wendy ndi nkhombo yakubuluka kwa Yahova.

Yahova asapereka ‘nkono wace wamadyo waulungami’ kuna imwe. Iye asapikira kwa imwe: ‘Leka kugopa. Ndinadzakuphedza.’ Kodi imwe munadzatawira kuphata nkono wace?