Mibvundzo Inacitwa na Anyakuleri
Bukhu ya Ezekyele kapitulu 37 isalonga pimiti piwiri pidadzakhala ubodzi basi. Kodi pyenepi pisabvekanji?
Kubulukira kwa mprofeta Ezekyeli, Yahova apikira kuti mbumba yace mbidabwerera ku Dziko Yakupikirwa, iyo mbidadzakhala pontho dzindza ibodzi basi. Profesiya ineyi yalongambo kuti ale analambira Mulungu mu ntsiku zakumalisa mbadadzakhalambo ninga nsoka ubodzi.
Yahova apanga mprofeta Ezekyeli toera kulemba pa pimiti piwiri. Pa cimuti cibodzi iye akhafunika kulemba tepa, “Kuna Yuda na kuna mbumba yonsene ya Israele ali na iye.” Pa cimuti cinango akhafunika kulembambo tepa, “Kuna Zuze, cimuti ca Efrayimu na kuna onsene a panyumba ya Israele ali na iye.” Pimiti piwiri mbipidakhala “cimuti cibodzi basi” m’manja mwa Ezekyeli.—Ezekyele 37:15-17, Tradução do Novo Mundo.
Kodi fala yakuti “cimuti ca Efrayimu” isaimiriranji? Dzindza ya Efrayimu ikhali ikulu kakamwe mwa umambo wa madzindza khumi a Israele, kunkwiriro. Mwandimomwene, mambo wakutoma adatonga umambo unoyu, Yeroboamu, akhali wa dzindza ya Efrayimu. (Deuteronomyo 33:13, 17; 1 Amambo 11:26) Dzindza ineyi yabulukira kwa Efrayimu, mwana wa Zuze. (Numero 1:32, 33) Zuze akhadatambira nkhombo yakupambulika kubulukira kwa babace, Yakobe. Natenepa, mphyakuthema kuti “cimuti ca Efrayimu” ciimirire madzindza khumi a umambo wa kunkwiriro. Mu caka 740 Kristu mbadzati kubalwa, pontho Ezekyeli mbadzati kulonga profesiya ineyi, Asirya akunda umambo wa Israele wa kunkwiriro, mbaendesa anthu anewa ku ubitcu. (2 Amambo 17:6) Buluka penepo, Abhabhilonya akunda Asirya. Natenepa, pa ndzidzi udalemba Ezekyeli profesiya inalonga pya pimiti piwiri, azinji mwa Aisraele anewa akhadamwazika mu Utongi wa Bhabhilonya.
Mu caka 607 Kristu mbadzati kubalwa, Abhabhilonya akunda umambo wa madzindza mawiri a Yuda kubangwe mbaaendesa ku Bhabhilonya. Panango iwo akwatambo anthu onsene akhadasala ku umambo wa kunkwiriro kwa Israele. Amambo a umambo wakubangwe akhali a dzindza ya Yuda. Anyantsembe akhakhalambo ku Yuda thangwi iwo akhatumikira pa templo mu Yerusalemu. (2 Pya dziko ya Israele 11:13, 14; 34:30) Natenepa, mphyakuthema kulonga kuti cimuti ca “Yuda” cisaimirira madzindza mawiri a umambo wakubangwe.
Kodi pimiti piwiri pyenepi pyaphatanizwa lini? Pyaphatanizwa mu caka 537 Kristu mbadzati kubalwa, pa ndzidzi wakuti anthu a dzindza ya umambo wakubangwe na a umambo wa kunkwiriro abwerera pabodzi pene ku Yerusalemu toera kumanga papswa templo. Aisraele nee akhalibve akugawika. Aisraele atoma pontho kulambira Yahova pabodzi pene. (Ezekyele 37:21, 22) Kuphatana kweneku kukhadalongwa kale na mprofeta Izaiya na Yeremiya.—Izaiya 11:12, 13; Yeremiya 31:1, 6, 31.
Kodi profesiya ya Ezekyeli yalonganji thangwi ya ulambiri wandimomwene? Yapikira kuti Yahova mbadacitisa alambiri ace onsene kukhala ‘m’bodzi basi.’ (Ezekyele 37:18, 19) Kodi pikiro ineyi isakwanirisika mu ntsiku zino? Inde. Profesiya ineyi yatoma kukwanirisika mu caka 1919. Mbacidzati kufika caka ceneci, Sathani akhadayesera kugawa atumiki a Mulungu. Mbwenye mu caka 1919, iwo aceneswa mbagumanywa pontho mwapang’ono pang’ono.
Pa ndzidzi unoyu, azinji mwa atumiki a Mulungu akhali na cidikhiro cakukhala amambo na anyantsembe kudzulu pabodzi na Yezu. (Apokalipse 20:6) Iwo akhali ninga cimuti ca Yuda. Mbwenye ale akhadikhira kukhala kwenda na kwenda pa dziko yapantsi, akhali akucepa kakamwe. Mukupita kwa ndzidzi, ale akuti akhali na cidikhiro ceneci adzathimizirika. (Zakariya 8:23) Iwo akhali ninga cimuti ca Zuze.
Lero, misoka miwiri ene isatumikira Yahova pabodzi pene. Pontho Mambo wawo ndi m’bodzi basi, Yezu Kristu. Mu profesiya ya Ezekyeli, Yezu asacemerwa ‘Dhavidhi ntumiki wanga.’ (Ezekyele 37:24, 25) Yezu aphembera kuna Babace thangwi ya anyakupfundzace: ‘Onsene akhale m’bodzi basi, sawasawa ninga imwe Baba muli wakuphatana na ine, inembo ndiri wakuphatana na imwe.’ * (Onani cidzindikiro capantsi.) (Jwau 17:20, 21) Yezu apikira kuti nkumbi wace ung’ono wa anyakupfundza akudzodzwa mbudakhala “nkumbi ubodzi” ene na “mabira anango.” Onsene mbadatowerera ‘nkumbizi m’bodzi basi.’ (Jwau 10:16) Ninga pidalonga Yezu, atumiki onsene a Mulungu lero ndi akuphatana, mwakukhonda tsalakana khala ali na cidikhiro cakuenda kudzulu peno kukhala pa dziko yapantsi!
^ ndima 10 Pidalonga Yezu thangwi ya cidzindikiro ca ntsiku zakumalisa, iye alonga misangani mizinji kuna anyakupfundzace. Mphyakutsandzayisa kakamwe kudziwa kuti pakutoma iye alonga pya “m’bandazi wakukhulupirika na wandzeru,” nsoka ung’ono wa Akristu akudzodzwa akuti mbadacita basa yakutsogolera atumiki a Mulungu. (Mateo 24:45-47, NM) Buluka penepo, iye alonga pya nsangani wakuti usalonga pya anyakudzodzwa onsene. (Mateo 25:1-30) Pakumalisa iye alonga pya ale akuti mbadaphedzera abale a Kristu, akuti anadzakhala pa dziko ya pantsi kwenda na kwenda. (Mateo 25:31-46) Munjira ibodzi ene, pidatoma kukwanirisika profesiya ya Ezekyeli mu ndzidzi wathu, pakutoma ikhaphatisirwa kwa ale anadikhira kuenda kudzulu. Maseze madzindza khumi a Israele nee asaimirira ale anafuna kudzakhala kwenda na kwenda pa dziko yapantsi, mbwenye kuphatana kunalongwa mu profesiya ineyi kusatikumbusa pya kuphatana kunaona ife lero pakati pa ale anadikhira kukhala pa dziko yapantsi na anyakudzodzwa.
