KODI MUNTHU ANAKWANISADI KUSANKHULA KUTI TSOGOLO YACE INAKHALA TANI? Anthu azinji asalonga kuti Mulungu atonga kale pinafuna kuacitikira mu umaso wawo, natenepa nkhabe cinakwanisa iwo kucinja. Iwo angacimwana kucita cinthu cinango asalonga: “Mulungu akhadapitonga kale kuti nee ndinapikwanisa.”

Anthu anango nkhabebve cidikhiro thangwi yakupondererwa na kusowa ulungami kunaoneka mu dziko ino. Panango iwo asawangisira toera akhale na umaso wadidi, mbwenye asacimwana thangwi ya nkhondo, uphanga, pidengwa pyacibaliro na mautenda. Na thangwi ineyi iwo asanyerezera: ‘Ndikuthabukiranji ine?’

Ndimomwene kuti nyatwa zisaticimwanisa kucita pinafuna ife. (Ekleziaste 9:11) Mbwenye umaso wakukhonda mala usanyindira kakamwe pisankhulo pinacita ife. Mwandimomwene, Bhibhlya isapangiza kuti tsogolo yathu isanyindira pisankhulo pyathu. Tendeni tione pinalonga iyo.

Mu ndzidzi wakuti Aizraeli akhadasala pang’ono toera kupita mu Dziko Yakupikirwa, Mose wakuti akhali ntsogoleri wawo aapanga mafala awa akubuluka kuna Mulungu: “Ine ndaikha patsogolo panu umaso na kufa, nkhombo na dzedze; musafunika kusankhula umaso, toera mupitirize kukhala na umaso, imwe pabodzi na ananu, mbamufuna Yahova Mulungu wanu, mubvesere fala yace, mbamukhala akukhulupirika kuna iye.”—Dheuteronomyo 30:15, 19, 20.

“Ine ndaikha patsogolo panu umaso na kufa, nkhombo na dzedze; musafunika kusankhula umaso.” —Dheuteronomyo 30:19

Mulungu apulumusa Aizraeli mbaabulusa ku ubitcu ku Ejitu na cifuno cakuti akhale mwaufulu na umaso wakutsandzayisa mu Dziko Yakupikirwa. Mbwenye toera akhale na umaso ninga unoyu iwo akhafunika kucita pinthu pingasi. Iwo akhafunika ‘kusankhula umaso’ toera akhale na nkhombo zenezi. Mbadacita tani pyenepi? ‘Iwo akhafunika kufuna Mulungu, kubvesera fala yace mbakhala akukhulupirika kuna iye.’

Lero, ife tisafunikambo kucita cisankhulo, pontho cisankhulo ceneci cinapangiza kuti tsogolo yathu inadzakhala tani. Mphapo tinakwanisa tani kusankhula umaso? Ife tinakwanisa kusankhula umaso wakukhonda mala mparaizu pa dziko yapantsi tingacita pinthu pingasi: Kufuna Mulungu, kubvesera fala yace mbatikhala akukhulupirika kuna iye. Mphapo tinacita tani pinthu pyenepi?

Ufuni ndi nkhaliro wakufunika kakamwe wa Mulungu. Mpostolo Juwau alemba: “Mulungu ndi ufuni.” (1 Juwau 4:8) Ndi thangwi yace pidabvundzwa Yezu kuti ndi api matongero makulu kakamwe, iye alonga: “Funa Yahova Mulungu wako na ntima wako onsene, na umaso wako onsene na ndzeru zako zonsene.” (Mateu 22:37) Ufuni ndiwo unafuna kutiphedza toera tikhale na uxamwali na Yahova Mulungu, tayu kun’gopa, peno kum’bvera mwaciphamaso. Mphapo thangwi yanji tisafunika kusankhula kufuna Mulungu?

Yahova asafuna anthu ninga pinacita anyakubala kuna anawo. Ngakhale ndi akusowa ungwiro, anyakubala aufuni asapfundzisa, asawangisa, asaphedza, pontho asasandika anawo. Iwo asacita pyenepi thangwi asafuna kuti anawo akhale akutsandzaya, pontho pinthu piafambire mwadidi. Mphapo anyakubala asadikhiranjimbo kuna ana? Iwo asadikhira kuti anawo aafune, pontho abvere na kuphatisira pinapfundziswa iwo toera pinthu piafambire mwadidi mu umaso wawo. Kodi si pyakuthema tayu kuna Babathu wakudzulu kudikhira kuti ifembo anthu tinfune toera kupangiza  kuti tisapereka takhuta thangwi ya pinthu pyonsene pinaticitira iye?

Mu pilongero pyakutoma pidalembwa Bhibhlya, fala yakuti “kubvesera” isabvekambo “kubvera.” Kodi si pyenepi tayu pinafuna ife tingapanga mwana kuti: “Bvesera pinalonga anyakubalako”? Natenepa kubvesera fala ya Mulungu pisabveka kupfundza na kubvera pinalonga iye. Ife nkhabe kwanisa kubva fala yandimomwene ya Mulungu, mbwenye tinakwanisa kumbvesera tingaleri na kuphatisira pinapfundza ife m’Mafalace, Bhibhlya.—1 Juwau 5:3.

Toera kupangiza kufunika kwa kubvesera fala ya Mulungu, paulendo unango Yezu alonga: “Munthu nee asafunika kukhala maso na cakudya basi, mbwenye na mafala onsene anabuluka pamulomo wa Yahova.” (Mateu 4:4) Tisadziwa kuti kudya ndi kwakufunika, mbwenye kupfundza thangwi ya Mulungu ndi kwakufunika kakamwe. Thangwi yanji? Salomoni wakuti akhali Mambo waudziwisi alonga: “Udziwisi usatsidzikiza, ninga kobiri isatsidzikiza. Mbwenye cidziwiso cisaphedza kakamwe, thangwi udziwisi usapulumusa umaso wa ule ali nawo.” (Ekleziaste 7:12) Cidziwiso na udziwisi unatipasa Mulungu pinakwanisa kutitsidzikiza cincino, pontho pinatiphedza toera kucita pisankhulo pyadidi pyakuti pinaticitisa kukhala na umaso wakukhonda mala ntsogolo.

Kumbukani nsangani wa Yezu udalonga ife mu nsolo udamala, iye alonga: “Nsuwo unatsogolera ku umaso ndi ung’ono, nseu wacembo ndi ung’ono, mbwenye ndi anthu akucepa anaugumana.” (Mateu 7:13, 14) Tingafuna kufamba mu nseu ninga unoyu, mwakukhonda penula, ife tinakomerwa kakamwe tingakhala na munthu wakuti asaudziwa mwadidi toera kutitsogolera. Ife tisafunambo munthu toera atitsogolere mpaka tikhale na umaso wakukhonda mala. Ndi thangwi yace, ife tisafunika kukhala na uxamwali wakuwanga na Mulungu. (Masalmo 16:8) Tinacita tani pyenepi?

Ntsiku zonsene ife tisakhala akuphatika na mabasa mazinji, mbwenye anango mwa mabasa anewa anakwanisa kutidzudzumisa mbatisowa ndzidzi wakupfundza pinafuna Mulungu kuna ife. Ndi thangwi yace Bhibhlya isatikumbusa: “Citani mphole-mphole kakamwe toera mukhonde kufamba ninga anthu akusowa ndzeru, mbwenye ninga anthu audziwisi, mbamuphatisira mwadidi kakamwe ndzidzi wanu, thangwi ntsiku zino ndi zakuipa.” (Aefesi 5:15, 16) Tingaikha uxamwali wathu na Mulungu pa mbuto yakutoma, ife tinakhala akukhulupirika kuna iye.—Mateu 6:33.

Ife nkhabe kwanisa kucinja pidacita ife nduli, mbwenye tinakwanisa kusankhula toera ife na anthu anafuna ife tikhale na umaso wadidi ntsogolo. Bhibhlya isapangiza kuti Babathu wakudzulu, Yahova Mulungu, asatifuna kakamwe, pontho asatiphedza toera kudziwa pinafunika ife kucita. Onani mafala adalonga mprofeta Mikeya:

“Iye akupanga kuti ndi pipi pinthu pyadidi. Kodi Yahova asafuna kuti ucitenji? Basi ene iye asafuna kuti ucite pinthu pyakulungama, ukhale wakukhulupirika, pontho ufambe mwakucepeseka na Mulungu wako!”—Mikeya 6:8.

Kodi imwe munatawira ncemerero wa Yahova wakufamba na iye toera kutambira nkhombo zakukhonda mala zinafuna iye kupasa ale anambvera? Cisankhulo ndi canu!