Dimingu, Nisane 16, anyakupfundza akhali akutsukwala. Iwo nee akhabvesesa kuti thangwi yanji nee agumana manungo a Yezu mu nthumbi. (Mateu 28:9, 10; Luka 24:11) Nkati mwa ntsiku ineyi, Kleopa na nyakupfundza unango abuluka ku Yerusalemu mbaenda ku Emausi, nsindzo wa makilometru cifupi na 11.

N’njira, iwo akhacedza pidacitika. Mamuna m’bodzi apitambo mu nsoka mwawo, mbabvundza: “Ndi pinthu pyanji pinafamba imwe mbamucedza n’njira?” Kleopa atawira: ‘Kodi iwe ndiwe mulendo anakhala ekhene mu Yerusalemu mbukhonda kudziwa pidacitika mwenemu mu ntsiku zino?’ Mamuna abvundza: “Pinthu pyanji?”—Luka 24:17-19.

Iwo atawira: “Pinthu pidacitikira Yezu wa ku Nazareti,  . . . Ife tikhadikhira kuti munthu unoyu ndiye adasankhulwa toera kuombola Aizraeli.”—Luka 24:19-21.

Kleopa na ndzace anfokotozera mamuna unoyu pidacitika ntsiku ineyi. Iwo alonga kuti akazi anango adaenda ku nthumbi idaikhwa Yezu nee agumana manungo ace, pontho alonga pinthu pinango pyakudzumisa—aanju awiri abulukira mbalonga kuti Yezu alamuswa muli akufa. Kleopa na ndzace alonga pontho kuti anthu anango aendambo ku nthumbi “mbagumana pyonsene ninga mudapangwa ife na akazi.”—Luka 24:24.

Anyakupfundza anewa awiri akhadzudzumika kakamwe na pyonsene pidacitika. Nakuti iwo nee akhakhulupira pidacitika, mamuna aasandika mwamphambvu mbalonga: ‘Imwe anthu akusowa ndzeru na a ntima wakudembuka kutawira pinthu pyonsene pidalonga aprofeta! Kodi Kristu nee akhafunika kuti aone nyatwa zenezi toera apite mu mbiri yace?’ (Luka 24:25, 26) Iye aafokotozera Malemba mazinji akhalonga pya Kristu.

Pikhali iwo dhuzi na Emausi, anyakupfundza anewa awiri akhafuna kudziwa pizinji, natenepa iwo aphemba mamuna: “Khala pabodzi na ife thangwi dzuwa ikudoka, thimize pano kunja kunapswipa.” Iye atawira phembo yawo, mbadya nawo pabodzi. Pikhacita mamuna unoyu phembero, kugwanda-gwanda nkate toera kuapasa, iwo andzindikira, buluka penepo iye azambazika. (Luka 24:29-31) Mu ndzidzi unoyu iwo akhala na cinyindiro cakuti Yezu alamuswadi muli akufa!

Mwakukomerwa anyakupfundza awiri atoma kulonga pidacitika: “Kodi mitima yathu nee ikhapisa mu ndzidzi ukhalonga iye na ife mu nseu mbatifokotozera mwadidi Malemba?” (Luka 24:32) Mwakucimbiza iwo abwerera ku Yerusalemu kukhali apostolo na anthu anango. Mbwenye Kleopa na ndzace mbadzati kulonga pidaacitikira, iwo abva anango mbakalonga: “Mwandimomwene Mbuya alamuswa muli akufa, mbaonekera kuna Simau!” (Luka 24:34) Buluka penepo anyakupfundza awiri alonga kuti Yezu aonekera tani kuna iwo, thangwi iwo amuonambo.

Mbwenye cincino onsene adzumatirwa—Yezu aonekera pakhali iwo! Pyenepi pikhali pyakudzumisa thangwi iwo akhadafunga misuwo yonsene. Iwo acita pyenepi thangwi akhagopa Ayuda. Ngakhale tenepo, Yezu akwanisa kupita mwenemu. Mwakukhurudzika iye alonga: “Ntendere mbukhale na imwe.” Mbwenye iwo akhagopa. Iwo atoma pontho ‘kunyerezera kuti akuona nzimu.’—Luka 24:36, 37; Mateu 14:25-27.

Toera kuaphedza kudziwa kuti iye nee akhali nzimu peno cinthu cinango cikhanyerezera iwo, Yezu aapangiza manjace na miyendo toera iwo adzindikire kuti iye akhalidi munthu wandimomwene, mbalonga: “Thangwi yanji musanentseka, pontho thangwi yanji musapenula m’mitima yanu? Onani, ndine pano, yang’anani manja anga na miyendo yanga; ndikhuyeni muone, thangwi nzimu nkhabe manungo na magogodo ninga munandionera imwe.” (Luka 24:36-39) Iwo atsandzaya kakamwe, pontho adzumatirwa, mbwenye pikhaanentsa toera kukhulupira.

 Toera kuaphedza pontho kukhulupira kuti iye akhalidi munthu wandimomwene Yezu abvundza: “Muli na cinthu pano toera kudya?” Iye atambira phindi ya nyama ya m’madzi mbadya. Buluka penepo iye alonga: ‘Awa ndi mafala anga adakupangani ine pikhali ine pabodzi na imwe, kuti pinthu pyonsene pidalembwa thangwi ya ine m’Mwambo wa Mose na m’mabukhu a Aprofeta na a Masalmo, pisafunika pikwanirisike.’—Luka 24:41-44.

Yezu aphedza Kleopa na ndzace kubvesesa Malemba, buluka penepo acita pibodzi pyene kwa onsene akhali penepo: “Pyalembwa kuti Kristu mbadaona nyatwa mbalamuswa muli akufa pa ntsiku yacitatu, pontho, mu dzina yace, kutomera mu Yerusalemu mphangwa zakuti anthu asafunika kutcunyuka toera kulekererwa madawo, zinadzamwazwa kuna anthu a madzindza onsene. Imwe munadzapereka umboni wa pinthu pyenepi.”—Luka 24:46-48.

Mpostolo Tomasi nee akhalimbo pa nsoka unoyu. Pakupita ntsiku zingasi, anango anfokotozera mwakutsandzaya: “Ife tamuona Mbuya!” Tomasi atawira: “Ndingakhonda kuona mabenga a maperego adapholwa na iye m’manja mwace mbandipitisa cala canga pa benga ya maperego, pontho ndingakhonda kupitisa djanja yanga pakhundu pace, ine cipo ndinatawira pyenepi.”—Juwau 20:25.

Pidapita ntsiku zisere, anyakupfundza agumanyikana pontho mbafunga misuwo, mbwenye paulendo unoyu Tomasi akhalimbo penepo. Yezu aonekera pakati pawo na manungo aunyama mbaapanga: “Ntendere mbukhale na imwe.” Pidazungunuka iye kuna Tomasi, Yezu alonga: “Ikha cala cako apa, ona manja anga, bwera upitise djanja yako pakhundu panga. Leka kupenula, mbwenye khulupira.” Tomasi alonga: “Mbuya wanga, Mulungu wanga!” (Juwau 20:26-28) Cincino iye nee akupenulabve kuti Yezu alamuswa muli akufa ninga anju wamphambvu wakuti asaimirira Yahova Mulungu.

Yezu alonga: “Usakhulupira thangwi wandiona? Anyakutsandzaya ndi ale anakhulupira, maseze nee aona.”—Juwau 20:29.